BJP Alliance With TDP-Janasena: బీజేపీతో పొత్తు ఓ కొలిక్కి వచ్చినట్టే ..!

BJP’s alliance with TDP-Janasena(ap political news): ఎన్నాళ్లుగా చర్చల్లో నలుగుతున్న టీడీపీ, జనసేన, బీజేపీ సీట్ల పంపకం ఎట్టకేలకు ఓ కొలిక్కి వచ్చింది. దీనిపై ఢిల్లీలో గురువారం రాత్రి పొద్దుపోయే దాకా అమిత్‌ షా, జేపీ నడ్డా, చంద్రబాబునాయుడు, పవన్‌ కల్యాణ్‌లు చర్చలు జరిపారు. రాష్ట్రంలోని 25 లోక్‌సభ, 175 అసెంబ్లీ స్థానాల్లో మిత్రపక్షమైన జనసేనకు 3 లోక్‌సభ, 24 అసెంబ్లీ స్థానాలు ఇవ్వడానికి తెలుగుదేశం అంగీకరించడం, ఇప్పటికే తొలి జాబితా విడుదల చేయడం తెలిసిందే.

అయితే.. బీజేపీకి ఎన్ని సీట్లు అనే అంశాన్ని రాత్రి మీటింగ్‌లో నిర్ణయించినట్లు తెలుస్తోంది. బీజేపీకి 4 ఎంపీ సీట్లు, 6 వరకు ఎమ్మెల్యే సీట్లు ఇవ్వటానికి తెదేపా, జనసేన ప్రతిపాదించగా, 8 ఎంపీ సీట్లు, 10 ఎమ్మెల్లే సీట్లైనా ఇవ్వాలని బీజేపీ కోరినట్లు సమాచారం. నేడు మరోసారి నేతలు ఈ అంశాన్ని చర్చించే అవకాశం ఉందనీ, సీట్ల పంపకం మీద ఒక స్పష్టత వచ్చాక వీరు మీడియా సమావేశంలో పాల్గొనే అవకాశముందని బీజేపీ వర్గాలు వెల్లడించాయి.

వచ్చే సార్వత్రిక ఎన్నికల్లో ఎన్డీయే కూటమి 400కి పైగా సీట్లు సాధించాలని లక్ష్యంగా పెట్టుకున్న నేపథ్యంలో పాత మిత్రపక్షాలను తిరిగి ఆహ్వానించే దిశగా మోదీ, అమిత్ షాలు ప్రయత్నిస్తు్న్న సంగతి తెలసిందే. ఈ క్రమంలోనే ఇప్పటికే జేడీయూ, ఆర్‌ఎల్‌డీ ఎన్డీయే కూటమిలో చేరగా, టీడీపీ, బీజేడీనీ చేర్చుకోవాలని పార్టీ పెద్దలు భావిస్తున్నారు. నేటి మధ్యాహ్నానికి సీట్ల పంపకం మీద స్పష్టత వస్తుందని, ఏ ఏ సీట్లలో ఎవరు పోటీచేయాలనేదానిపై మరోసారి మూడు పార్టీల అగ్రనేతలూ భేటీ అయ్యే అవకాశముందని ఢిల్లీ వర్గాలు చెబుతున్నాయి. అయితే ఈ అంశం గురించి చంద్రబాబుతో బాటు ఢిల్లీ వచ్చిన నేతలెవరూ ఇప్పటివరకు స్పందించలేదు.