ASUS Laptop Repair: ఎక్కువగా ల్యాప్టాప్ వాడుతున్నప్పుడు అది ఎప్పుడు ఎలాంటి రిపేరుకు వస్తుందో చెప్పలేం. స్క్రీన్ పగిలిపోవడం, బ్యాటరీ పాడవ్వడం లేదా కీబోర్డ్ సరిగ్గా పనిచేయకపోవడం లాంటి సమస్యలు ఎప్పుడైనా రావచ్చు. అయితే, సర్వీస్ సెంటర్కు వెళ్లేముందు ఖర్చు ఎంతవుతుందో? అనే టెన్షన్ అందరిలోనూ ఉంటుంది. ఈ సమస్యకు చెక్ పెడుతూ ప్రముఖ టెక్ బ్రాండ్ ఆసస్ (ASUS) ఒక సరికొత్త ఆన్లైన్ టూల్ను అందుబాటులోకి తెచ్చింది.
ఆసస్ సంస్థ తమ కస్టమర్ల కోసం Part Price Checker అనే కొత్త ఆన్లైన్ ఫీచర్ను లాంచ్ చేసింది. దీని ద్వారా వినియోగదారులు సర్వీస్ సెంటర్కు వెళ్లకముందే, తమ ల్యాప్టాప్కు మార్చాల్సిన ఒరిజినల్ స్పేర్ పార్ట్స్ ధరలు ఎంతో ఇంట్లోనే కూర్చుని తెలుసుకోవచ్చు. దీనివల్ల రిపేర్ ఖర్చులపై కస్టమర్లకు ముందే ఒక స్పష్టత వస్తుంది.
సాధారణంగా ల్యాప్టాప్ పాడైతే సర్వీస్ సెంటర్కు తీసుకెళ్లే వరకు ఎంత బిల్లు అవుతుందో ఎవరికీ అర్థం కాదు. కొన్నిసార్లు అనుకున్నదానికంటే ఎక్కువ ఖర్చు చెప్పడంతో కస్టమర్లు ఇబ్బంది పడుతుంటారు. ఆసస్ తీసుకొచ్చిన ఈ కొత్త విధానం వల్ల ఆ అస్పష్టత తొలగిపోతుంది. కంపెనీ అధికారిక ధరలు నేరుగా ఆన్లైన్ లోనే కనిపించడం వల్ల రిపేర్ ప్రాసెస్లో పారదర్శకత పెరుగుతుంది.
ఈ ఆన్లైన్ టూల్ను ఉపయోగించడం చాలా సులభం. దీనికోసం ఎలాంటి యాప్ డౌన్లోడ్ చేయాల్సిన అవసరం లేదు, అకౌంట్ క్రియేట్ చేయాల్సిన పని కూడా లేదు. ఆసస్ ల్యాప్టాప్ వెనుక ఉండే ‘సీరియల్ నంబర్’ను కంపెనీ వెబ్సైట్లోని నిర్దేశిత పేజీలో ఎంటర్ చేస్తే సరిపోతుంది. ఆ నంబర్ వెరిఫై అవ్వగానే.. ఆ మోడల్కు సంబంధించిన డిస్ప్లే, బ్యాటరీ, కీబోర్డ్ వంటి ఒరిజినల్ పార్ట్స్ ధరల వివరాలు స్క్రీన్పై కనిపిస్తాయి.
ఈ సదుపాయం వల్ల ల్యాప్టాప్ను రిపేర్ చేయించుకోవడం లాభమా లేక కొత్తది కొనుక్కోవడం మంచిదా అనే విషయాన్ని కస్టమర్లు ముందే నిర్ణయించుకోవచ్చు. అలాగే రిపేర్ ఖర్చులకు తగ్గట్టుగా బడ్జెట్ను ముందే ప్లాన్ చేసుకోవడానికి ఇది ఎంతగానో సహాయపడుతుంది. కస్టమర్ సర్వీస్ అనుభవాన్ని మరింత మెరుగుపరచడానికే ఆసస్ ఈ నిర్ణయం తీసుకుంది.
Also Read: 6000mAh బ్యాటరీ, ఆండ్రాయిడ్ 16 ఓఎస్తో సరికొత్త 5G ఫోన్.. ధర తెలిస్తే వెంటనే కొనేస్తారు!
Share
అండర్వరల్డ్ డాన్గా మారే కబడ్డీ ఆటగాడు... ఈ సిరీస్ స్ట్రీమింగ్ తెలుగులోనే
Nuvvu leka Nenu lenu Radha : ' నువ్వు లేక నేను ' రాధ ఏం చదివిందో తెలుసా..?
