BSNL Mahila Kavach: ప్రస్తుత రోజుల్లో సైబర్ వేధింపులు, అపరిచితుల నుంచి వచ్చే అవాంఛిత కాల్స్ మహిళలను తీవ్రంగా ఇబ్బంది పెడుతున్నాయి. ముఖ్యంగా బయట మొబైల్ షాపుల్లో రీఛార్జ్ చేయించుకునేటప్పుడు తమ వ్యక్తిగత ఫోన్ నంబర్ను రిటైలర్లకు చెప్పాల్సి రావడం వల్ల ఆ నెంబర్ దుర్వినియోగమయ్యే అవకాశాలు ఎక్కువగా ఉన్నాయి. ఈ సమస్యను గుర్తించిన ప్రభుత్వ రంగ టెలికాం సంస్థ BSNL, మహిళా వినియోగదారుల ప్రైవసీని కాపాడేందుకు ‘కవచ్’ అనే వినూత్న ఫీచర్ను ప్రవేశపెట్టింది. దీనివల్ల స్త్రీలు తమ అసలు నెంబర్ను ఎవరికీ వెల్లడించకుండానే సురక్షితంగా రీఛార్జ్ చేసుకోవచ్చు. అదెలాగో ఇప్పుడు తెలుసుకుందాం రండి..
ఈ కవచ్ ఫీచర్ వెనుక ఉన్న ప్రధాన ఉద్దేశం వినియోగదారుల గోప్యతను కాపాడటం. మహిళా సబ్స్క్రైబర్లు ఈ సదుపాయాన్ని వాడుకున్నప్పుడు, వారి అసలు నెంబర్కు బదులుగా ఒక తాత్కాలిక 10 అంకెల నంబర్ కేటాయించబడుతుంది. మనం బ్యాంకు లావాదేవీల కోసం ఉపయోగించే OTP లాగే ఈ నెంబర్ కూడా కొంత సమయం మాత్రమే పని చేస్తుంది. రీఛార్జ్ పూర్తి కాగానే ఆ నెంబర్ దానంతట అదే రద్దవుతుంది. కాబట్టి.. దుకాణదారుల వద్ద లేదా వారి రికార్డుల్లో స్త్రీల వ్యక్తిగత నెంబర్లు నిక్షిప్తమయ్యే ప్రమాదం ఉండదు. ప్రతిసారి కొత్తగా రీఛార్జ్ చేయించుకోవాలనుకున్నప్పుడు ఈ తాత్కాలిక నెంబర్ను జనరేట్ చేసుకోవాల్సి ఉంటుంది.
Also Read: రూ.1000 లోపే వాషింగ్ మెషీన్.. మడతపెట్టి ఎక్కడికైనా పట్టుకెళ్లిపోవచ్చు!
ఈ భద్రతా ఫీచర్ను యాక్టివేట్ చేసుకోవడం చాలా ఈజీ. BSNL మహిళా వినియోగదారులు తమ ఫోన్ డయలర్ నుంచి 1500 లేదా 1800 180 1503 నంబర్కు కాల్ చేయాలి. కాల్ కలిసిన తర్వాత కస్టమర్ కేర్ ప్రతినిధితో మాట్లాడటానికి 9 నొక్కాల్సి ఉంటుంది. కవచ్ ఫీచర్ను ప్రారంభించమని కోరగానే, వారు సూచించే ప్రక్రియ ద్వారా మీ మొబైల్కు ఒక SMS వస్తుంది. అందులో ఉండే 10 అంకెల తాత్కాలిక నంబర్ను రిటైల్ స్టోర్లో ఇస్తే సరిపోతుంది. సాంకేతికతపై అవగాహన ఉన్నవారు నేరుగా BSNL సెల్ఫ్ కేర్ యాప్ ద్వారా కూడా ఈ సదుపాయాన్ని పొందవచ్చు.
చాలామంది ఆన్లైన్ ద్వారానే రీఛార్జ్ చేసుకుంటున్నప్పటికీ, మారుమూల గ్రామాలు లేదా చిన్న పట్టణాల్లో ఇప్పటికీ చాలామంది స్త్రీలు బయట షాపులపైనే ఆధారపడుతున్నారు. ముఖ్యంగా ఇంటర్నెట్ సౌకర్యం తక్కువగా ఉన్నచోట, డిజిటల్ చెల్లింపుల గురించి అవగాహన లేని వారికి ఈ కవచ్ ఫీచర్ ఎంతో ఉపయోగపడుతుంది. వ్యక్తిగత భద్రతకు పెద్దపీట వేస్తూ BSNL తీసుకొచ్చిన ఈ మార్పు మహిళా లోకానికి నిజంగా రక్షణ కవచంలా మారుతుందని చెప్పవచ్చు.
Also Read: ఒక్కసారిగా పడిపోయిన ప్రీమియం ఫ్రిడ్జ్ల ధరలు.. ఏకంగా రూ.43,000కి పైగా డిస్కౌంట్!
Share
Stuffed Bitter gourd: టేస్టీ స్టఫ్డ్ కాకరకాయ రెసిపీ.. ఇలా వండితే ఎవరికైనా నచ్చేస్తుంది
KTR: ఫిరాయింపులపై మాట్లాడే నైతిక హక్కు రాహుల్ గాంధీకి లేదు : కేటీఆర్
