Google Chrome Android| గూగుల్ క్రోమ్ ఉపయోగించేవారికి షాకింగ్ వార్త. ఇకపై కొన్ని ఆండ్రాయిడ్ స్మార్ట్ ఫోన్ లలో క్రోమ్ పనిచేయదు. ఒకవేళ మీరు మీరు ఇంకా పాత ఆండ్రాయిడ్ ఫోన్ను ఉపయోగిస్తున్నారా? అది ఆండ్రాయిడ్ 8 (ఓరియో) లేదా ఆండ్రాయిడ్ 9 (పై) వెర్షన్లో నడుస్తుంటే.. అందులో మీరు గూగుల్ క్రోమ్ బ్రౌజర్ను ఉపయోగిస్తున్నట్లయితే.. ఇప్పుడే అప్గ్రేడ్ గురించి ఆలోచించడం మంచిది. ఎందుకంటే గూగుల్ కంపెనీ ఒక ముఖ్యమైన ప్రకటన చేసింది. 2025 ఆగస్టు మొదటి వారం నుండి, ఆండ్రాయిడ్ 8 మరియు 9 వెర్షన్లలో నడిచే ఫోన్లకు గూగుల్ క్రోమ్ అప్డేట్లను నిలిపివేస్తోంది. ఇకపై క్రోమ్.. ఆండ్రాయిడ్ 10 లేదా అంతకంటే ఉన్నత వెర్షన్ ఉన్న ఫోన్లలో మాత్రమే పనిచేస్తుంది.
ఈ మార్పు ఎప్పటి నుండి?
ఈ మార్పు క్రోమ్ 139 వెర్షన్తో.. ఆగస్టు 5, 2025 నుండి అమలులోకి వస్తుంది. ఆండ్రాయిడ్ 8, 9 ఉపయోగించే వారికి క్రోమ్ 138 అనేది చివరి వెర్షన్ అవుతుంది. ఈ పాత వెర్షన్ కొంతకాలం పనిచేసినప్పటికీ, ఇకపై దానికి కొత్త అప్డేట్లు, భద్రతా పరిష్కారాలు లేదా కొత్త ఫీచర్లు రావు.
మీ ఫోన్ ఆండ్రాయిడ్ 8 లేదా 9లో ఉంటే.. క్రోమ్ ఒక్కసారిగా పనిచేయడం ఆగిపోదు. కానీ ఇకపై అప్డేట్లు రావు. దీనివల్ల మీ బ్రౌజర్లో సమస్యలు లేదా భద్రతా లోపాలు రావచ్చు. మీరు ఇంటర్నెట్లో ఎక్కువగా బ్రౌజ్ చేస్తే లేదా ఆన్లైన్లో ముఖ్యమైన పనులు (బ్యాంకింగ్, షాపింగ్) చేస్తే.. ఈ లోపాలు మీకు ప్రమాదకరంగా ఉండవచ్చు.
గూగుల్ తమ సపోర్ట్ పేజీలో చేసిన ప్రకటన ఇలా ఉంది..
“ఆండ్రాయిడ్ 8.0 లేదా 9.0 ఉపయోగించే వారు ఆండ్రాయిడ్ 10.0 లేదా అంతకంటే ఉన్నత వెర్షన్కు అప్గ్రేడ్ చేయాలి, తద్వారా క్రోమ్ అప్డేట్లను పొందవచ్చు.”
ప్రభావం ఏంటి?
2025 ఏప్రిల్ డేటా ప్రకారం.. ఆండ్రాయిడ్ ఫోన్లలో 6 శాతం ఆండ్రాయిడ్ 9ని, 4 శాతం ఆండ్రాయిడ్ 8 లేదా 8.1ని ఉపయోగిస్తున్నాయి. అంటే, సుమారు 10 శాతం ఆండ్రాయిడ్ యూజర్లు ఈ మార్పు వల్ల క్రోమ్.. కొత్త ఫీచర్లు, భద్రతా అప్డేట్లను కోల్పోతారు.
ఏం చేయాలి?
మీ ఫోన్ ఆండ్రాయిడ్ 8 లేదా 9లో నడుస్తుంటే.. ఇప్పుడే చర్య తీసుకోవడం మంచిది. మీ ఫోన్ ఆండ్రాయిడ్ 10 లేదా అంతకంటే ఉన్నత వెర్షన్కు అప్గ్రేడ్ చేయగలిగితే, వెంటనే అప్డేట్ చేయండి. అది సాధ్యం కాకపోతే, కొత్త ఫోన్ కొనుగోలు గురించి ఆలోచించండి. ఇది మీ బ్రౌజింగ్ను సురక్షితంగా ఉంచడానికి, ఆధునిక ఫీచర్లను ఆస్వాదించడానికి సహాయపడుతుంది.
ఎందుకు ఈ మార్పు?
సాంకేతిక రంగంలో, కంపెనీలు పాత సాఫ్ట్వేర్లకు మద్దతు నిలిపివేయడం సాధారణం. ఆండ్రాయిడ్ 8, 9 ఇప్పుడు చాలా పాతవి. వీటితో నడిచే ఫోన్లు కొత్త టెక్నాలజీ అవసరాలను తీర్చలేవు. క్రోమ్ను ఆధునికంగా, సురక్షితంగా ఉంచడానికి గూగుల్ ఈ నిర్ణయం తీసుకుంది. కానీ, ఈ మార్పు మీ ఫోన్ను ప్రభావితం చేస్తే, ఇక కొత్త ఫోన్ కొనల్సిందేనని అర్థం చేసుకోవాలి.
Also Read: మీ వద్ద పాత ఐఫోన్లు ఉన్నాయా? ఈ మోడల్స్కు కోట్లలో రిసేల్ విలువ!
ఆండ్రాయిడ్ 8 లేదా 9లో నడిచే ఫోన్లలో గూగుల్ క్రోమ్కు ఆగస్టు 2025 నుండి అప్డేట్లు ఉండవు. అయినా క్రోమ్ వెంటనే పనిచేయడం ఆగిపోదు. కానీ భద్రత, కొత్త ఫీచర్లు మిస్ అవుతాయి. మీ ఫోన్ ఈ జాబితాలో ఉందో లేదో తనిఖీ చేయండి. సురక్షితమైన, ఆధునిక బ్రౌజింగ్ కోసం.. ఆండ్రాయిడ్ 10 లేదా అంతకంటే ఉన్నత వెర్షన్కు అప్గ్రేడ్ చేయడం లేదా కొత్త ఫోన్ కొనడం గురించి ఆలోచించండి. వెంటనే నిర్ణయం తీసుకోండి.. కొత్త ఫోన్ కొనాలో లేదో తెలుసుకోండి.
Share
Telugu States Weather Update: దూసుకోస్తున్న నైరుతి.. ఏ ఏ జిల్లాల్లో భారీ వర్షాలంటే..!
Mutton Gravy Recipe: బోనాల స్పెషల్ మటన్ గ్రేవీ.. ఇలా చేస్తే ఎవ్వరైవా మీ వంటకు ఫిదా అవ్వాల్సిందే !
