మీ ఇంటి గార్డెన్‌లో అందమైన గులాబీ వనం.. వర్షాకాలంలో ఈ 5 రకాల గులాబీ మొక్కలు పెంచండి

Best rose varieties for monsoon: ఇంట్లో అందమైన గార్డెన్ పెంచడానికి వర్షాకాలం అనుకూలమైన సీజన్. ఈ సమయంలో నేలలో తగినంత తేమ ఉంటుంది. దీంతో తోటలో మొక్కల వేర్లు బలంగా పెరుగుతాయి. గులాబీ మొక్కలు కూడా ఈ కాలంలో బాగా పెరిగి అందమైన పూలు పూస్తాయి. మీ ఇంటి బాల్కనీ, టెర్రస్ లేదా తోటను రంగురంగుల పూలతో అలంకరించాలనుకుంటే, సరైన గులాబీ రకాన్ని ఎంచుకోవడం చాలా ముఖ్యం.

1. తక్కువ సంరక్షణతో ఎక్కువ పూలు ఇచ్చే దేశీ గులాబీ

దేశీ గులాబీ పెంచడం చాలా సులభం. ఈ మొక్కకు ఎక్కువ సంరక్షణ అవసరం ఉండదు. వర్షాకాలాన్ని బాగా తట్టుకుని వేగంగా పెరుగుతుంది. దీని పూలు మంచి సువాసన వెదజల్లుతాయి. బలమైన వేర్లు ఉండటంతో ఈ మొక్క తరచూ పూలను ఇస్తుంది. తోటపనిని కొత్తగా ప్రారంభించే వారికి ఇది మంచి ఎంపిక.

2. ఫ్లోరిబండా గులాబీ.. తోటకు అందం తెచ్చే గుత్తులు

ఫ్లోరిబండా గులాబీ ఒకే కొమ్మపై అనేక పూలను పూయిస్తుంది. అందువల్ల మొక్క చాలా ఆకర్షణీయంగా కనిపిస్తుంది. వర్షాకాలంలో కూడా ఇది చక్కగా పెరుగుతుంది. ఎరుపు, పసుపు, గులాబీ, తెలుపు వంటి అనేక రంగుల్లో ఈ రకం లభిస్తుంది. తోటలో రంగుల అందాన్ని పెంచాలనుకునే వారికి ఇది మంచి ఎంపిక.

3. మినియేచర్ గులాబీ.. చిన్న ప్రదేశాలకు సరైన రోజ్

ఇంట్లో స్థలం తక్కువగా ఉంటే మినియేచర్ గులాబీని ఎంచుకోవచ్చు. చిన్న కుండీల్లో కూడా ఇది సులభంగా పెరుగుతుంది. బాల్కనీ, టెర్రస్ గార్డెన్‌లకు ఇది చాలా అనుకూలంగా ఉంటుంది. రోజుకు 4 నుంచి 5 గంటలు సూర్యరశ్మి అందితే ఈ మొక్క నిరంతరం పూలతో కళకళలాడుతుంది.

4. హైబ్రిడ్ టీ గులాబీ.. పెద్ద సైజ్ రోజా పూలతో ప్రత్యేక ఆకర్షణ

పెద్ద సైజులో అందమైన పూలు ఇష్టపడేవారికి హైబ్రిడ్ టీ గులాబీ సరైన ఆప్షన్. ఈ పూలు ఎక్కువ రోజులు తాజాగా ఉంటాయి. అందమైన వెరైటీ రంగుల్లో ఇవి పూస్తాయి. అయితే వర్షాకాలంలో మొక్క వేర్ల దగ్గర నీరు నిల్వ ఉండకుండా జాగ్రత్త పడాలి. లేదంటే వేర్లు దెబ్బతినే అవకాశం ఉంటుంది.

5. క్లైంబింగ్ గులాబీ.. గోడలు, గేట్లను పూలతో అలంకరిస్తుంది

క్లైంబింగ్ గులాబీ వేగంగా విస్తరించే రకం. గోడలు, గేట్లు, ఆర్చ్‌లు లేదా కంచెలపై ఈ మొక్కను పెంచవచ్చు. కొద్ది కాలంలోనే రంగురంగుల పూలతో మొత్తం ప్రదేశాన్ని అందంగా మార్చేస్తుంది. వర్షాకాలంలో దీని పెరుగుదల మరింత మెరుగ్గా ఉంటుంది.

Also Read: చాయ్ బిస్కెట్ తినే అలవాటు ఉందా? వర్షాకాలంలో ఈ ఆరోగ్య సమస్యలకు కారణం అదే

వర్షాకాలంలో గులాబీ మొక్కల సంరక్షణ ఎలా చేయాలి?

గులాబీలు ఆరోగ్యంగా పెరగాలంటే కొన్ని జాగ్రత్తలు అవసరం. నీరు నిల్వ ఉండని ప్రదేశంలోనే మొక్కలను నాటాలి. మట్టిలో పశువుల ఎరువు లేదా వర్మీ కంపోస్ట్ కలపడం మంచిది. రోజుకు కనీసం నాలుగు నుంచి ఐదు గంటలు సూర్యరశ్మి అందేలా చూడాలి. వర్షం తర్వాత పసుపు రంగు లేదా కుళ్లిపోయిన ఆకులను వెంటనే తొలగించాలి. అవసరమైతే సేంద్రియ ఫంగిసైడ్‌ ఉపయోగించి మొక్కల్లో ఫంగస్ సమస్యలు రాకుండా నివారించాలి.