అధికారం పోయినా అహంకారం తగ్గలేదు.. రెచ్చగొడితే ఊరుకోం, కేటీఆర్‌పై బండి సంజయ్ ఫైర్

హుజూరాబాద్ ఎమ్మెల్యే క్యాంప్ ఆఫీస్‌పై జరిగిన దాడి ఘటన రాజకీయంగా పెను దుమారం రేపుతోంది. ఈ ఘటనపై కేంద్ర హోంశాఖ సహాయ మంత్రి బండి సంజయ్ తీవ్రస్థాయిలో విరుచుకుపడ్డారు. గురువారం రాత్రి కరీంనగర్ పట్టణంలో ఏర్పాటు చేసిన మీడియా సమావేశంలో ఆయన మాట్లాడుతూ బీఆర్ఎస్ నేతల వైఖరిని ఎండగట్టారు. ఎమ్మెల్యే కార్యాలయంపై దాడి జరిగిన విషయం తనకు కొంత ఆలస్యంగా తెలిసిందని వివరించారు. దాడులు చేయడం లేదంటే దౌర్జన్యాలకు దిగడం తమ సంస్కృతి కాదని స్పష్టం చేశారు.

ప్రస్తుతం అధికారం చేతిలో లేకపోయినా బీఆర్ఎస్ నాయకులు మితిమీరిన అహంకారంతో ప్రవర్తిస్తున్నారని బండి సంజయ్ మండిపడ్డారు. తమ పార్టీ కార్యకర్తలకు సహనం ఉంటుందని పేర్కొంటూనే.. ఆ ఓర్పును ఎవరైనా పిరికితనంగా భావిస్తే సహించేది లేదని హెచ్చరించారు. బీఆర్ఎస్ శ్రేణులు తమ పద్ధతి మార్చుకోకపోతే పరిణామాలు తీవ్రంగా ఉంటాయని హెచ్చరికలు జారీ చేశారు.

బీఆర్ఎస్ నాయకులు ఇప్పుడు చెబుతున్న నీతులు వింటుంటే విడ్డూరంగా ఉందని బండి సంజయ్ ఎద్దేవా చేశారు. గత పదేళ్ల కాలంలో ఆ పార్టీ సాగించిన అరాచకాలను రాష్ట్ర ప్రజలు ఇంకా మర్చిపోలేదని గుర్తు చేశారు. నాటి బీఆర్ఎస్ పాలన రజకార్ల అరాచకాలను తలపించిందని విమర్శించారు. తెలంగాణలో దాడుల సంస్కృతిని మొదలుపెట్టిందే ఆ పార్టీ అని దుయ్యబట్టారు. గతంలో తాను చేపట్టిన ప్రజా సంగ్రామ యాత్రను అడ్డుకునేందుకు బీఆర్ఎస్ శ్రేణులు అనేక అడ్డంకులు సృష్టించారని వివరించారు. ఆ సమయంలో పదుల సంఖ్యలో కార్లను ధ్వంసం చేయడమే కాకుండా మహిళా కార్యకర్తలపై సైతం దాడులకు తెగబడ్డారని గుర్తు చేశారు.

గతంలో చేసిన దౌర్జన్యాలను మర్చిపోయి ప్రస్తుతం సానుభూతి కోసం ప్రయత్నించడం హాస్యాస్పదమని బండి సంజయ్ పేర్కొన్నారు. ఎవరెలా ప్రవర్తిస్తున్నారో ప్రజలందరూ గమనిస్తున్నారని చెప్పారు. అహంకార పూరిత ధోరణిని వీడకపోతే భవిష్యత్తులో ఆ పార్టీ నేతలకు మరిన్ని ఇబ్బందులు తప్పవని హితవు పలికారు. హుజూరాబాద్ ఘటనను సాకుగా చూపి రాజకీయ ప్రయోజనం పొందాలని చూడటం సరికాదని హితవు పలికారు.

శాంతిభద్రతల విషయంలో రాజీ పడే ప్రసక్తి లేదని బండి సంజయ్ స్పష్టం చేశారు. బాధ్యులపై కఠిన చర్యలు తీసుకోవాలని డిమాండ్ చేశారు. దాడులకు పాల్పడే వారిని ఎట్టి పరిస్థితుల్లోనూ వదిలిపెట్టబోమని తేల్చి చెప్పారు. రాజకీయాల్లో విమర్శలు ప్రతి విమర్శలు సహజమని కానీ దౌర్జన్యాలకు తావుండకూడదని హితవు పలికారు. బీఆర్ఎస్ అగ్ర నాయకత్వం తమ కార్యకర్తలను నియంత్రించుకోవాలని సూచించారు. లేనిపక్షంలో ప్రజలే తగిన బుద్ధి చెబుతారని హెచ్చరించారు. రాష్ట్రంలో ప్రజాస్వామ్యబద్ధమైన పాలన సాగాలని ఆయన ఆకాంక్షించారు.

ALSO READ: రాష్ట్ర ప్రభుత్వం మహిళలకు భారీ కానుక.. రూ.10 లక్షల వరకు వడ్డీలేని రుణాలు