Sircilla food: రాజన్న సిరిసిల్ల జిల్లా కేంద్రంలో ఆహార ప్రియులను తీవ్ర భయాందోళనకు గురిచేసే ఒక దిగ్భ్రాంతికరమైన ఘటన వెలుగు చూసింది. స్థానిక గాంధీచౌక్లోని ఒక ప్రముఖ స్వీట్ హౌస్లో కొనుగోలు చేసిన స్నాక్స్లో చనిపోయిన బల్లి ప్రత్యక్షం కావడం స్థానికంగా తీవ్ర కలకలం రేపింది. ఈ వార్త పట్టణంలో దావానలంలా వ్యాపించడంతో ప్రజలు ఒక్కసారిగా షాక్కు గురయ్యారు. హోటళ్లు, స్వీట్ స్టాళ్లలో తినుబండారాల తయారీ ఏ స్థాయిలో నిర్లక్ష్యంగా సాగుతోందో చెప్పడానికి ఈ ఘటనే ప్రత్యక్ష ఉదాహరణగా నిలిచింది.
ప్రశ్నిస్తే నిర్వాహకుల దురుసు ప్రవర్తన
వివరాల్లోకి వెళ్తే.. పట్టణానికి చెందిన అరుణ్ చంద్ అనే వినియోగదారుడు సదరు స్వీట్ హౌస్కు వెళ్లి బూందీ మిక్చర్, రింగ్స్ వంటి వివిధ రకాల స్నాక్స్ కొనుగోలు చేశాడు. ఎంతో ఇష్టంగా తిందామని ఇంటికి తీసుకెళ్లి ప్యాకెట్ విప్పి చూడగా, అందులో చనిపోయిన బల్లి కళేబరం కనిపించడంతో అతను కంగుతిన్నాడు. వెంటనే ఆ ప్యాకెట్ను తీసుకుని స్వీట్ హౌస్ నిర్వాహకులను నిలదీసేందుకు వెళ్లాడు. అయితే, తప్పు తెలుసుకుని క్షమాపణ చెప్పాల్సిన యజమాని, బాధితుడిపైనే నిర్లక్ష్యంగా సమాధానం ఇస్తూ, అత్యంత దురుసుగా ప్రవర్తించడం గమనార్హం. బాధ్యతారాహిత్యంగా వ్యవహరించిన సదరు నిర్వాహకుడి తీరుపై వినియోగదారులు తీవ్ర ఆగ్రహం వ్యక్తం చేస్తున్నారు.
వరుస ఘటనలతో వణుకుతున్న పట్టణ ప్రజలు
ఈ మధ్య కాలంలో సిరిసిల్లలో ఇలాంటి ఆహార కాలుష్య ఘటనలు పునరావృతం కావడం ప్రజలను మరింత ఆందోళనకు గురిచేస్తోంది. ఇటీవల కాలంలోనే పట్టణంలో పానీపూరి తిని దాదాపు 20 మందికి పైగా అస్వస్థతకు గురైన చేదు సంఘటనను మరిచిపోకముందే, ఇప్పుడు ఏకంగా స్వీట్ హౌస్ మిక్చర్లో బల్లి రావడం ప్రజల ఆరోగ్యాలతో ఎంతలా చెలగాటమాడుతున్నారో అద్దం పడుతోంది. పండగలు, శుభకార్యాల వేళ నమ్మకంతో కొనుగోలు చేసే పదార్థాల్లో ఇలాంటి ప్రమాదకరమైన కీటకాలు, జీవులు రావడం వల్ల ప్రజలు బయట ఫుడ్ తినాలంటేనే జంకుతున్నారు.
రంగంలోకి అధికారులు..
ఈ వ్యవహారంపై స్థానిక ఫుడ్ ఇన్స్పెక్టర్ అనూష స్పందిస్తూ.. ఈ ఘటన తమ దృష్టికి వచ్చిందని, ఆహార భద్రతా ప్రమాణాలను ఉల్లంఘించిన వారిపై కఠిన చర్యలు తీసుకుంటామని స్పష్టం చేశారు. అనంతరం రంగంలోకి దిగిన పోలీసులు, ఫుడ్ సేఫ్టీ అధికారులు సదరు స్వీట్ హౌస్లోని తయారీ కేంద్రాన్ని, అక్కడ నిల్వ ఉంచిన తినుబండారాలను క్షుణ్ణంగా పరిశీలించారు. ప్రాథమిక విచారణలో లోపాలు ఉన్నట్లు గుర్తించి, వినియోగదారుల ఆరోగ్యానికి ముప్పు కలిగించేలా వ్యవహరించిన స్వీట్ హౌజ్ యజమానిపై స్థానిక సీఐ కేసు నమోదు చేసినట్లు ప్రకటించారు. హోటళ్లు, బేకరీల యాజమాన్యాలు ఇప్పటికైనా శుభ్రత పాటించకపోతే కఠిన పరిణామాలు ఎదుర్కోవాల్సి వస్తుందని అధికారులు హెచ్చరిస్తున్నారు.
Share
Jahnavi Missing Case: జాహ్నవి మిస్సింగ్ కేసు.. పోలీసులు కీలక ప్రకటన, ఆచూకీ చెబితే లక్ష బహుమతి
బొద్దింకల ఉడుంపట్టు! ప్రధాన్ను తొలగించేదాకా ప్రధానిని వదిలేలా లేరు!
