Incognito Mode Privacy: సాధారణంగా మనలో చాలామందికి ఇంటర్నెట్ వాడుతున్నప్పుడు.. ఒక గుడ్డి నమ్మకంగా ఉంటుంది. అదేమిటంటే.. బ్రౌజర్లో ‘ఇన్కాగ్నిటో మోడ్’ ఆన్ చేస్తే ఇక మనం ఏం చూస్తున్నామో ఎవరికీ తెలియదు అని. హ్యాకర్ల నుంచి, ఇంటర్నెట్ కంపెనీల నుంచి పూర్తి రక్షణ దొరికిందని భావిస్తారు. అయితే ఇది ఎంతవరకు నిజం? ఇన్కాగ్నిటో మోడ్ నిజంగానే మనకు ప్రైవసీ కల్పిస్తుందో? లేదో? ఇప్పుడు వివరంగా తెలుసుకుందాం.
మనం ఇన్కాగ్నిటో మోడ్ ఆన్ చేసినప్పుడు బ్రౌజర్ మన హిస్టరీని, కుకీస్ను దాచిపెడుతుంది. మనం బ్రౌజింగ్ విండోను క్లోజ్ చేసిన తర్వాత, మన ఫోన్ తీసుకుని ఎవరైనా చూసినా మీరు ఏం వెతికారో వారికి తెలియదు. ఒకే కంప్యూటర్ను ఇంట్లో నలుగురు వాడుతున్నప్పుడు లేదా స్నేహితుడి ఫోన్ తీసుకున్నప్పుడు ఇది బాగా ఉపయోగపడుతుంది. అంతవరకే కానీ, ఇది మనల్ని ఇంటర్నెట్ ప్రపంచంలో పూర్తిగా అదృశ్యం చేయలేదు.
ఇన్కాగ్నిటో మోడ్ కేవలం మన బ్రౌజర్ హిస్టరీని మాత్రమే దాచగలదు. కానీ మనం ఇంటర్నెట్ వాడుతున్నప్పుడు మన ఐపీ అడ్రస్ ద్వారా ఇంటర్నెట్ సర్వీస్ ప్రొవైడర్కు అన్నీ స్పష్టంగా కనిపిస్తూనే ఉంటాయి. అలాగే మన ఆఫీసు నెట్వర్క్ లేదా కాలేజీ వైఫై వాడుతుంటే.. అక్కడి అధికారులకు మనం ఏ వెబ్సైట్లు ఓపెన్ చేశామో తెలిసిపోతుంది. కాబట్టి.. ప్రైవేట్ మోడ్ పెట్టాం కదా అని నెట్లో ఏం చేసినా ఎవరూ గమనించడం లేదు అనుకోవడం తప్పు.
చాలా మందికి ఒక అనుభవం ఎదురవుతుంది. ఇన్కాగ్నిటో మోడ్లో ఏదైనా వస్తువు గురించి వెతికినప్పుడు.. ఆ తర్వాత సాధారణ మోడ్లో దానికి సంబంధించిన ప్రకటనలు ప్రత్యక్షమవుతాయి. దీనికి కారణం మన ఐపీ అడ్రస్, డివైజ్ వివరాలను బట్టి వెబ్సైట్లు మనల్ని గుర్తిస్తాయి. ఇన్కాగ్నిటోలో ఉన్నప్పుడు కూడా వెబ్సైట్లు మన లొకేషన్ను ట్రాక్ చేయగలవు. అందుకే ప్రైవేట్ మోడ్లో వెతికిన విషయాలు కూడా ప్రకటనల రూపంలో మన ముందుకు వస్తాయి.
మన సమాచారం ఇతరులకు అస్సలు తెలియకూడదు అనుకుంటే.. కేవలం ఇన్కాగ్నిటో మోడ్ను నమ్ముకుంటే సరిపోదు. దీని కోసం వీపీఎన్ సాఫ్ట్వేర్ వాడాల్సి ఉంటుంది. ఇది మన ఐపీ అడ్రస్ను మార్చడమే కాకుండా.. మన సమాచారాన్ని ఇతరులు చదవలేనట్లుగా మారుస్తుంది. మొత్తానికి చెప్పాలంటే.. ఇన్కాగ్నిటో మోడ్ అనేది మన పక్కన ఉన్న మనుషుల నుంచి మన బ్రౌజింగ్ వివరాలను దాచడానికి పనికొస్తుందే తప్ప, ఇంటర్నెట్ ప్రపంచం నుంచి మనల్ని పూర్తిగా దాచలేదు అనే నిజాన్ని గుర్తుంచుకోవాలి.
Share
అడుక్కుతింటాను కానీ అతనితో నటించను.. స్టార్ హీరోయిన్ సంచలన స్టేట్మెంట్!
గోవిందాకు 50 అఫైర్స్ ? బాలీవుడ్ను షేక్ చేస్తున్న స్టార్ వైఫ్ కామెంట్స్!
