Fertilizer Booking App: రైతులకు గుడ్ న్యూస్.. ఇంటి నుంచే యూరియా బుకింగ్

Fertilizer Booking App: రైతు కష్టాన్ని తీర్చేందుకు తెలంగాణ ప్రభుత్వం తీసుకొచ్చిన యూరియా యాప్.. నేటి నుంచి అందుబాటులోకి రానుంది. ఈ విధానం యూరియా పంపిణీలో మరింత పారదర్శకత పెరగడంతో పాటు.. రైతులకు సమయం, శ్రమ, రెండూ ఆదా కానున్నాయని అధికారులు వివరిస్తున్నారు.

గత వానాకాలంలో రైతులకు యూరియా సరిపడా దొరకకపోవడంతో పలుచోట్ల ఆందోళనలు జరిగాయి. ఈ నేపథ్యంలో గత అనుభవాలను దృష్టిలో పెట్టుకుని అక్రమాలకు అడ్డుకట్ట వేయడంతో పాటు.. సరిపడా యూరియా లభించే విధంగా కొత్తగా బుకింగ్ విధానాన్ని తీసుకొచ్చింది. దీనిపై రాష్ట్ర స్ఠాయిలో అధికారులు శిక్షణ పూర్తికాగా, జిల్లాల వారిగా వ్యవసాయ అధికారులతో డీలర్లకు యాప్ పైన అవగాహన కల్పిస్తారు. ప్రస్తుతం పత్తిపంటలను సాగు చేసిన అన్నదాతలు దాన్ని విక్రయించుకునేందుకు కపాస్ కిసాన్ యాప్‌ను స్లాట్ బుక్ చేసుకున్నట్లుగానే, ఈ యాప్‌ను డౌన్‌లోడ్ చేసుకుని యూరియాను ముందస్తుగా ఆ యాప్‌లో నమోదు చేసుకోవాల్సి‌ ఉంటుంది.

రైతులకు యూరియాను ఒకేసారి కాకుండా.. పలు విడతల వారిగా సరఫరా చేయనున్నారు. ఐదు ఎకరాల వరకు భూమి ఉన్న రైతులు రెండు విడతల్లో, ఐదు నుంచి ఇరవై ఎకరాలు ఉన్న రైతన్నలకు మూడువిడతల్లో, 20 ఎకరాలకు మించి భూమి ఉన్న రైతులు నాలుగు విడతల్లో యూరియాను బుక్ చేసుకుని యూరియాను తీసుకువెళ్లాల్సి ఉంటుంది. సంబంధిత యాప్‌లో రైతు పట్టాదారు పాస్ పుస్తకం నెంబర్‌ను నమోదు చేయగానే.. లింకైన ఫోన్ నెంబర్‌కు ఓటీపీ వస్తుంది. ఆ ఓటీపీని నమోదు చేసిన వెంటనే రైతుకు చెందిన భూమి విస్తీర్ణం, సాగు చేసిన పంటకు అవసరమైనటువంటి యూరియా పరిమాణంలో బుకింగ్ ఆధారంగా.. అధీకృత టైలర్లు లేదా సహకార సంఘాల ద్వారా యూరియాను కొనుగోలు చేసుకునేందుకు ఛాన్స్ ఉంటుంది. బుకింగ్ చేసుకున్న యూరియా కేవలం 48 గంటలు మాత్రమే ఉంటుంది. ఈ గడువు తేదీలోగా యూరియా తీసుకోనట్లైతే అది తిరిగి స్టాక్‌లోకి వెళ్తుంది.

ఈ యాప్ ద్వారా యూరియా పంపిణీ వల్ల రైతులకు సమయం ఆదాతో పాటు .. యురియా ఇతర ఎరువుల పంపిణీనీ సరళతరం చేసేందుకు విధానం తీసుకొచ్చినట్లుగా కొద్దిరోజుల క్రితం మంత్రి తుమ్మల నాగేశ్వరరావు వివరించారు. దీని ద్వారా ఎరువులు పక్కదారి పట్టకుండా పంట పండించే అన్నదాతలకు మాత్రమే అందుతాయని చెప్పారు. ఈ యాప్ వినియోగంపై అన్నదాతలకు సమస్యలు ఉంటే.. సంబంధిత ఏఈవోను సంప్రదింపవచ్చని వివరించారు. అధికారులందరూ యాప్ గురించి రైతులకు పూర్తిస్థాయిలో అవగాహన కల్పించాలని కోరారు.