A.P:తాగిన మైకంలో నాగుపాముతో సయ్యాటలాడాడు.. అంతే మరి

snake bite a drunken man at A.P.Satyasai district kadiri
తాగింది కూసింత..ఊసింది ఊరంతా అని ఈ సామెత సరిగ్గా ఆ తాగుబోతుకు సరిపోతుంది. సాధారణంగా తాగుబోతుల్లో కొందరు తాగి సైలెంట్ గా ఎలాంటి హడావిడీ చేయకుండా ఇంటికి వెళిపోతారు బుద్ధిమంతుల్లా..మరికొందరు తాగి రోడ్డున పడి నానా యాగీ చేస్తుంటారు. రోడ్లపైనే డ్యాన్స్ చేస్తూ తుళ్లుతూ, తూగుతూ ప్రమాద కర ట్రాఫిక్ లో రోడ్డును దాటుతుంటారు. ఒక్కోసారి యాక్సిడెంట్ కు కూడా గురవుతుంటారు. లేదా డ్రైవింగ్ చేస్తూ వీళ్లే జనాన్ని చంపేస్తుంటారు. రాత్రంతా వీరంగం వేసిన వీళ్లు పొద్దున్న లేవగానే రాత్రి జరిగిందంతా మర్చిపోతుంటారు. అయితే తాగుబోతుల్లో కొందరు ప్రమాదకర జంతువులతో చెలగాటం ఆడుతుంటారు. సరిగ్గా ఓ యువకుడు అదే పని చేశాడు. తాగిన మైకంలో ఓ భయంకరమైన విషసర్పాన్ని పట్టుకోబోయాడు.ఏపీలో పుట్టపర్తి సత్యసాయి జిల్లాలో కదిరిలో జరిగిన ఈ సంఘటనతో ఒక్కసారిగా జనం విస్తుపోయారు. ప్రస్తుతం ఈ వీడియో వైరల్ గా మారింది. నాగపాముతో ఆ తాగుబోతు యువకుడు చేసిన విన్యాసం చూసి అంతా ఆశ్చర్యపోతున్నారు.

పాముతోనే సయ్యాటలు

అందరూ నడిచే మార్గంలో ఓ నాగపాము నడి రోడ్డుపై బుసలు కొడుతూ పడగవిప్పి కనిపించింది. దాంతో భయాందోళనలకు గురైన ప్రజలు అటు దిక్కుగా ఎవరూ వెళ్లొద్దని వారిస్తున్నా వినకుండా ఓ తాగుబోతు దానిని పట్టుకోవడానికి ప్రయత్నించాడు. కాసేపు దానికి దగ్గరగా వచ్చి కవ్వించాడు. పాము బుసలు కొట్టే కొద్దీ మన తాగుబోతుకు మంచి కిక్ వచ్చినట్లయింది. ఇంకేముందు జనం అరుస్తుంటే దానిని తనేదో ఘనకార్యం చేసినట్లు, ధైర్యవంతుడైనట్లు ఫీలయ్యాడు. పాపం ఇవేమీ పట్టని పాము మాత్రం తన ఆత్మరక్షణ కోసం బుసలు కొడుతూనే ఉంది. చాలా మంది ఈ తతంగాన్ని అంతా వీడియోలు తీశారు. కొద్ది సేపు జనాలకు మన తాగుబోతు కావలసినంత వినోదాన్ని పంచాడు. కొందరు ఆకతాయిలు అన్నా ఏ మాత్రం తగ్గొద్దు అంటూ ఎంకరేజ్ చెయ్యడం ఆరంభించారు. కొందరు పెద్ద వాళ్లు మాత్రం తాగుబోతును పోతావు అని హెచ్చరించారు. ఇవన్నీ పట్టనట్లుగా తాగుబోతు పాముతో సయ్యాటలు ఆరంభించాడు. దానినుంచి తప్పించుకుంటూ దానిని అటూ ఇటూ చేతితో పొడుస్లూ పాము ఆగ్రహానికి లోనయ్యాడు. ఒక్కసారిగా పాము రివర్స్ అయింది. అంతే ఫోర్స్ గా తాగుబోతు వైపు తిరిగి కసాకసా అంటూ కాటు వేసింది. ప్రస్తుతానికి ఆ మందుబాబు ఆసుపత్రిలో చికిత్స పొందుతున్నాడు.