Model Schools: స్టూడెంట్స్‌కు భారీ గుడ్ న్యూస్.. మోడల్ స్కూల్స్ ఆరో తరగతి ప్రవేశాల నోటిఫికేషన్ విడుదల

ఆంధ్రప్రదేశ్‌లోని 164 ఆదర్శ పాఠశాలల్లో 2026-27 విద్యా సంవత్సరానికి సంబంధించి ఆరో తరగతిలో ప్రవేశాలకు నోటిఫికేషన్ విడుదలైంది. ఇంగ్లిష్ మీడియంలో విద్యను అందించే ఈ పాఠశాలల్లో చేరాలనుకునే విద్యార్థుల నుంచి ప్రభుత్వం దరఖాస్తులు కోరుతోంది. గ్రామీణ ప్రాంత విద్యార్థులకు నాణ్యమైన విద్యను చేరువ చేయడమే లక్ష్యంగా ఈ నోటిఫికేషన్ జారీ చేశారు. అర్హత కలిగిన విద్యార్థులు ఆన్‌లైన్ విధానంలో తమ దరఖాస్తులను సమర్పించాల్సి ఉంటుంది. మార్చి 31వ తేదీని దరఖాస్తుకు చివరి గడువుగా నిర్ణయించారు.

ఈ ప్రవేశ పరీక్షకు దరఖాస్తు చేసుకునే అభ్యర్థులు సంబంధిత జిల్లాలో ప్రభుత్వ లేదా ప్రభుత్వ గుర్తింపు పొందిన పాఠశాలల్లో చదువుతూ ఉండాలి. ప్రస్తుతం అంటే 2025-26 విద్యా సంవత్సరంలో అయిదో తరగతి చదువుతున్న విద్యార్థులు మాత్రమే దరఖాస్తుకు అర్హులు. విద్యార్థులు తెలుగు లేదా ఇంగ్లిష్ మీడియంలలో ఏ మాధ్యమంలో చదువుతున్నా ఈ పరీక్ష రాయవచ్చు. ప్రవేశం పొందిన తర్వాత బోధన పూర్తిగా ఇంగ్లిష్ మీడియంలోనే కొనసాగుతుంది.

వయోపరిమితి విషయంలో ప్రభుత్వం స్పష్టమైన మార్గదర్శకాలు ఇచ్చింది. ఓసీ అలాగే బీసీ వర్గాలకు చెందిన విద్యార్థులు 01-09-2014 నుంచి 31-08-2016 మధ్య జన్మించి ఉండాలి. ఎస్సీ అలాగే ఎస్టీ విద్యార్థులకు కొంత మినహాయింపు ఉంటుంది. వీరు 01-09-2012 నుంచి 31-08-2016 మధ్య జన్మించిన వారై ఉండాలి. దరఖాస్తు సమయంలో విద్యార్థుల పుట్టిన తేదీ ధ్రువీకరణ పత్రాలను పరిశీలిస్తారు.

విద్యార్థుల ఎంపిక పూర్తిగా ప్రవేశ పరీక్షలో సాధించిన ప్రతిభ ఆధారంగా జరుగుతుంది. దీనితో పాటు ప్రభుత్వం అమలు చేసే రూల్ ఆఫ్ రిజర్వేషన్ నిబంధనలను పాటిస్తారు. పరీక్ష రుసుము విషయానికొస్తే ఓసీ అలాగే బీసీ అభ్యర్థులు 200 రూపాయలు చెల్లించాలి. ఎస్సీ అలాగే ఎస్టీ కేటగిరీ విద్యార్థులు 125 రూపాయలు చెల్లిస్తే సరిపోతుంది. ఆన్‌లైన్ పేమెంట్ గేట్‌వే ద్వారా ఈ రుసుమును సమర్పించవచ్చు.

దరఖాస్తు ప్రక్రియ ముగిసిన తర్వాత ఏప్రిల్ 12వ తేదీన ప్రవేశ పరీక్ష నిర్వహిస్తారు. పరీక్ష పూర్తయిన అనంతరం ఏప్రిల్ 27న ఫలితాలను వెల్లడిస్తారు. అదే రోజున మెరిట్ జాబితా లేదా ఎంపికైన వారి వివరాలను అధికారిక వెబ్‌సైట్‌లో అందుబాటులో ఉంచుతారు. ఎంపికైన విద్యార్థులకు ఏప్రిల్ 30వ తేదీన ధ్రువపత్రాల పరిశీలనతో పాటు కౌన్సెలింగ్ ప్రక్రియ చేపడతారు. అన్ని విభాగాల ప్రక్రియ పూర్తయ్యాక జూన్ నెల నుంచి తరగతులు ప్రారంభమవుతాయి. ఈ అవకాశాన్ని గ్రామీణ ప్రాంత విద్యార్థులు సద్వినియోగం చేసుకోవాలని విద్యాశాఖ అధికారులు సూచించారు.

ALSO READ: BEL Recruitment: రూ.1,80,000 జీతంతో బెల్‌లో ఉద్యోగాలు.. బీటెక్ పాసైతే అప్లై చేసుకోవచ్చు..!