భారీ ఎండల నుంచి ఉపశమనం.. తెలుగు రాష్ట్రాల్లో మూడు రోజుల పాటు వర్షాలు!

ఎండ తీవ్రతతో అల్లాడుతున్న తెలుగు రాష్ట్రాల ప్రజలకు వాతావరణ శాఖ ఊరటనిచ్చే వార్త అందించింది. ఏపీతో పాటు తెలంగాణలో రాగల మూడు రోజుల పాటు వర్షాలు కురిసే అవకాశం ఉందని వెల్లడించింది. ప్రస్తుతం ఏర్పడిన ద్రోణి ప్రభావం వల్ల రెండు రాష్ట్రాల్లో అక్కడక్కడ జల్లులు పడతాయని అంచనా వేసింది. దక్షిణ అంతర్గత కర్ణాటక నుండి తమిళనాడు మీదుగా మున్నార్ గల్ఫ్ వరకు సముద్ర మట్టానికి 0.9 కిలోమీటర్ల ఎత్తులో ఈ ద్రోణి విస్తరించి ఉంది. దీని ఫలితంగా గురువారం నాడు తేలికపాటి నుండి మోస్తరు వర్షాలు కురుస్తాయని అధికారులు తెలిపారు. గంటకు 50 నుండి 60 కిలోమీటర్ల వేగంతో ఈదురు గాలులు వీచే అవకాశం ఉండటంతో ప్రజలు అప్రమత్తంగా ఉండాలని హెచ్చరించారు. ఉరుములు మెరుపులతో కూడిన వానలు పడటం వల్ల ఉష్ణోగ్రతలు కొంత తగ్గే వీలుంది.

శుక్రవారంతో పాటు శనివారం సైతం ఇదే విధమైన వాతావరణం కొనసాగుతుందని వాతావరణ కేంద్రం స్పష్టం చేసింది. ఒకటి రెండు చోట్ల ఉరుములతో కూడిన జల్లులు పడే వీలుంది. ఈదురు గాలుల తీవ్రత వల్ల వాతావరణం చల్లబడనుంది. దక్షిణ కోస్తా ఆంధ్ర ప్రాంతంలో గురు, శుక్ర, శనివారాల్లో తేలికపాటి వర్షాలు కురిసే అవకాశం ఉందని అధికారులు వివరించారు. వర్షాలు పడినా కూడా కొన్ని చోట్ల వేడి గాలి అలాగే తేమతో కూడిన అసౌకర్య వాతావరణం ఉంటుందని హెచ్చరించారు. రాయలసీమ జిల్లాల్లో గురువారం మోస్తరు వర్షాలు కురిసే సూచనలు కనిపిస్తున్నాయి. మిగిలిన రెండు రోజులు కూడా అక్కడక్కడ జల్లులు పడి భూమి చల్లబడే అవకాశం ఉంది.

తెలంగాణ రాష్ట్రంలోనూ వాతావరణ పరిస్థితులు వేగంగా మారుతున్నాయి. హైదరాబాద్ వాతావరణ కేంద్రం నివేదిక ప్రకారం ద్రోణి అస్థిరత కొనసాగుతోంది. రాష్ట్రంలోని పలు జిల్లాల్లో రాబోయే మూడు రోజుల పాటు తేలికపాటి వానలు పడతాయని నిపుణులు చెబుతున్నారు. పగటి ఉష్ణోగ్రతలు గరిష్ట స్థాయిలోనే నమోదైనప్పటికీ సాయంత్రం వేళల్లో వర్షాలు కురిసి ఉపశమనం కలిగిస్తాయి. కొన్ని జిల్లాల్లో బలమైన గాలులతో కూడిన పిడుగులు పడే ప్రమాదం ఉందని వాతావరణ శాఖ హెచ్చరించింది. అకాల వర్షాల వల్ల పంట నష్టం జరగకుండా రైతులు జాగ్రత్తలు తీసుకోవాలని సూచించింది. ఎండల ధాటికి ఇబ్బంది పడుతున్న జనాలకు ఈ వర్ష వార్త పెద్ద ఊరటగా మారింది. రానున్న వారం రోజుల్లో వాతావరణంలో మరిన్ని మార్పులు చోటు చేసుకునే అవకాశం కనిపిస్తోంది.

ALSO READ: కేబినెట్ భేటీ తర్వాత మంత్రులతో సీఎం చంద్రబాబు.. తాజా రాజకీయాలపై చర్చ, తిప్పికొట్టాలని సూచన