Cool Home: వేసవి కాలం వస్తే చాలు ఏసీలు, కూలర్లు లేనిదే క్షణం గడవని పరిస్థితి. జూన్ నెల ఎంటర్ అయినప్పటికీ దేశంలో భానుడి భగ భగలు ఇంకా కొనసాగుతున్నాయి. ముఖ్యంగా దేశ రాజధాని దిల్లీలో ఎండలు మరింత ఉక్కపోతను కలిగిస్తున్నాయి. అయితే అంతటి వేడిలోనూ అక్కడి ఓ ఇల్లు.. ఎలాంటి ఏసీలు, కూలర్లు లేకుండానే చల్లగా దర్శనమిస్తోంది. 40 ఏళ్లుగా ఏసీ, కూలర్ తో పనిలేకుండా అనిత, విజయ్ దంపతులు.. హాయిగా జీవిస్తున్నారు. ఇంతకీ వారి ఇంటి ప్రత్యేకత, స్మార్ట్ డిజైన్ ఏంటో ఈ కథనంలో చూద్దాం.
ఇంటిని సంప్రదాయ నిర్మాణ శైలిలో నిర్మించుకోవడమే.. ఈ చల్లదనానికి కారణమని దిల్లీకి చెందిన అనిత, విజయ్ దంపతులు స్పష్టం చేస్తున్నారు. 4 దశాబ్దాలుగా బయటి కంటే 10 డిగ్రీల తక్కువ ఉష్ణోగ్రత ఇంట్లో నమోదవుతోందని వారు పేర్కొన్నారు. చలి, ఎండ, వర్షం అన్ని వేళలా ఒకటే టెంపరేచర్ ఇంట్లో మెయిన్ టెన్ అవుతోందని తెలియజేస్తున్నారు. ప్రకృతిలో మమేకమవుతూ వారు నిర్మించుకున్న ఈ ఇంటి డిజైన్ ప్రస్తుతం అందరి దృష్టిని ఆకర్షిస్తోంది.
ఇక ఇంటి నిర్మాణం విషయానికి వస్తే.. పాతకాలపు ఇళ్ల తరహాలో ఇంటి పరిసరాల్లో ఖాళీ స్థలాన్ని ఏర్పాటు చేశారు. దాని గుండా గాలి వెలుతురు లోపలికి వస్తూ.. వేడి గాలి ఆటోమేటిగ్గా బయటకు వెళ్లిపోతుంది. ఇంటి ఆవరణలోని ఖాళీ ప్రదేశంలో మెుక్కలు, చెట్లు పెంచడం వల్ల కిటికీలు, తలుపుల గుండా నిత్యం చల్లటి గాలి వీస్తున్నట్లు దంపతులు తెలిపారు. పైకప్పు నుండి వేడి లోపలికి రాకుండా ప్రత్యేక ఇన్సులేషన్ పద్ధతులను ఉపయోగించినట్లు పేర్కొన్నారు.
తమ ఇల్లు చల్లదనాన్ని ఇవ్వడమే కాకుండా పర్యావరణానికి కూడా ఎంతో మేలు చేస్తుందని దంపతులు తెలియజేస్తున్నారు. ఆధునిక కాలంలో ప్రతి ఒక్కరూ అలవర్చుకోవాల్సిన ఎన్నో అద్భుతాలు ఇక్కడ ఉన్నాయని వారు పేర్కొంటున్నారు. ఇంటి మేడపై కూడా చెట్లను పెంచడం వల్ల అదనపు కూలింగ్ వస్తోందని వారు తెలిపారు. విద్యుత్ అవసరాల కోసం పూర్తిగా సౌరశక్తిపై ఆధారపడటం వల్ల కరెంట్ బిల్లుల భారం తగ్గడమే కాకుండా కాలుష్యం కూడా కంట్రోల్ అవుతోందని అన్నారు.
Also Read: లోకల్ బస్సు ఎక్కితే.. దుబాయికి టికెట్ కొట్టాడు.. బిత్తరపోయిన ప్యాసింజర్!
మరోవైపు వర్షపు నీటిని నిల్వ చేసే వ్యవస్థను సైతం ఇంట్లో ఏర్పాటు చేసుకున్నట్లు అనిత, విజయ్ దంపతులు తెలిపారు. ఆకాశం నుండి పడే ప్రతి వాన చుక్కను వృథా చేయకుండా భూగర్భంలోకి పంపేలా ఏర్పాటు చేసుకున్నట్లు పేర్కొన్నారు. అలాగే ఇంట్లో వచ్చే తడి చెత్తను పారేయకుండా మొక్కలకు మేలైన సేంద్రియ ఎరువుగా మారుస్తున్నట్లు చెప్పారు. మెుత్తంగా పర్యావరణానికి హాని చేస్తూ బతకడం కంటే.. ప్రకృతితో కలిసి జీవించడం ఎంత సుఖవంతమో ఈ ఇల్లు నిరూపిస్తోంది. సాంకేతికతపై మాత్రమే ఆధారపడకుండా సరైన నిర్మాణ పద్ధతులను పాటిస్తే వేసవి తాపాన్ని సులువుగా జయించవచ్చని అనిత, విజయ్ దంపతుల ఇల్లు అందరికీ నేర్పుతోంగని నిపుణులు అంటున్నారు.
Also Read: BSNLకు హైకోర్టు బిగ్ షాక్.. ఏకంగా రూ.55 లక్షల జరిమానా.. అసలేం జరిగిందంటే?
Share
E85 Fuel: సామాన్యుడి జేబుకు ఊరటనిచ్చేలా.. కేంద్రం గుడ్ న్యూస్..?
ఏసీ బిల్లును సగానికి తగ్గించే ‘20 డిగ్రీల నియమం’.. ఇదెలా పనిచేస్తుందంటే?
