Tadepalligudem Accident: తాడేపల్లిగూడెంలో టెంపో బోల్తా.. స్పాట్ లో 27 మంది..

Tadepalligudem Accident: పశ్చిమ గోదావరి జిల్లా తాడేపల్లిగూడెంలో పెను ప్రమాదం తృటిలో తప్పింది. జాతీయ రహదారి 16పై వెళ్తున్న ఒక టెంపో అదుపు తప్పి పక్కనే ఉన్న పంటబోదులోకి దూసుకెళ్లింది. ఈ ప్రమాద సమయంలో వాహనంలో మొత్తం 27 మంది ప్రయాణికులు ఉన్నారు. వీరంతా జార్ఖండ్ రాష్ట్రానికి చెందిన వారు కావడం గమనార్హం. ఫిబ్రవరి 9వ తేదీన తమ స్వస్థలం నుండి బయలుదేరిన వీరు దక్షిణ భారతదేశంలోని వివిధ పుణ్యక్షేత్రాల సందర్శనలో భాగంగా చెన్నై వైపు వెళ్తుండగా తాడేపల్లిగూడెం వద్ద ఈ ప్రమాదం చోటుచేసుకుంది.

ప్రమాదం జరిగిన తీరును గమనిస్తే వాహనం వేగంగా వస్తూ రహదారి పక్కనే ఉన్న చిన్న కలవట్టు మీదుగా పంటబోదులోకి దూసుకుపోయింది. వాహనం ఒక్కసారిగా కిందకు పడిపోవడంతో లోపల ఉన్న ప్రయాణికులు ఒకరిపై ఒకరు పడిపోయారు. ఈ ఘటనలో 15 మందికి గాయాలు కాగా 11 మంది ఎటువంటి గాయాలు లేకుండా సురక్షితంగా బయటపడ్డారు. ప్రమాద తీవ్రతకు వాహనం ముందు భాగం పూర్తిగా దెబ్బతింది. సమాచారం అందుకున్న వెంటనే మూడు అంబులెన్స్‌లు ఘటనా స్థలానికి చేరుకుని క్షతగాత్రులను తాడేపల్లిగూడెం ఏరియా ఆసుపత్రికి తరలించాయి. ఆసుపత్రిలో చికిత్స పొందుతున్న వారందరికీ ప్రాణాపాయం లేదని వైద్యులు ధృవీకరించడంతో అందరూ ఊపిరి పీల్చుకున్నారు.

స్థానికులు, తోటి వాహనదారులు వెంటనే స్పందించి సహాయక చర్యలు చేపట్టడం వల్ల క్షతగాత్రులను త్వరగా ఆసుపత్రికి చేర్చడం సాధ్యమైంది. క్షతగాత్రులలో మహిళలు, చిన్నారులు కూడా ఉన్నారు. ప్రమాదం జరిగిన సమయంలో వాహనం పల్టీలు కొట్టకపోవడం, నేల కొంత మెత్తగా ఉండటంతో పెను ప్రమాదం తప్పిందని ప్రత్యక్ష సాక్షులు చెబుతున్నారు. ఒకవేళ వాహనం డివైడర్ దాటి అవతలి వైపునకు వెళ్లినా లేదా ఎదురుగా వస్తున్న వాహనాన్ని ఢీకొన్నా భారీ ప్రాణనష్టం సంభవించేదని స్థానికులు పేర్కొన్నారు.

డ్రైవర్ విశ్రాంతి లేకుండా సుదీర్ఘ కాలం వాహనాన్ని నడపడం వల్లే ఈ ప్రమాదం జరిగిందని ప్రయాణికులు అభిప్రాయపడుతున్నారు. డ్రైవర్ నిద్రమత్తులోకి జారడం వల్లే రెప్పపాటు కాలంలో వాహనం అదుపు తప్పి కిందకు దూసుకెళ్లిందని తెలుస్తోంది. పోలీసులు ఈ ఘటనపై కేసు నమోదు చేసి దర్యాప్తు చేస్తున్నారు. డ్రైవర్ నిద్రమత్తు వల్ల జరిగిందా లేక వాహనంలో సాంకేతిక లోపం ఉందా అనే కోణంలో విచారణ జరుపుతున్నారు. బాధితులు కోలుకున్న తర్వాత వారిని సురక్షితంగా స్వస్థలాలకు పంపేలా ఏర్పాట్లు చేస్తామని పోలీసులు తెలిపారు.