పవన్‌పై అనుచిత కామెంట్స్.. విచారణకు వెళ్తూ దువ్వాడ మిస్సింగ్.. అసలేం జరుగుతోంది!

Duvvada Srinivas: వైసీపీ ఎమ్మెల్సీ దువ్వాడ శ్రీనివాస్ మిస్సింగ్ వ్యవహారం ఇప్పుడు ఏపీ రాజకీయాల్లో తీవ్ర దుమారం రేపుతోంది. డిప్యూటీ సీఎం పవన్ కళ్యాణ్‌పై అనుచిత వ్యాఖ్యలు చేశారనే కేసులో విచారణకు హాజరయ్యేందుకు బయలుదేరిన ఆయన, మధ్యలోనే మాయమవ్వడం పలు అనుమానాలకు తావిస్తోంది. ఒకవైపు పోలీసులు అరెస్ట్ చేశారని ఆయన అనుచరులు ఆరోపిస్తుంటే, మరోవైపు తమకేం సంబంధం లేదని పోలీసులు చెబుతుండటంతో ఈ మిస్టరీ మరింత ముదిరింది.

అసలేం జరిగింది?

పవన్ కళ్యాణ్‌పై చేసిన వ్యాఖ్యల నేపథ్యంలో దువ్వాడ శ్రీనివాస్‌పై శ్రీకాకుళం జిల్లా కొత్తూరు పోలీస్ స్టేషన్‌లో కేసు నమోదైంది. ఈ క్రమంలో టెక్కలిలోని తన నివాసం నుంచి విచారణ నిమిత్తం ఆయన కొత్తూరు పోలీస్ స్టేషన్‌కు బయలుదేరారు. అయితే, స్టేషన్‌కు చేరుకోకముందే ఆయన ఫోన్ స్విచ్చాఫ్ అయింది. అప్పటినుంచి ఆయన ఎక్కడున్నారనేది ఎవరికీ తెలియకపోవడంతో ఒక్కసారిగా కలకలం రేగింది.

దివ్వెల మాధురి సంచలన ఆరోపణలు

దువ్వాడ శ్రీనివాస్ కనిపించకుండా పోవడంపై ఆయన ముఖ్య అనుచరురాలు దివ్వెల మాధురి తీవ్రంగా స్పందించారు. పోలీసులు పక్కా ప్లాన్‌తోనే ఆయన్ను దారిలోనే అదుపులోకి తీసుకున్నారని ఆమె ఆరోపించారు. ఒకవేళ ఆయన్ను అరెస్ట్ చేసి ఉంటే చట్టప్రకారం కోర్టులో ప్రవేశపెట్టాలని, అలా కాకుండా దాచిపెడితే ఊరుకునేది లేదని హెచ్చరించారు. ఆయన ప్రాణాలకు ముప్పు ఉందంటూ ఆమె ఆందోళన వ్యక్తం చేశారు.

Also Read: యాదగిరిగుట్ట అభివృద్ధిపై సీఎం రేవంత్ రెడ్డి కీలక సమీక్ష.. తిరుమల మోడల్ అనుసరించాలని ఆదేశం!

పోలీసుల వివరణ ఇదీ..

మరోవైపు ఈ ఆరోపణలను పోలీసులు పూర్తిగా ఖండించారు. దువ్వాడ శ్రీనివాస్‌ను తాము అరెస్ట్ చేయలేదని, ఆయన అసలు స్టేషన్‌కే రాలేదని స్పష్టం చేశారు. విచారణకు వస్తానని చెప్పి ఆయనే ఎక్కడికో వెళ్ళిపోయి ఉంటారని, ఈ వ్యవహారంతో పోలీసులకు ఎలాంటి సంబంధం లేదని తేల్చి చెప్పారు.

ప్రస్తుతం ఈ అదృశ్యం ఉదంతం ఇరువర్గాల మధ్య తీవ్ర ఉద్రిక్తతకు దారితీసింది. దువ్వాడ శ్రీనివాస్ నిజంగానే అజ్ఞాతంలోకి వెళ్ళారా? లేక పోలీసులు రహస్యంగా విచారిస్తున్నారా? అనే సస్పెన్స్ మరికొద్ది గంటల్లో తేలే అవకాశం ఉంది.