తెలుగు రాష్ట్రాల్లో విద్యాసంస్థల బంద్.. పాఠశాలలు, కాలేజీలకు సెలవు, ఏపీలో ఆ నిర్ణయం ఏంటి?

School Bandh: దేశవ్యాప్తంగా విద్యా వ్యవస్థలో చెలరేగుతున్న వివాదాలు, పోటీ పరీక్షల్లో అక్రమాల ఆరోపణల నేపథ్యంలో కేంద్ర విద్యుత్‌, విద్యాశాఖ నిర్ణయాలకు వ్యతిరేకంగా విద్యార్థి సంఘాలు కదం తొక్కాయి. కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే తన పదవికి రాజీనామా చేయాలనే ప్రధాన డిమాండ్‌తో విద్యార్థి ఐక్యవేదికలు నేడు దేశవ్యాప్తంగా విద్యాసంస్థల బంద్‌కు పిలుపునిచ్చాయి. ఈ క్రమంలో రెండు తెలుగు రాష్ట్రాలైన ఆంధ్రప్రదేశ్, తెలంగాణలలో బంద్ ప్రభావం ఏ మేరకు ఉందనేది ఇప్పుడు సర్వత్రా ఆసక్తికరంగా మారింది.

ప్రైవేటు యాజమాన్యాల నిర్ణయం.. తల్లిదండ్రులకు మెసేజ్‌లు
ఈ బంద్ పిలుపు తీవ్రతను ముందే గ్రహించిన ఆంధ్రప్రదేశ్, తెలంగాణల్లోని మెజారిటీ ప్రైవేటు స్కూళ్లు, జూనియర్, డిగ్రీ కాలేజీలు ముందస్తు జాగ్రత్త చర్యలు చేపట్టాయి. విద్యార్థుల భద్రతను దృష్టిలో ఉంచుకుని నేడు విద్యాసంస్థలకు సెలవు ప్రకటిస్తున్నట్లు గురువారం రాత్రికే యాజమాన్యాలు తల్లిదండ్రుల మొబైల్ ఫోన్లకు సందేశాలు పంపాయి. దీంతో ఉదయమే బస్సుల కోసం వేచి చూసే శ్రమ తగ్గడంతో అటు విద్యార్థులు, ఇటు తల్లిదండ్రులు కొంత ఊపిరి పీల్చుకున్నారు.

ప్రభుత్వ పాఠశాలల పరిస్థితి ఏమిటి?
ప్రైవేటు సంస్థలు సెలవు ప్రకటించినప్పటికీ, ఆంధ్రప్రదేశ్‌లోని ప్రభుత్వ, ఎయిడెడ్ విద్యాసంస్థల విషయంలో అధికారులు స్పష్టత ఇచ్చారు. ఏపీలో సర్కారీ బడులు, కాలేజీలు యథాతథంగా కొనసాగుతాయని పాఠశాల విద్యాశాఖ వెల్లడించింది. మరోవైపు తెలంగాణలో ప్రభుత్వ విద్యాసంస్థలకు సంబంధించి విద్యాశాఖ నుంచి ఎలాంటి అధికారిక ప్రకటన వెలువడలేదు. అయితే, బంద్ ప్రభావం వల్ల రవాణా సౌకర్యాలు లేదా విద్యార్థి సంఘాల ఆందోళనలు తీవ్రమైతే స్థానిక పరిస్థితులకు అనుగుణంగా పాఠశాలల ప్రధానోపాధ్యాయులు నిర్ణయం తీసుకునే అవకాశముంది.

అసలు నిరసన ఎందుకు? విద్యార్థుల డిమాండ్లు ఇవే!
ఇటీవల జరిగిన పలు జాతీయ స్థాయి పోటీ పరీక్షల నిర్వహణలో చోటుచేసుకున్న అవకతవకలు, ప్రశ్నాపత్రాల లీకేజీ వ్యవహారాలు లక్షలాది మంది విద్యార్థుల భవిష్యత్తును ప్రశ్నార్థకంగా మార్చాయని విద్యార్థి నాయకులు ఆరోపిస్తున్నారు. బాధ్యత వహించాల్సిన కేంద్ర ప్రభుత్వం నిర్లక్ష్యంగా వ్యవహరిస్తోందని, ఈ విద్యా రంగాన్ని ప్రక్షాళన చేయడంలో విఫలమైన మంత్రి ధర్మేంద్ర ప్రధాన్ వెంటనే దిగిపోవాలని వారు పట్టుబడుతున్నారు. విద్యార్థుల భవిష్యత్తుతో ఆడుకోవద్దని, పారదర్శకమైన విద్యా విధానాన్ని తీసుకురావాలని డిమాండ్ చేస్తూ ఈ బంద్‌ను ఉధృతం చేస్తున్నారు.

Also Read: 26 రోజుల పోరాటానికి సుఖాంతం.. దీక్ష విరమించిన సోనమ్ వాంగ్‌చుక్ , అసలేం జరిగిందంటే?