వర్షాకాలం ప్రారంభమైన తర్వాత వేసవి వేడి నుంచి ఉపశమనం లభిస్తుంది. ఈ సీజన్లో ప్రయాణం చేయడం కూడా ఎంతో ఆహ్లాదకరంగా ఉంటుంది. వర్షాలతో కొండలు పచ్చదనంతో కళకళలాడుతాయి. జలపాతాలు ఉప్పొంగి ప్రవహిస్తాయి. చల్లని వాతావరణం ప్రయాణాన్ని మరింత ఆనందంగా మారుస్తుంది.
ఈ సీజన్లో చాలా పర్యాటక ప్రాంతాల్లో ఆఫ్ సీజన్ ఉంటుంది. అందువల్ల విమాన టికెట్లు, హోటళ్లు, రిసార్టులు, హోమ్స్టేలు సాధారణ ధరల కంటే 30 నుంచి 50 శాతం వరకు తక్కువగా లభిస్తాయి. తక్కువ ఖర్చుతో మంచి ట్రిప్ ప్లాన్ చేసుకోవడానికి ఇది సరైన సమయం.
చాలామంది గోవాను చలికాలంలో పర్యటనకు వెళ్తారు. కానీ మాన్సూన్లో గోవా మరింత ప్రశాంతంగా, పచ్చదనంతో కనిపిస్తుంది. జూన్ నుంచి సెప్టెంబర్ వరకు పర్యాటకుల సంఖ్య తగ్గుతుంది. దీంతో హోటళ్లు, బీచ్ రిసార్టులు తక్కువ ధరల్లో అందుబాటులో ఉంటాయి. ఈ కాలంలో దూద్సాగర్ జలపాతం అద్భుతంగా కనిపిస్తుంది. స్కూటీపై గ్రామాలు, బీచ్లు సందర్శించడం ప్రత్యేక అనుభూతిని ఇస్తుంది.
రాజస్థాన్లోని ఉదయ్పూర్ మాన్సూన్ సమయంలో ఎంతో ఆకర్షణీయంగా ఉంటుంది. ఈ సీజన్లో సరస్సు ఒడ్డున ఉన్న హోటళ్లు, హెరిటేజ్ హవేలీలు తక్కువ ధరల్లో లభిస్తాయి.
వర్షాల తర్వాత అరావళి కొండలు పచ్చగా మారుతాయి. పిచోలా, ఫతే సాగర్ సరస్సులు మరింత అందంగా కనిపిస్తాయి. సజ్జన్గఢ్ లేదా మాన్సూన్ ప్యాలెస్ నుంచి నగరాన్ని చూడడం మరపురాని అనుభవంగా ఉంటుంది.
నిశ్శబ్ద వాతావరణంలో విశ్రాంతి కోరుకునే వారికి పుదుచ్చేరి మంచి ట్రావెల్ డెస్టినేషన్. వర్షాకాలంలో పర్యాటకులు తక్కువగా ఉండటంతో బుటిక్ హోటళ్లు, కేఫ్లు తక్కువ ధరల్లో లభిస్తాయి. ఫ్రెంచ్ శైలిలోని రంగురంగుల వీధుల్లో నడవడం ఎంతో ఆహ్లాదకరంగా ఉంటుంది. ప్రొమెనేడ్ బీచ్ వద్ద సముద్ర అలలను ఆస్వాదిస్తూ కాఫీ తాగడం ప్రత్యేక అనుభూతినిస్తుంది.
ముంబై, పుణే సమీపంలోని లోనావాలా, కర్జత్ వర్షాకాలంలో ప్రకృతి అందాలతో మెరిసిపోతాయి. పచ్చని కొండలు, చిన్న జలపాతాలు, మంచుతో కప్పుకున్న లోయలు పర్యటకులను ఆకట్టుకుంటాయి.
భూషి డ్యామ్, కొండానా గుహలు, వ్యూ పాయింట్లు ఈ సమయంలో మరింత అందంగా కనిపిస్తాయి. వీకెండ్ కాకుండా వారం మధ్యలో వెళితే వసతి ఖర్చు కూడా తగ్గుతుంది.
కేరళలోని మున్నార్ మాన్సూన్లో అద్భుతమైన అందాలను సంతరించుకుంటుంది. పర్యాటకుల రద్దీ తక్కువగా ఉండటంతో రిసార్టులు, హోటళ్లు తక్కువ ధరల్లో దొరుకుతాయి.
టీ తోటలపై పడే వర్షపు చినుకులు మనసును హత్తుకుంటాయి. అట్టుకాడ్ జలపాతం ఈ సమయంలో పూర్తి వేగంతో ప్రవహిస్తుంది. ప్రకృతి ప్రేమికులకు ఇది అద్భుతమైన ప్రదేశం.
Also Read: రియల్ లైఫ్ జేమ్స్ బాండ్.. ఈ తేదీల్లో జన్మించిన వారు ఏదైనా కనిపెట్టేస్తారు
ప్రయాణ టికెట్లను ముందుగానే బుక్ చేసుకోవడం మంచిది. విమానయాన సంస్థల వర్షాకాలం ఆఫర్లపై దృష్టి ఉంచాలి. హోటళ్లకు బదులుగా హోమ్స్టేలు లేదా హాస్టళ్లను ఎంచుకుంటే ఖర్చు తగ్గుతుంది. సోమవారం నుంచి గురువారం మధ్యలో ట్రిప్ ప్లాన్ చేస్తే వసతి ధరలు మరింత తక్కువగా ఉంటాయి.
Share
MBBS Seats Increase: మెడికల్ విద్యార్థులకు తీపి కబురు.. 100 ఎంబీబీఎస్ సీట్లు పెంపు, సీట్లు ఓకే సౌకర్యాల మాటేంటి?
ఈ స్పీకర్స్ ఇంట్లో ఉంటే.. థియేటర్కి వెళ్లాల్సిన పనే లేదు!
