జూలై నెలలో దేశంలోని అనేక నగరాల్లో ఉక్కపోత, వేడి ఎక్కువగా ఉంటుంది. ముఖ్యంగా మెట్రో నగరాల్లో వాతావరణం చాలా అసౌకర్యంగా మారుతుంది. అలాంటి సమయంలో చల్లని కొండ ప్రాంతాలకు వెళ్లడం మంచి ఎంపికగా ఉంటుంది.
భారతదేశంలో జూలై నెలలో కూడా 25 డిగ్రీల సెల్సియస్ కంటే తక్కువ ఉష్ణోగ్రత ఉండే ఎన్నో అందమైన పర్యాటక ప్రాంతాలు ఉన్నాయి. అక్కడ చల్లని వాతావరణంతో పాటు పచ్చని ప్రకృతి, జలపాతాలు, స్వచ్ఛమైన గాలి పర్యాటకులను ఆకట్టుకుంటాయి.
రాజస్థాన్లో ఉన్న ఏకైక హిల్ స్టేషన్ మౌంట్ అబూ. వర్షాకాలంలో ఈ ప్రాంతం మరింత అందంగా కనిపిస్తుంది. అరావలి పర్వతాలు పచ్చదనంతో కళకళలాడుతాయి. నక్కీ సరస్సులో బోటింగ్ చేయవచ్చు. అచల్గఢ్ కోట నుంచి కొండల అందాలను ఆస్వాదించవచ్చు. దిల్వారా జైన్ దేవాలయాలు కూడా తప్పక చూడాల్సిన ప్రదేశాలు.
షిమ్లా సమీపంలో ఉన్న మషోబ్రా ప్రశాంతమైన వాతావరణానికి ఫేమస్. వర్షాకాలంలో ఇక్కడి ప్రకృతి మరింత ఆకర్షణీయంగా మారుతుంది. క్రెగ్నానో నేచర్ పార్క్లో ప్రకృతి మధ్య నడకను ఆస్వాదించవచ్చు. శిమ్లా వాటర్ క్యాచ్మెంట్ వైల్డ్లైఫ్ శాంక్చువరీని సందర్శించవచ్చు. సమీపంలోని కుఫ్రీ, నల్దేహ్రా కూడా చూడదగిన ప్రాంతాలు.
కిన్నౌర్ జిల్లాలో ఉన్న కల్పా అందమైన ప్రకృతి దృశ్యాలకు ప్రసిద్ధి. జూలైలో యాపిల్ తోటలు, దేవదారు అడవులు ఈ ప్రాంతాన్ని మరింత అందంగా మారుస్తాయి. కిన్నౌర్లో కైలాస్ పర్వత శ్రేణుల దృశ్యాలు మనసును ఆకట్టుకుంటాయి. నారాయణ-నాగిణి ఆలయం, చాకా మెడోస్ ప్రధాన ఆకర్షణలు.
వర్షాకాలంలో తవాంగ్ మేఘాలు, పొగమంచుతో కప్పబడి అద్భుతంగా కనిపిస్తుంది. ప్రపంచ ప్రసిద్ధ తవాంగ్ మఠం, తవాంగ్ వార్ మెమోరియల్, నూరానాంగ్ జలపాతం ప్రధాన పర్యాటక ప్రదేశాలు. వాతావరణం అనుకూలిస్తే బుమ్ లా పాస్, సంగెత్సర్ సరస్సును కూడా సందర్శించవచ్చు.
స్పీతి వ్యాలీలో వర్షపాతం ఇతర కొండ ప్రాంతాలతో పోలిస్తే తక్కువగా ఉంటుంది. అందుకే జూలైలో కూడా ఈ ప్రాంతాన్ని సౌకర్యంగా సందర్శించవచ్చు.
ఇక్కడ కీ మఠం, చిచమ్ బ్రిడ్జ్, హిక్కిం, కోమిక్, లాంగ్జా గ్రామాలు ప్రత్యేక ఆకర్షణలు. ఇక్కడి ప్రశాంత వాతావరణం ప్రత్యేక అనుభూతిని అందిస్తుంది.
చిక్మగలూరు కాఫీ తోటలు, పచ్చని కొండలతో ప్రసిద్ధి. వర్షాకాలంలో ఈ ప్రాంతం మరింత అందంగా మారుతుంది.
హెబ్బే, ఝారి, కల్లతిగిరి జలపాతాలు ఈ సమయంలో ఉప్పొంగి ప్రవహిస్తాయి. బాబా బుదంగిరి కొండలు, హిరెకోలాలే సరస్సు కూడా చూడడానికి అద్భుతంగా ఉంటాయి. అలాగే ఇక్కడ స్థానిక మల్నాడ్ వంటకాలను తప్పకుండా రుచి చూడాలి.
Also Read: అడవిలో రైలు ప్రయాణం.. ప్రకృతి ప్రేమికులకు స్పెషల్ సఫారీ ట్రైన్
ప్రయాణానికి ముందు వాతావరణ పరిస్థితులను తప్పనిసరిగా తెలుసుకోవాలి. భారీ వర్షాల కారణంగా కొన్ని రహదారులు మూసివేయబడే అవకాశం ఉంటుంది. రెయిన్కోట్, వాటర్ప్రూఫ్ షూస్, అవసరమైన మందులు వెంట తీసుకెళ్లాలి. హోటళ్లను ముందుగానే బుక్ చేసుకోవడం మంచిది.
జూలైలో నగరాల ఉక్కపోత నుంచి బయటపడాలంటే ఈ చల్లని హిల్ స్టేషన్లు మంచి ఎంపిక. స్వచ్ఛమైన గాలి, పచ్చని ప్రకృతి, అందమైన జలపాతాలు, ప్రశాంతమైన వాతావరణం మీ ప్రయాణాన్ని స్వీట్ మెమరీగా మారుస్తాయి.
Share
ఒకే పేరు.. ఆరు ఊర్లు.. ఉమ్మడి నల్లగొండ జిల్లాలో విచిత్రం!
బుల్లెట్ ట్రైన్ ప్రాజెక్టుపై వివాదం.. జపాన్ మాజీ మంత్రి ఆరోపణలపై భారత్ క్లారిటీ!
