Kadapa: నా కోరిక తీర్చు.. మహిళకు హెడ్ కానిస్టేబుల్ వేధింపులు

Kadapa: సాయం చేయాల్సిన పోలీసులే.. మానవ మృగాళ్లలా రెచ్చిపోతే సామాన్యుల పరిస్థితి ఏంటి?మహిళలకు అండగా నిలవాల్సింది పోయి.. కామాంధుల్లా ప్రవర్తిస్తే ఇంకెవరికి చెప్పుకోవాలి? సాయం కోసం పోలీస్ స్టేషన్ కు వెళ్లిన ఒక మహిళకు ఇదే పరిస్థితి ఎదురైంది.

కుమార్తె కనిపించడం లేదని ఓ మహిళ సాయం కోరితే.. తన కోరిక తీర్చాలంటూ ఓ హెడ్ కానిస్టేబుల్.. తన అసలు రూపాన్ని బయటపెట్టాడు. తానొక బాధ్యత గల పోలీసునని మరిచి అసభ్యంగా ప్రవర్తించాడు. ఈ దారుణ ఘటన కడప జిల్లాలో చోటు చేసుకుంది.

ఓబులవారిపల్లె మండలానికి చెందిన ఓ మహిళ తన కుమార్తె కనిపించడం లేదని పీఎస్‌లో ఫిర్యాదు చేసింది. ప్రేమ పేరుతో ఓ యువకుడిని పెళ్లి చేసుకుని పారిపోయిన తమ కుమార్తెను వెతికి తీసుకురావాలని కోరింది. ఈ కేసు బాధ్యతను ఎస్ ఐ.. హెడ్ కానిస్టేబుల్, మహిళా కానిస్టేబుల్‌కు అప్పగించారు. అయితే మహిళా కానిస్టేబుల్ సహకారంతో హెడ్ కానిస్టేబుల్ తనను వేధిస్తున్నారని బాధిత మహిళ ఆరోపించింది. తన కోరిక తీర్చాలంటూ ఒత్తిడి తెచ్చారంటూ వాపోయింది. నగ్నంగా ఉండాలని ఇబ్బంది పెడుతున్నారని కన్నీటిపర్యంతమైంది. సామాన్యులకు అండగా ఉండాల్సిన పోలీసులేఇలా ప్రవర్తిస్తే ఇంకెక్కడ న్యాయం జరుగుతుందని ఆవేదన వ్యక్తం చేస్తోంది. ఉన్నతాధికారులు ఈ విషయంలో జోక్యం చేసుకుని తనకు న్యాయం చేయాలని వేడుకుంటోంది.