Sabarimala Forest: శబరిమల వెళ్లే అయ్యప్ప భక్తులకు బిగ్ అలర్ట్.. అటువైపు వెళ్లొద్దని హెచ్చరిక

Sabarimala Forest: శబరిమల అయ్యప్ప స్వామిని దర్శించుకునేందుకు వచ్చే భక్తులకు కేరళ అటవీ శాఖ ఒక ముఖ్యమైన హెచ్చరిక జారీ చేసింది. స్వామి సన్నిధానానికి సమీపంలో ఉండే ఉరళ్‌కుళి జలపాతం వద్దకు భక్తులు వెళ్లవద్దని అధికారులు స్పష్టం చేశారు. వరుసగా ఈ ప్రాంతంలో జరుగుతున్న ప్రమాదాలు, వన్యప్రాణుల సంచారం కారణంగా ఈ నిర్ణయం తీసుకున్నారు. భక్తుల భద్రతను దృష్టిలో ఉంచుకుని అటవీ శాఖ ఈ మేరకు ఒక అధికారిక ప్రకటనను విడుదల చేసింది. కఠిన నియమాలు, నియంత్రణలతో కూడిన ఈ యాత్రలో భక్తులు అధికారుల సూచనలను తప్పక పాటించాలని కోరారు.

అయితే అయ్యప్ప క్షేత్రం దట్టమైన అరణ్య ప్రాంతంలో ఉండడం వల్ల ఉరళ్‌కుళి జలపాతం వద్ద ఏ క్షణమైనా ప్రమాదం జరిగే అవకాశం ఉంది. అడవి జంతువులు, ముఖ్యంగా ఏనుగుల గుంపులు ఈ ప్రాంతంలో ఎక్కువగా సంచరిస్తుంటాయి. అవి అకస్మాత్తుగా భక్తులకు తారసపడితే ప్రాణాపాయం సంభవించే అవకాశం ఉంది. ఈ ముప్పును నివారించేందుకు, భక్తుల రక్షణ కోసం ఈ నిషేధాన్ని అమలు చేస్తున్నారు.

ఉరళ్‌కుళి జలపాతం అయ్యప్ప సన్నిధానానికి అటవీ మార్గంలో వెళ్లే భక్తులకు దగ్గరగా ఉంటుంది. పవిత్ర పంబానది జలాలను పోలినట్లుగా కనిపించే ఈ జలపాతం వద్ద కొందరు భక్తులు స్నానం చేసి స్వామిని దర్శించుకునేందుకు వెళుతుంటారు. ఈ జలపాతం పండితవాళానికి సుమారు 400 మీటర్ల దూరంలో ఉంది. ఈ ప్రదేశం చూడడానికి ఆకర్షణీయంగా ఉన్నప్పటికీ, దీనికి చేరుకునే మార్గం అత్యంత ప్రమాదకరంగా ఉంటుంది. జలపాతానికి వెళ్లే మార్గం జారే స్వభావం కలిగి ఉండడం వల్ల ఇటీవల తరచూ భక్తులు జారిపడి గాయాలపాలవడం, కొన్ని సందర్భాలలో తీవ్ర ప్రమాదాలు జరగడం వంటివి చోటుచేసుకున్నాయి.

ముఖ్యంగా, సాయంత్రం వేళల్లో జంతువుల కదలికలు ఎక్కువగా ఉంటాయి కాబట్టి, ఆ సమయాల్లో భక్తులు తప్పనిసరిగా ఈ జలపాతానికి, ఆ మార్గానికి దూరంగా ఉండాలని అధికారులు గట్టిగా సూచించారు. భక్తులు తమ యాత్రను సురక్షితంగా కొనసాగించడానికి ఈ నియమాన్ని పాటించడం అత్యవసరం.

Also Read: తెలంగాణలో గురువారం నుంచే.. తొలి విడత సర్పంచ్ ఎన్నికలు

కేరళ అటవీ శాఖ ఈ ఆదేశాలను కేవలం హెచ్చరికల రూపంలోనే కాకుండా, చట్టపరమైన అంశంగానూ పరిగణించింది. ఈ ప్రాంతంలోకి ప్రవేశం అనేది వన్యప్రాణుల సంరక్షణ చట్టం కింద పూర్తి నిషేధం విధించబడింది. ఈ నియమాన్ని ఉల్లంఘించిన వారిపై చట్ట ప్రకారం చర్యలు తీసుకునే అవకాశం కూడా ఉంది. భక్తులు నిషేధిత ప్రాంతంలోకి ప్రవేశించకుండా నిరోధించడానికి, భద్రతను పర్యవేక్షించడానికి అటవీ శాఖ అధికారులు, పోలీసుల సిబ్బంది ఆ ప్రాంతంలో గస్తీని పెంచారు. ఎటువంటి అవాంఛనీయ సంఘటనలు జరగకుండా జాగ్రత్తలు తీసుకుంటున్నారు.