Identify Spy Cameras Hotel Rooms| ప్రయాణ సమయంలో అందరూ హోటల్స్, హాస్టెల్స్ లేదా పిజి (పెయింగ్ గెస్ట్) ఇళ్లలో బస చేస్తారు. మంచి బ్రాండ్ ఉన్న హోటల్స్ సేఫ్టీ రూల్స్ పాటిస్తూ వచ్చే అతిథుల ప్రైవసీని గౌరవిస్తారు. కానీ కొన్ని హోటల్స్లో మోసపూరితంగా అతిథులు బస చేసే గదుల్లో రహస్య కెమెరాల పెట్టి వారి వ్యక్తిగత జీవితాన్ని వీడియోలు రికార్డ్ చేస్తారు. ఆ తరువాత ఆ వీడియోలను దుర్వినియోగం చేస్తారు. ఇలాంటి సంఘటనలు ప్రైవసీపై భయాన్ని కలిగిస్తాయి. ఇదంతా హోటల్ రూమ్స్లో దాచి పెట్టిన కెమెరాల ద్వారానే జరుగుతుంది. అందుకే మీరు ఏదైనా హోటల్ రూంలో బస చేస్తే ముందుగా ఆ గదిని బాగా పరిశీలించాలి. ఆ రహస్య కెమెరాలు ఎక్కడైనా దాగి ఉండవచ్చు. కాబట్టి జాగ్రత్తలు తీసుకోవడం మంచిది.
ఈ రహస్య కెమెరాలు హోటల్ గదిలోని సాధారణ వస్తువుల్లో మోసగాళ్లు దాచి పెడతారు. గదిలోని అలారం గడియారాలు, వాల్ ఛార్జర్లు, USB అడాప్టర్లు, స్మోక్ డిటెక్టర్లు వస్తువుల్లో వంటివి సాధారణ హైడింగ్ స్పాట్స్. ఎయిర్ ప్యూరిఫైయర్లు, టీవీ సెట్-టాప్ బాక్స్లు, బాత్రూమ్ వెంటిలేషన్, పవర్ సాకెట్లలో కూడా ఉండవచ్చు. ఇవన్నీ చూస్తే సాధారణ వస్తువుల్లాగానే కనిపిస్తాయి. కాబట్టి వీటిని జాగ్రత్తగా పరిశీలించాలి.
రూమ్లోకి వెళ్లగానే బ్యాగేజ్ ఓపెన్ చేయకండి. కొన్ని నిమిషాలు చుట్టూ గమనించండి. అసాధారణ ఎలక్ట్రానిక్ పరికరాలు, కొత్త వస్తువులు ఉన్నాయేమో చూడండి. బెడ్ లేదా బాత్రూమ్ వైపు పాయింట్ అయ్యే పరికరాలు ఉంటే జాగ్రత్తగా తనిఖీ చేయండి. సందేహాస్పదంగా అనిపిస్తే వెంటనే వాటిని పరిశీలించండి.
టెక్నాలజీ సహాయంతో కూడా తనిఖీ చేయవచ్చు. Fing అనే యాప్ చాలా పాపులర్. ఈ యాప్లో మీరు కనెక్ట్ అయిన వై-ఫై నెట్వర్క్లో ఉన్న అన్ని డివైస్లను చూపిస్తుంది. ఆండ్రాయిడ్, ఐఫోన్ రెండింటిలోనూ లభిస్తుంది.
ముందుగా హోటల్ వై-ఫైకి కనెక్ట్ అవ్వండి. స్మార్ట్ఫోన్లో Fing యాప్ ఓపెన్ చేసి స్కాన్ చేయండి. ఫోన్లు, ల్యాప్టాప్లు, స్మార్ట్ టీవీలు, రౌటర్లు కనిపిస్తాయి. కొన్ని IP కెమెరాలుగా లేదా సెక్యూరిటీ కెమెరాలుగా చూపిస్తాయి. తెలియని డివైస్ కనిపిస్తే జాగ్రత్తగా చూడండి. అనుమానంగా అనిపిస్తే వెంటనే హోటల్ స్టాఫ్కు చెప్పండి. (ఇది వై-ఫై కనెక్టెడ్ కెమెరాలకు మాత్రమే పనిచేస్తుంది)
ఇంటర్నెట్ లేదా, స్మార్ట్ఫోన్ లేకున్నా సాధారణంగా కూడా తనిఖీ చేయవచ్చు. స్మోక్ డిటెక్టర్లు, పవర్ సాకెట్లు, బాత్రూమ్ వెంట్స్, ముఖ్యంగా డెకరేషన్ చేసిన వస్తువులు బాగా పరిశీలించండి. రూమ్ లైట్స్ ఆఫ్ చేసి టార్చ్ లైట్ లేదా మీ ఫోన్ ఫ్లాష్లైట్తో గది అన్ని వైపులా చూడండి. ఏదైనా వస్తువులోపల రహస్యంగా కెమెరా ఉంటే కెమెరా లెన్స్లు లైట్ రిఫ్లెక్షన్ కనిపిస్తుంది.
మీ స్మార్ట్ఫోన్ కెమెరా ఓపెన్ చేసి రూమ్ స్లోగా స్కాన్ చేయండి. నైట్-విజన్ కెమెరాలు ఇన్ఫ్రారెడ్ లైట్స్ ఉపయోగిస్తాయి. అవి స్క్రీన్పై చిన్న గ్లోయింగ్ డాట్స్గా కనిపిస్తాయి. చీకటిగా ఉన్న గది మూలలు, ఎలక్ట్రానిక్ పరికరాల దగ్గర బాగా చూడండి.
కొన్ని అద్దాలు టూ-వే మిర్రర్లు కావచ్చు. వేలితో అద్దంపై టచ్ చేయండి. మీ వేలి రిఫ్లెక్షన్ నేరుగా టచ్ అయితే అందులో తేడా ఉన్నట్లే. సాధారణ అద్దాల్లో చిన్న గ్యాప్ ఉంటుంది.
Also Read: యుపిఐ చెల్లింపుల సమయంలో మీ నెంబర్ కనిపిస్తోందా? బ్లాక్ చేయడానికి ఇలా చేయండి
నమ్మకమైన ప్లాట్ఫామ్ల ద్వారానే రూమ్ బుక్ చేయండి. మంచి రేటింగ్స్ ఉన్న హోటల్స్ ఎంచుకోండి. తెలియని పబ్లిక్ వై-ఫైకి కనెక్ట్ మీ ఫోన్ చేయడం ప్రమాదకరం. మొబైల్ డేటా ఉపయోగించండి. ఏదైనా అసాధారణంగా అనిపిస్తే వెంటనే హోటల్ స్టాఫ్కు చెప్పండి. అవసరమైతే రూమ్ మార్చమని అడగండి. హోటల్ సిబ్బందిపై కూడా అనుమానం కలిగితే పోలీసులకు సమాచారం ఇవ్వండి. మీ ప్రైవసీ రక్షణ మీ చేతుల్లోనే ఉంది.
Share
Whats App Plus: వాట్సాప్ ఫ్లస్ సబ్ స్క్రిప్షన్ ప్లాన్.. స్పెషల్ ఫీచర్లు ఇవే!
CM Revanth Reddy: హైదరాబాద్ నగరాన్ని క్లీన్ సిటీగా మార్చండి.. అధికారులకు సీఎం రేవంత్ ఆదేశాలు
