Ayushman Bharat Scheme: కుటుంబం మొత్తానికి ఫ్రీగా రూ.5 లక్షల ఆరోగ్య బీమా.. కేంద్ర ప్రభుత్వ సూపర్ స్కీమ్

Ayushman Bharat Scheme: ప్రస్తుతం ఆరోగ్య బీమా ప్రతి ఒక్కరికీ అవసరం. వైద్య ఖర్చులు పెరుగుతున్న నేపథ్యంలో కేంద్ర ప్రభుత్వం పేద, మధ్య తరగతి కుటుంబాలకు ఏటా రూ.5,00,000 ఆరోగ్య బీమా అందిస్తుంది. 70 సంవత్సరాలు దాటిన పేద, మధ్య తరగతి వాళ్లు ఆయుష్మాన్ భారత్- PMJAY కింద ఆరోగ్య బీమా కార్డు పొందవచ్చు. ఆయుష్మాన్ భారత్.. రూ.5,00,000 ఫ్యామిలీ ఫ్లోటర్ ఆరోగ్య బీమా స్కీమ్. ఇందులో ఆసుపత్రిలో చేరడం, శస్త్రచికిత్సలు, ఐసీయూ, మందులు కవర్ అవుతాయి. ప్రభుత్వ, ఆయుష్మాన్ భారత్ లో చేరిన ప్రైవేట్ ఆసుపత్రులలో ఈ పథకం కింద ఉచితంగా వైద్యం చేయించుకోవచ్చు. ఎలాంటి ప్రీమియం కట్టక్కర్లేదు.

అర్హులు, అనర్హులు

ప్రధానమంత్రి జన ఆరోగ్య యోజన పథకం కింద ఆయుష్మాన్ భారత్ కార్డులను జారీ చేస్తారు. ఇది ఫ్యామిలీ హెల్త్ కార్డు. ఈ కార్డుతో 70 ఏళ్లు పై బడిన కుటుంబ సభ్యులు ఏడాదికి రూ.5 లక్షల వరకు క్యాష్ లెస్ ట్రీట్మెంట్ పొందవచ్చు. భూమి లేని పేదలు, గిరిజనులు, భిక్షాటన చేసే నిరుపేదలు, ఎలాంటి ఆశ్రయం లేని కుటుంబాలు, మ్యానువల్ స్కావెంజర్లు, కార్మికులు ఈ స్కీమ్ కు అర్హులు

దారిద్య్ర రేఖకు ఎగువ ఉన్నవారు, ఆదాయపు పన్ను కట్టేవాళ్లు, నిర్దిష్ట పరిమితి కంటే ఎక్కువ భూమి కలిగి ఉన్న కుటుంబాలు, ప్రభుత్వ ఉద్యోగులు, ఒకటి కంటే ఎక్కువ గదులతో పక్కా ఇళ్లు కలిగిన కుటుంబాలు, మోటారు వాహనాలు, వ్యవసాయ యంత్రాలు లేదా ఫిషింగ్ బోట్లు కలిగి ఉన్న కుటుంబాలు ఆయుష్మాన్ భారత్ కు అనర్హులు.

దరఖాస్తుకు అవసరమైన పత్రాలు

1. వయస్సు & గుర్తింపు రుజువు (ఆధార్ కార్డ్ / పాన్ కార్డ్)
2. చిరునామా రుజువు
3. సంప్రదింపు వివరాలు (మొబైల్, ఇ-మెయిల్)
4. కుల ధృవీకరణ పత్రం
5. ఆదాయ ధృవీకరణ పత్రం
6. కుటుంబం ప్రస్తుత స్థితిని తెలిపే రుజువు