IRCTC Beta Website Launch: రైలు టికెట్లను ఆన్ లైన్ లో బుక్ చేసుకునే ప్రయాణికులకు భారతీయ రైల్వే గుడ్ న్యూస్ చెప్పింది. IRCTC కొత్త బీటా వెబ్ సైట్ ను అందుబాటులోకి తీసుకొచ్చింది. కొత్త డిజైన్, వేగవంతమైన సర్వీసులు, సులభమైన టికెట్ బుకింగ్ ప్రక్రియతో ఈ వెబ్ సైట్ ను రూపొందించారు. వినియోగదారుల అభిప్రాయాల ఆధారంగా మరిన్ని అప్ డేట్స్ తో త్వరలో పూర్తి స్థాయిలో ప్రారంభించనున్నారు. గత నెలలో జైపూర్ లోని మాలవీయ నేషనల్ ఇన్స్టిట్యూట్ ఆఫ్ టెక్నాలజీలో విద్యార్థులతో మాట్లాడిన సందర్భంగా రైల్వే మంత్రి అశ్విని వైష్ణవ్ కొత్త IRCTC వెబ్ సైట్ ను జూలై మధ్యలో అందుబాటులోకి తీసుకువస్తామని ప్రకటించారు. చెప్పినట్లుగానే ఇప్పుడు బీటా వెర్షన్ను ప్రయాణికుల కోసం విడుదల చేశారు.
IRCTC బీటా వెబ్ సైట్ ను ఉపయోగించే వారు కొత్త డిజైన్ తో పాటు కొత్త ఫీచర్లను కూడా పొందే అవకాశం ఉంది. అలాగే వెబ్ సైట్ పనితీరు, సౌలభ్యం, యూజర్ ఎక్స్ పీరియెన్స్ గురించి తమ అభిప్రాయాలను తెలియజేయడానికి అవకాశం కల్పించారు. ఆ సూచనల ఆధారంగా తుది వెర్షన్ లో అవసరమైన మార్పులు చేయనున్నారు. IRCTC వెబ్ సైట్ మొదటిసారి 2002లో ప్రారంభమైంది. ప్రస్తుతం ఈ పోర్టల్ ద్వారా ప్రతి రోజు సగటున 14.5 లక్షలకుపైగా రైలు టికెట్లు బుక్ అవుతున్నాయి. దేశంలో అత్యధికంగా ఉపయోగించే ఆన్ లైన్ టికెటింగ్ ప్లాట్ ఫామ్ లలో ఒకటిగా కొనసాగుతోంది. పెరుగుతున్న వినియోగదారుల అవసరాలను దృష్టిలో పెట్టుకుని కొత్త వెబ్ సైట్ ను మరింత వేగంగా, సులభంగా ఉపయోగించేలా రూపొందించారు.
కొత్త బీటా వెబ్ సైట్ లో పలు కీలక మార్పులు చేశారు. ముందుగా టికెట్ బుక్ చేసే సమయంలో తరచూ ఇబ్బంది పెట్టే అనవసరమైన క్యాప్చాలను తగ్గించారు. అలాగే అవసరం లేని పాప్ అప్లు, గ్రాఫిక్స్ ను తొలగించారు. దీంతో వెబ్ సైట్ మరింత క్లీన్ గా, ఈజీగా కనిపిస్తుంది.
ఇక సీట్ల లభ్యత విషయంలో కూడా మార్పులు చేశారు. అన్ని క్లాస్ లలో సీట్లు ఉన్నాయా? లేదా? అనే సమాచారం ఒకే స్క్రీన్లో స్పష్టంగా కనిపించేలా రూపొందించారు. దీంతో ప్రయాణికులు సులభంగా నిర్ణయం తీసుకునే అవకాశం ఉంటుంది. టికెట్ బుకింగ్ ప్రక్రియను కూడా వేగవంతం చేశారు. గతంతో పోలిస్తే బుకింగ్ పూర్తి చేయడానికి అవసరమైన స్టెప్స్ ను తగ్గించారు. దీంతో తక్కువ సమయంలోనే టికెట్ బుక్ చేసుకోవచ్చు. అలాగే తరచూ ప్రయాణించే వారి కోసం ప్రయాణికుల వివరాలను సేవ్ చేసే సదుపాయం కూడా అందుబాటులోకి తీసుకొచ్చారు. దీంతో ప్రతిసారి వివరాలు ఎంటర్ చేయాల్సిన అవసరం ఉండదు. రీ-బుకింగ్ కూడా చాలా సులభంగా పూర్తవుతుంది.
ప్రస్తుతం బీటా వెర్షన్ ను ఉపయోగించే ప్రయాణికులు తమ అభిప్రాయాలను తెలియజేస్తే, వాటి ఆధారంగా సర్వీసులను మరింత మెరుగుపరచాలని రైల్వే శాఖ భావిస్తోంది. దీంతో భవిష్యత్తులో టికెట్ బుకింగ్ మరింత వేగంగా, సులభంగా, ఇబ్బందులు లేకుండా జరిగే అవకాశం ఉంది.
Read Also: విశాఖ ప్రయాణికులకు గుడ్ న్యూస్.. ప్రత్యేక రైళ్లు పొడిగింపు!
Share
ఇరాన్పై అమెరికా దాడులు.. కుప్పకూలిన చాబహార్ టవర్.. భారత్కు కోలుకోలేని దెబ్బ!
భర్తను చంపి రీల్స్ చూస్తూ భార్య ఎంజాయ్.. కొడుకుపై కత్తితో దాడి, కర్ణాటకలో దారుణం
