Andhra Pradesh: గోదావరి పుష్కరాలు డేట్ ఫిక్స్.. ఈసారి ఎలా ఉండబోతున్నాయో తెలుసా!

Andhra Pradesh: ఎప్పుడెప్పుడా అని ఎదురు చూసే గోదావరి పుష్కరాల తేదీలు వచ్చేసాయ్.. ఇటీవల దేవాదాయ శాఖచే అధికారికంగా తేదీలు ప్రకటించారు. ఈ పవిత్ర ఘట్టం 2027, జూన్ 26వ తేదీన ప్రారంభమై, జూలై 7వ తేదీ వరకు, మొత్తం 12 రోజుల పాటు జరగనుంది. ఈ తేదీల ఖరారులో తిరుమల జ్యోతిష్య సిద్ధాంతి తంగిరాల వెంకట కృష్ణ పూర్ణ ప్రసాద్ గారి అభిప్రాయం, పంచాంగ ఆధారంగా.. దేవగురువు బృహస్పతి ఆ నిర్దిష్ట సమయంలో మేష రాశిలోకి ప్రవేశించనున్న శుభ తిథిని ఆధారంగా చేసుకుని ఈ నిర్ణయం తీసుకున్నారు. ప్రతి పన్నెండు సంవత్సరాలకు ఒకసారి వచ్చే ఈ పుష్కరాలు హిందూ సంస్కృతిలో అత్యంత పవిత్రమైనవిగా పరిగణించబడుతూ, నదీ స్నానాలకు, పితృకర్మలకు అధిక ప్రాధాన్యతను ఇస్తాయి.

పుష్కరాల ప్రాముఖ్యత..
గోదావరి నదిని దక్షిణ గంగగా పూజిస్తారు. పురాణాల ప్రకారం, దేవగురువైన బృహస్పతి ఒక నిర్దిష్ట రాశిలోకి ప్రవేశించినప్పుడు, ఆ రాశికి సంబంధించిన నదికి పుష్కరుడు అనే మహర్షి అనుగ్రహం లభిస్తుంది. ఈ కాలంలో నదీ జలాలు అమృత తుల్యంగా మారతాయని, ఈ జలాలలో ఒక్కసారి స్నానం ఆచరించినా సకల పాపాలు తొలగిపోతాయని, మోక్షం లభిస్తుందని భక్తుల ప్రగాఢ విశ్వాసం. ఈ 12 రోజులలో పిండ ప్రదానాలు, తర్పణాలు, దాన ధర్మాలు చేయడం వలన పితృ దేవతలకు శాంతి లభించి, కుటుంబానికి పుణ్యం చేకూరుతుందని నమ్మకం. ఈ పండుగ తెలుగు రాష్ట్రాలతో పాటు మహారాష్ట్ర, కర్ణాటకల నుంచి కూడా కోట్లాది మంది భక్తులను ఆకర్షిస్తుంది.

గత గోదావరి పుష్కరాలు..
గత గోదావరి పుష్కరాలు 2015వ సంవత్సరంలో జరిగాయి. ఆ పుష్కరాలు జులై 14 నుండి జులై 25, వరకు నిర్వహించబడ్డాయి. అంతకుముందు, పుష్కరాలు 2003వ సంవత్సరంలో జరిగాయి. గోదావరి నదికి సంబంధించి 2003, 2015లలో జరిగిన పుష్కరాల నిర్వహణ తెలుగు రాష్ట్రాల విభజన ముందు, ఆ తర్వాత పెద్ద ఎత్తున జరిగింది. ఇప్పుడు 2027లో రాబోయే పుష్కరాలు దాదాపు పన్నెండేళ్ల తర్వాత జరగనున్నాయి. గతంలో, 2015 గోదావరి పుష్కరాల నిర్వహణ కోసం ఆంధ్రప్రదేశ్ రాష్ట్ర ప్రభుత్వం వేల కోట్ల రూపాయలను ఖర్చు చేసింది. సుమారు రూ.1,500 కోట్ల వరకు వ్యయం అయినట్లు అంచనా. ఈ ఖర్చు ప్రధానంగా నదీ స్నాన ఘాట్ల మరమ్మత్తులు, రోడ్ల అభివృద్ధి, భద్రతా ఏర్పాట్లు, తాగునీరు, పారిశుద్ధ్య నిర్వహణ, తాత్కాలిక వసతి గృహాలు, వైద్య శిబిరాల ఏర్పాటు వంటి మౌలిక సదుపాయాల కల్పన కోసం కేటాయించారు. ద్రవ్యోల్బణం, పెరిగిన నిర్మాణ వ్యయాలను పరిగణలోకి తీసుకుంటే, 2027 పుష్కరాల నిర్వహణ ఖర్చు కూడా రూ.2,000 కోట్లకు పైగానే ఉండే అవకాశం ఉంది.

Also Read: మరోసారి హస్తినకు చంద్రబాబు.. కేంద్రమంత్రులతో సమావేశం.. ఎందుకంటే?

పండగ వాతావరణం మరియు భావి కార్యక్రమాలు
2027 గోదావరి పుష్కరాలు కేవలం స్నానాలకు మాత్రమే పరిమితం కాకుండా, తెలుగు సంస్కృతి, కళలు, ఆధ్యాత్మికతను ప్రతిబింబించేలా నిర్వహించాలని ప్రభుత్వం లక్ష్యంగా పెట్టుకుంది. ఈ 12 రోజుల పాటు నదీ తీరాలలో గోదావరి హారతులు, సాంస్కృతిక ప్రదర్శనలు, భక్తి సంగీత కార్యక్రమాలు, ఆధ్యాత్మిక ప్రవచనాలు పెద్ద ఎత్తున నిర్వహించబడతాయి. కోవిడ్-19 తర్వాత రాబోతున్న ఈ మహా పండుగను అత్యంత వైభవంగా, భద్రంగా నిర్వహించి, భక్తులకు చిరస్మరణీయమైన అనుభూతిని అందించడానికి ప్రభుత్వం అన్ని రకాల ప్రణాళికలను త్వరలోనే రూపొందించే అవకాశం ఉంది.

2027 గోదావరి పుష్కరాలు తేదీలు ఖరారు

జూన్ 26 నుంచి జూలై 7 వరకు గోదావరి పుష్కరాలు నిర్వహణ

తిరుమల జ్యోతిష్య సిధ్ధాంతి తంగిరాల వెంకట కృష్ణ పూర్ణ ప్రసాద్ అభిప్రాయం ఆధారంగా పుష్కర తేదీలను ఖరారు చేసిన దేవాదాయ శాఖ pic.twitter.com/Pq0MWUI0TK

— BIG TV Breaking News (@bigtvtelugu) December 12, 2025