Cold Waves Alert: కనిపించని దారి.. ఆగని మంచు.. రాష్ట్రవ్యాప్తంగా రహదారులపై ప్రమాదకర పరిస్థితులు

Cold Waves Alert: గత వారం రోజులుగా తెలుగు రాష్ట్రాల్లోని జాతీయ రహదారులను దట్టమైన పొగమంచు కమ్మేస్తోంది. కాస్త చలి తగ్గినా పొగమంచు మాత్రం వదలడం లేదు. విజిబులిటీ కేవలం పది మీటర్ల లోపుకు పడిపోవడంతో, వాహనదారులు జంకుతున్నారు. కళ్లముందు ఉన్న వాహనం కూడా కనిపించని రీతిలో పొగమంచు విస్తరించి ఉండటంతో, రవాణా వ్యవస్థ అస్తవ్యస్తంగా మారుతోంది. ఈ ప్రతికూల వాతావరణం కారణంగా డ్రైవర్ల ఏకాగ్రతను దెబ్బతీయడమే కాకుండా, ఊహించని ప్రమాదాలకు దారితీస్తోంది.

పొగమంచు కారణంగా రహదారులపై వరుస ప్రమాదాలు ఆందోళన కలిగిస్తున్నాయి. మంచు కారణంగా ముందు వెళ్తున్న వాహనాలను అంచనా వేయలేక, వెనుక వచ్చే వాహనాలు వేగంగా ఢీకొంటున్నాయి. ఇలాంటి సమయాల్లో అతివేగం మృత్యుపాశంగా మారుతోంది. రవాణా శాఖ అధికారులు ప్రయాణికులను అప్రమత్తం చేస్తూ కీలక సూచనలు జారీ చేస్తున్నారు. అత్యవసరమైతే తప్ప తెల్లవారుజామున, రాత్రి వేళల్లో ప్రయాణాలను వాయిదా వేసుకోవడం ఉత్తమమని, ముఖ్యంగా వృద్ధులు, అనుభవం లేని డ్రైవర్లు ఈ సమయంలో వాహనాలు నడపకపోవడమే శ్రేయస్కరమని హెచ్చరిస్తున్నారు.

పొగమంచులో ప్రయాణించేటప్పుడు టెక్నాలజీని, జాగ్రత్తలను సరైన పద్ధతిలో వాడాలి. కేవలం హై-బీమ్ లైట్లపై ఆధారపడకుండా, ఖచ్చితంగా ‘ఫాగ్ లైట్ల’ను (Fog Lights) వినియోగించాలి. హై-బీమ్ కాంతి మంచు బిందువులపై పడి వెనక్కి పరావర్తనం చెందడం వల్ల ఎదురుగా ఉన్నవి మరింత అస్పష్టంగా కనిపిస్తాయి. వాహనదారులు తమ లైన్లను దాటకుండా, రోడ్డుపై ఉండే తెల్లటి గీతలను (Lane markers) గమనిస్తూ వాహనాన్ని నడపాలి. విండో గ్లాసులపై మంచు పేరుకుపోకుండా వైపర్లను నిరంతరం వాడుతూ, అద్దాల లోపలి వైపు పొగమంచు పట్టకుండా ఎయిర్ కండిషనర్ లేదా డిఫాగర్‌ను అడ్జస్ట్ చేసుకోవాలి.

Also Read: ఫోన్ ట్యాపింగ్ ఉచ్చు.. హరీష్ రావు విచారణకు అనుమతి కోరుతూ సుప్రీంకోర్టులో పిటిషన్

అన్నిటికంటే ముఖ్యంగా, విజిబులిటీ మరీ తక్కువగా ఉన్నప్పుడు సాహసం చేయకుండా వాహనాన్ని సురక్షితమైన ప్రదేశంలో నిలిపివేయడం మంచిది. రోడ్డుపైనే కాకుండా, రహదారి పక్కన ఉండే ఖాళీ స్థలంలో వాహనాన్ని ఆపి, తప్పనిసరిగా ‘హజార్డ్ లైట్ల’ను (Hazard lights) ఆన్ చేయాలి. దీనివల్ల వెనుక వచ్చే వాహనాలకు అక్కడ కారు ఆగి ఉందనే సంకేతం అందుతుంది. వేగాన్ని తగ్గించి, ముందటి వాహనానికి కనీసం రెట్టింపు దూరం పాటిస్తూ ప్రయాణించడం ద్వారా గమ్యస్థానాన్ని సురక్షితంగా చేరుకోవచ్చు. అంతేకాకుండా ఇలా చేయడం వల్ల ప్రమాదాలు కూడా తగ్గుతాయని అధికారులు చెబుతున్నారు.

రాష్ట్రవ్యాప్తంగా హైవేలపై కమ్ముకున్న దట్టమైన పొగమంచు

10 మీటర్ల కంటే తక్కువకు పడిపోయిన విజిబిలిటీ

వాహనాలు కనిపించక బెంబేలెత్తుతున్న డ్రైవర్లు

చలి తగ్గినా వీడని మంచు, గత వారం రోజులుగా ఇదే పరిస్థితి

మంచు కారణంగా రోడ్లపై ఒకదానికొకటి ఢీకొంటున్న వాహనాలు

వీలైనంత వరకు… pic.twitter.com/ULOYquu5Bi

— BIG TV Breaking News (@bigtvtelugu) January 5, 2026