లిఫ్టులో పెంపుడు కుక్క బీభత్సం.. హడలిపోయిన బాలికలు.. వీడియో వైరల్!

Dog Attack: ముంబయిలోని ‘శేత్ ఐరిన్’ హైరైజ్ రెసిడెన్షియల్ టవర్‌లో భయానక ఘటన చోటుచేసుకుంది. లిఫ్ట్‌లోకి తీసుకెళ్లిన ఒక పెంపుడు కుక్క ఒక్కసారిగా బీభత్సం సృష్టించింది. లోపలే ఉన్న ముగ్గురు చిన్న పిల్లలపైకి దాడికి యత్నించింది. ఈ దృశ్యాలన్నీ సీసీటివి కెమెరాలో రికార్డు కాగా.. అవి ప్రస్తుతం వైరల్ అవుతున్నాయి.

వైరల్ దృశ్యాలను పరిశీలిస్తే.. ముగ్గురు బాలికలు అప్పటికే లిఫ్ట్‌ లోపల ఉండగా ఒక మహిళ తన పెంపుడు కుక్కతో కలిసి లోపలికి ప్రవేశించింది. అయితే ఆ కుక్క నోటికి ‘మజిల్’ (నోరు తెరవకుండా కట్టే బెల్ట్) ఉన్నప్పటికీ అది వారిపై దాడికి యత్నించింది. లిఫ్ట్ తలుపులు మూసుకున్న కొద్దిసేపటికే ఆ కుక్క అకస్మాత్తుగా బాలికలపైకి దూకడానికి యత్నించింది. దీంతో బాలికలు తీవ్ర భయాందోళనలకు గురయ్యారు.

బాలికలపైకి ఎగబడుతున్న క్రమంలో యజమాని వారించినా కుక్క కంట్రోల్ కాలేదు. గొలుసు పట్టుకొని వెనక్కి లాగేందుకు ప్రయత్నించినా.. అది బాలికల వైపునకు దూసుకెళ్లింది. ఈ క్రమంలో లిఫ్ట్ ఆగగానే ఇద్దరు బాలికలు వెంటనే బయటకు పరుగులు తీశారు. అయితే మరో బాలిక మాత్రం లోపలే చిక్కుకుపోయింది. దీంతో ఆమె వైపు కుక్క దూసుకెళ్లింది. అప్పుడు కూడా యజమాని దానిని ఆపడానికి శతవిధాలా ప్రయత్నించింది. కానీ వల్ల కాలేదు.

కుక్క ఎగబడుతున్న క్రమంలోనే లిఫ్ట్ ఆ బాలిక దిగాల్సిన ఫ్లోర్‌కు చేరుకుంది. దీంతో బాలిక ఒక్కసారిగా ప్రాణ భయంతో బయటకు పరిగెత్తింది. ఆ సమయంలో కూడా కుక్క ఆమెను తరుముకుంటూ వెళ్లడానికి యత్నించడం వీడియో చూడవచ్చు. అయితే యజమాని గట్టిగా పట్టుకొని వెనక్కి లాగడంతో.. మూడో బాలిక కూడా సురక్షితంగా బయటపడింది.

Also Read: జియో క్యూ1 రిజల్ట్స్.. భారీగా పెరిగిన లాభాలు.. రికార్డు స్థాయిలో కస్టమర్లు!

ఈ ఘటనలో బాలికలు ఎలాంటి గాయాలు లేకుండా బయటపడటంతో అపార్ట్ మెంట్ వాసులతో పాటు నెటిజన్లు ఊపిరిపీల్చుకుంటున్నారు. దీనిపై స్థానిక పోలీసులు స్పందిస్తూ.. ‘ఈ ఘటనపై ఎలాంటి ఫిర్యాదు నమోదు కాలేదు. సదరు యజమానికి తన పెంపుడు కుక్కను లిఫ్ట్‌లో తీసుకెళ్లడానికి సొసైటీ అనుమతి ఉంది. అయితే ఈ వీడియో వైరల్ కావడంతో అపార్ట్‌మెంట్ నివాసితులలో కొంత ఆందోళన నెలకొంది’ అని తెలిపారు.

CCTV from Mumbai Malad West lift: Pet dog suddenly lunges aggressively at 3 young girls. Owner struggles to restrain it on leash as kids panic. No serious injuries, but sparks debate on pet control in shared spaces. pic.twitter.com/wvzhIwAM0y

— Ghar Ke Kalesh (@gharkekalesh) July 17, 2026