Financial Scam: బోర్డు తిప్పేసిన ‘లైఫ్‌ ఈజ్‌ బ్యూటిఫుల్‌’.. వడ్డీల పేరుతో 30 కోట్లు స్కామ్

Financial Scam: ఎన్టీఆర్ జిల్లా, విస్సన్నపేటలో ‘లైఫ్ ఈజ్ బ్యూటీఫుల్ అడ్వైజరీ సర్వీసెస్’ అనే సంస్థ పేరుతో జరిగిన భారీ ఆర్థిక మోసంపై ఎట్టకేలకు పోలీసులు కేసు నమోదు చేశారు. ఈ సంస్థ అధిక వడ్డీలు ఇస్తామని అమాయకులను నమ్మించి, దాదాపు రూ. 30 కోట్ల రూపాయలకు పైగా డిపాజిట్లను సేకరించి మోసానికి పాల్పడింది. స్థానిక ప్రజలు, మధ్యతరగతి వర్గాల నుంచి పెద్ద ఎత్తున డబ్బు వసూలు చేసిన ఈ సంస్థ ఒక్కసారిగా మూతపడటం, ముఖ్య కార్యనిర్వహణాధికారి (సీఈఓ) పరారీ కావడంతో బాధితులు లబోదిబోమంటున్నారు. ఈ భారీ కుంభకోణం వెలుగులోకి రావడానికి రెండు రోజులుగా స్థానిక మీడియాలో వచ్చిన వరుస కథనాలు దోహదపడ్డాయి.

నమ్మకం… మోసం..
ఈ మోసపూరిత సంస్థ తమ కార్యకలాపాలను అత్యంత వ్యూహాత్మకంగా నిర్వహించింది. కేవలం అధిక వడ్డీలు ఇస్తామని ఆశ చూపడమే కాక, తమ వద్ద డబ్బు డిపాజిట్ చేసిన వారికి మార్ట్‌ల నుంచి ఉచిత సరుకులు ఇస్తామని, లేదా రాయితీ ధరల్లో వస్తువులు అందిస్తామని ప్రచారం చేసింది. ఈ రెండు రకాల ప్రలోభాలకు ఆశపడి, విస్సన్నపేట, పరిసర ప్రాంతాల ప్రజలు తమ కష్టార్జితాన్ని లక్షల రూపాయల్లో ఈ సంస్థలో డిపాజిట్ చేశారు. చిన్న మొత్తాల నుంచి పెద్ద మొత్తం వరకు పెట్టుబడులు పెట్టడంతో, కొద్ది రోజుల్లోనే ఈ సంస్థ రూ. 30 కోట్ల మైలురాయిని దాటింది.

పోలీసుల గాలింపు..
మోసం వెలుగులోకి వచ్చిన వెంటనే సంస్థ సీఈవో అయిన నండూరి శివాని అదృశ్యమయ్యారు. ఆమె కార్యాలయాన్ని మూసివేసి, ఫోన్‌ స్విచాఫ్ చేసి పరారీలో ఉన్నారు. దీంతో బాధితులు పోలీసులను ఆశ్రయించగా, రెండు రోజుల ఒత్తిడి తర్వాత విస్సన్నపేట పోలీసులు ఎట్టకేలకు ఆమెపై కేసు నమోదు చేశారు. ప్రస్తుతం పోలీసులు పరారీలో ఉన్న నండూరి శివాని ఆచూకీ కోసం ప్రత్యేక బృందాలతో గాలింపు చర్యలు ముమ్మరం చేశారు. ఆమెను పట్టుకుంటేనే డిపాజిట్ చేసిన డబ్బు తిరిగి వచ్చే అవకాశం ఉంటుందని బాధితులు ఆశగా ఎదురుచూస్తున్నారు.

ఏజెంట్లపై తిరుగుబాటు..
కేవలం సీఈవో శివాని మాత్రమే కాక, ఈ మోసంలో కీలకంగా వ్యవహరించిన సంస్థలోని ఇతర ముఖ్య వ్యక్తులు కూడా పరారయ్యారు. డిపాజిట్లు వసూలు చేయడంలో మధ్యవర్తులుగా పనిచేసిన ఏజెంట్లపై డబ్బులు కట్టిన బాధితులు తీవ్ర ఆగ్రహం వ్యక్తం చేయడంతో, పరిస్థితి అదుపు తప్పింది. ఈ క్రమంలో, సంస్థకు చెందిన మేనేజర్లు కిరణ్, వెంకట్ కూడా తాళాలు వేసి మార్ట్‌లను మూసివేసి పారిపోయారు. మార్ట్ మేనేజర్లు కూడా మోసంలో భాగస్వాములేనని, వారిపై కూడా కేసులు నమోదు చేసి కఠినంగా శిక్షించాలని బాధితులు పోలీసులను డిమాండ్ చేస్తున్నారు.

పరిహారం కోసం బాధితుల వినతి
ఈ మోసానికి గురైన బాధితులు పెద్ద సంఖ్యలో ఉండటం, నష్టపోయిన మొత్తం భారీగా ఉండటంతో, ఈ అంశం రాజకీయ నాయకుల దృష్టిని కూడా ఆకర్షించింది. బాధితులు తమ సమస్యను స్థానిక ప్రజాప్రతినిధుల దృష్టికి తీసుకెళ్లారు. తమకు న్యాయం జరిగేలా చూడాలని, పోయిన డబ్బును తిరిగి ఇప్పించాలని వారు వినతి పత్రాలు సమర్పించారు. ఈ మోసం వెనుక పెద్ద వ్యక్తుల హస్తం ఉందా అనే కోణంలోనూ దర్యాప్తు జరిపించాలని, ఇలాంటి నకిలీ ఫైనాన్స్ సంస్థలపై ప్రభుత్వం కఠిన చర్యలు తీసుకోవాలని వారు కోరుతున్నారు.

Also Read: నగరిలో వేడెక్కుతున్న రాజకీయం.. రోజా వర్సెస్ వైసీపీ సీనియర్ లీడర్ల మధ్య పోరు

ప్రస్తుతం పోలీసులు ఈ కేసు దర్యాప్తులో అనేక కీలక అంశాలను పరిశీలిస్తున్నారు. నండూరి శివాని బ్యాంకు లావాదేవీలు, ఆమె ఆస్తులు, ఆమెకు రాజకీయ లేదా ఇతర అండదండలు ఉన్నాయా అనే కోణంలో విచారణ సాగుతోంది. నిందితురాలిని పట్టుకుని ఆమె ఆస్తులను జప్తు చేయడం ద్వారానే బాధితులకు కొంత మేరకైనా సొమ్ము రికవరీ అవుతుందని పోలీసులు భావిస్తున్నారు. ఈ మోసానికి సంబంధించి మరిన్ని వివరాలు త్వరలో బయటపడే అవకాశం ఉంది.

'లైఫ్ ఈజ్ బ్యూటిఫుల్' అంటూ భారీ మోసం!

ఎన్టీఆర్ జిల్లా విస్సన్నపేటలో లైఫ్ ఈజ్ బ్యూటిఫుల్ అడ్వైజరీ సర్వీసెస్ భారీ మోసం

అధిక వడ్డీలు ఇస్తామని చెప్పి మోసం చేసి, రూ.30 కోట్లకుపైగా కొల్లగొట్టి పరారైన సంస్థ సీఈఓ శివానీ

కేసు నమోదు చేసిన విస్సన్నపేట పోలీసులు

లైఫ్ ఈజ్ బ్యూటిఫుల్… pic.twitter.com/BxbL4brPXF

— BIG TV Breaking News (@bigtvtelugu) December 14, 2025