వింత గ్రామం.. ఏదీ తాకకూడదు, గుడిలో ప్రవేశం నిషేధం, రాత్రి బసచేయకూడదు

ప్రపంచంలో ఎన్నో వింత ప్రదేశాలు, రహస్యాలు దాగిఉన్నాయి. అలాంటి ప్రదేశం మన దేశంలోనే ఉంది. హిమాచల్ ప్రదేశ్‌లోని మలానా గ్రామం దేశంలోనే అత్యంత ప్రత్యేకమైన గ్రామాల్లో ఒకటి. ఇది సముద్ర మట్టానికి సుమారు 8,700 అడుగుల ఎత్తులో ఉంటుంది. మలానా గ్రామం పార్వతి లోయ మధ్యలో ఉంది. ఈ గ్రామం ప్రకృతి అందాలతో పాటు విచిత్రమైన సంప్రదాయాలకు కూడా ప్రసిద్ధి చెందింది. ఇక్కడి నియమాలు సాధారణ పర్యాటక ప్రాంతాలకు పూర్తిగా భిన్నంగా ఉంటాయి.

శతాబ్దాల చరిత్రను కాపాడుకుంటున్న గ్రామం

మలానా గ్రామం ఎన్నో శతాబ్దాలుగా తన ప్రత్యేక సంస్కృతిని కాపాడుకుంటోంది. ఈ గ్రామాన్ని”హిమాలయాల చిన్న గ్రీస్” అని కూడా పిలుస్తారు. స్థానిక కథనాల ప్రకారం అలెగ్జాండర్ ది గ్రేట్ సైనికుల వారసులు ఇక్కడ నివసిస్తున్నారు. గ్రామ ప్రజలు జమ్లు దేవతను తమ దైవంగా ఆరాధిస్తారు. గ్రామ పరిపాలన ఇప్పటికీ సంప్రదాయ పద్ధతిలోనే కొనసాగుతోంది.

మలానాలో చూడాల్సిన ప్రత్యేక ఆకర్షణలు

గ్రామంలోని ఇరుకైన దారుల్లో నడుస్తూ పురాతన చెక్క ఇళ్ల అందాన్ని ఆస్వాదించవచ్చు. ఆ చెక్కలపై అందంగా చెక్కి ఉన్న డిజైన్లు ఈ ఇళ్ల ప్రత్యేకత. జమ్లు దేవత ఆలయం, రేణుకా దేవి ఆలయాలను బయట నుంచే చూడాలి. ఆలయాల చుట్టూ ఉన్న ప్రకృతి దృశ్యాలు పర్యాటకులను ఆకట్టుకుంటాయి. పార్వతి లోయలోని మంచు పర్వతాల అందాలు మరింత ప్రత్యేక అనుభూతిని ఇస్తాయి.

పర్యాటకులు తప్పనిసరిగా పాటించాల్సిన నియమాలు

మలానా గ్రామంలో స్థానిక సంప్రదాయాలకు అత్యంత ప్రాధాన్యం ఇస్తారు. గ్రామంలోని ఆలయాలు, ఇళ్లు, గోడలు లేదా ఇతర పవిత్ర ప్రదేశాలను తాకకూడదు. పొరపాటున తాకినా జరిమానా విధించే అవకాశం ఉంటుంది.
గ్రామంలోని ప్రధాన ప్రాంతంలో బయటి వ్యక్తులు రాత్రి బస చేయడానికి అనుమతి ఉండదు. పర్యాటకులు సాయంత్రానికి కసోల్ లేదా జారి ప్రాంతాలకు తిరిగి వెళ్లాలి.
స్థానిక ప్రజలు లేదా ఆలయాల ఫోటోలు తీయాలంటే ముందుగా అనుమతి తీసుకోవాలి. అనుమతి లేకుండా ఫోటోగ్రఫీ చేయడం మంచిది కాదు.

ప్రయాణానికి ముందు గుర్తుంచుకోవాల్సిన విషయాలు

మలానాలో ఏటీఎంలు లేవు. కాబట్టి ముందుగానే నగదు తీసుకెళ్లాలి. గ్రామంలో మొబైల్ నెట్‌వర్క్, ఇంటర్నెట్ సేవలు చాలా బలహీనంగా ఉంటాయి. స్థానిక దుకాణాల్లో వస్తువులు కొనుగోలు చేసే సమయంలో అక్కడి సంప్రదాయాలను గౌరవించాలి.

చట్టాలు తప్పకుండా పాటించాలి

గతంలో మలానా గ్రామం నుంచి ఎక్కువగా గంజాయి జరిగేది. అయితే ప్రస్తుతం భారతదేశంలో గంజాయి కలిగి ఉండటం, కొనడం లేదా అమ్మడం పూర్తిగా చట్టవిరుద్ధం. ఈ ప్రాంతంలో పోలీసులు తరచూ తనిఖీలు నిర్వహిస్తుంటారు. చట్టాన్ని ఉల్లంఘిస్తే కఠిన చర్యలు ఎదుర్కోవాల్సి ఉంటుంది.

ప్రయాణ కోసం ఇలా ప్లానింగ్ చేసుకోవాలి

చాలామంది పర్యాటకులు కసోల్ లేదా జారిలో బస చేస్తారు. అక్కడి నుంచి ఒకరోజు ట్రిప్‌గా మలానాను సందర్శిస్తారు. ఉదయం త్వరగా బయలుదేరి అవసరమైతే పోలీస్ చెక్‌పోస్ట్‌లో నమోదు చేసుకోవాలి. గ్రామాన్ని ప్రశాంతంగా సందర్శించి సాయంత్రానికి తిరిగి రావాలి. సమీపంలోని మణికరణ్ హాట్ స్ప్రింగ్స్‌ను కూడా ఈ ప్రయాణంలో చూడవచ్చు.

మలానా వెళ్లడానికి సరైన సమయం

ఏప్రిల్ నుంచి జూన్ వరకు వాతావరణం చల్లగా, ఆహ్లాదకరంగా ఉంటుంది. సెప్టెంబర్ నుంచి నవంబర్ వరకు పర్వతాల అందాలు మరింత ఆకర్షణీయంగా కనిపిస్తాయి. వర్షాకాలంలో కొండచరియలు విరిగిపడే ప్రమాదం ఉంటుంది కాబట్టి ఆ సమయంలో ప్రయాణం చేయకపోవడం మంచిది. చలికాలంలో భారీ మంచు కారణంగా ట్రెక్కింగ్ కష్టమవుతుంది.

Also Read: అరకు వ్యాలీ నుంచి వ్యాలీ ఆఫ్ ఫ్లవర్స్ వరకు.. వర్షాకాలంలో అందంగా కనిపించే 4 లోయ ప్రాంతాలు

మలానాకు ఎలా చేరుకోవాలి

మలానాకు సమీపంలోని విమానాశ్రయం భుంటర్ ఎయిర్ పోర్ట్ . అక్కడి నుంచి రోడ్డు మార్గంలో జారి చేరుకోవచ్చు. సమీపంలోని ప్రధాన రైల్వే స్టేషన్ చండీగఢ్. అక్కడ జారి ప్రాంతం నుంచి స్థానిక టాక్సీలో మలానా గేట్ చేరుకుని, అక్కడి నుంచి సుమారు నాలుగు కిలోమీటర్లు నడిచి గ్రామానికి చేరుకోవాలి.

ప్రత్యేక అనుభూతిని అందించే గ్రామం

మలానా సాధారణ పర్యాటక ప్రాంతం కాదు. ఇది ప్రాచీన సంస్కృతి, సంప్రదాయాలు, స్వయంపాలన వ్యవస్థను ఇప్పటికీ కాపాడుకుంటున్న అరుదైన గ్రామం. స్థానిక నియమాలను గౌరవిస్తూ సందర్శిస్తే, జీవితంలో మరచిపోలేని అనుభవాన్ని సొంతం చేసుకోవచ్చు.