Srisailam Online Pooja Booking: మహాశివుని చెంతకు చేరలేకున్నారా? మీ గోత్రనామాలతో శ్రీశైల క్షేత్రంలో పరోక్ష పూజలు జరిపించుకోండిలా!

Srisailam Online Pooja Booking: ద్వాదశ జ్యోతిర్లింగాలలో ఒకటి, అష్టాదశ శక్తిపీఠాలలో ఒకటైన శ్రీశైల మహాక్షేత్రంలో మహాశివరాత్రి పర్వదినాన్ని పురస్కరించుకుని బ్రహ్మోత్సవాలు అత్యంత వైభవంగా జరుగుతున్నాయి. ఫిబ్రవరి 15వ తేదీన మహాశివరాత్రి సందర్భంగా క్షేత్రంలో అత్యంత ముఖ్యమైన ఘట్టాలు చోటుచేసుకోనున్నాయి. ఆ రోజు సాయంత్రం నందివాహనంపై స్వామివారి ప్రభోత్సవం, అర్ధరాత్రి వేళ అత్యంత భక్తిశ్రద్ధలతో నిర్వహించే లింగోద్భవకాల మహన్యాస పూర్వక రుద్రాభిషేకం భక్తులకు కనువిందు చేయనున్నాయి. వీటికి తోడుగా, శ్రీశైలంలో మాత్రమే కనిపించే అరుదైన పాగాలంకరణ, శ్రీ భ్రమరాంబా మల్లికార్జున స్వామివార్ల దివ్య కళ్యాణమహోత్సవం శాస్త్రోక్తంగా నిర్వహించబడతాయి.

బ్రహ్మోత్సవాల్లో భాగంగా ఫిబ్రవరి 16వ తేదీన వేడుకలు కొనసాగుతాయి. ఆ రోజున భక్తుల జయజయధ్వానాల మధ్య రథోత్సవం అత్యంత కోలాహలంగా సాగుతుంది. రాత్రి వేళ కృష్ణా నది జలాల్లో స్వామి అమ్మవార్ల తెప్పోత్సవం కమనీయంగా జరుగుతుంది. ఈ ఉత్సవాలను తిలకించేందుకు దేశం నలుమూలల నుండి లక్షలాది మంది భక్తులు తరలివస్తారు. అయితే, రద్దీ కారణంగా లేదా ఇతర కారణాల వల్ల స్వయంగా క్షేత్రానికి రాలేని భక్తుల కోసం దేవస్థానం అద్భుతమైన అవకాశాన్ని కల్పిస్తోంది.

దూర ప్రాంతాల్లో ఉండి స్వామివారి సేవలో పాల్గొనాలనుకునే భక్తుల సౌకర్యార్థం శ్రీశైల దేవస్థానం పరోక్ష సేవలను అందుబాటులోకి తెచ్చింది. భక్తులు దేవస్థానం అధికారిక వెబ్‌సైట్ ద్వారా నిర్ణీత పూజా రుసుమును చెల్లించి, తమ పేరు, గోత్రనామాలతో ఈ విశేష పూజల్లో భాగస్వాములు కావచ్చు. మీరు ఇంట్లోనే ఉండి భక్తిశ్రద్ధలతో మహాశివరాత్రి పూజలు, కళ్యాణోత్సవం వంటి సేవలను జరిపించుకునే వీలుంటుంది. పూజానంతరం భక్తుల గోత్రనామాలతో సంకల్పం చేసి, వారికి స్వామివారి ప్రసాదాన్ని కొరియర్ ద్వారా పంపించే ఏర్పాటు కూడా ఉంది.

Also Read: శంఖుపై శివతాండవం.. నంద్యాల చిత్రకారుడి అద్భుత కళాఖండం!

శ్రీశైల భ్రమరాంబా మల్లికార్జున స్వామివార్ల కృపాకటాక్షాలు అందరికీ కలగాలని ఆకాంక్షిస్తూ, ఈ బ్రహ్మోత్సవాల్లో భక్తులు పరోక్ష సేవల ద్వారా కూడా పాల్గొని పునీతులు కావాలని దేవస్థానం కోరుతోంది. ఆన్‌లైన్ టికెట్ల బుకింగ్ మరియు ఇతర పూర్తి వివరాల కోసం భక్తులు వెబ్‌సైట్‌ను సందర్శించవచ్చు లేదా దేవస్థానం వారి కాల్ సెంటర్‌ను సంప్రదించవచ్చు. హరహర మహాదేవ! శంభో శంకర!