బట్టలు తొడిగే రోబోట్ వచ్చేసింది.. బద్దకస్తులకు భలే వరం!

Vine Robots: చాలామంది ఉదయాన్నే ఆఫీసుకో, కాలేజీకో వెళ్లేటప్పుడు బట్టలు వేసుకోవడాన్ని పెద్ద టాస్క్‌లా ఫీలవుతుంటారు. అందులోనూ కాస్త బద్దకం ఎక్కువ ఉన్నవాళ్లయితే.. దుస్తులు తొడుక్కోవడానికి నానా తిప్పలు పడుతుంటారు. ఇలాంటి వారికి తమ చేతులతో పనిలేకుండా, ఎవరి సాయం లేకుండా దుస్తులు వాటంతట అవే మన ఒంటిపైకి వచ్చేస్తే ఎంత బాగుంటుంది? వినడానికి ఏదో సైన్స్ ఫిక్షన్ సినిమా కథలా ఉంది కదూ! కానీ ఇది నిజం. సౌత్ కొరియాకు చెందిన ప్రఖ్యాత KAIST విశ్వవిద్యాలయం, అమెరికాలోని స్టాన్‌ఫోర్డ్ యూనివర్సిటీ పరిశోధకులు కలిసి ఈ అద్భుతాన్ని సృష్టించారు.

చేతులు అక్కర్లేని సరికొత్త టెక్నాలజీ:

సాధారణంగా రోబోలు అంటే మెటల్ బాడీ, వైర్లు గుర్తుకొస్తాయి. కానీ ఈ బట్టల్లో వాడిన టెక్నాలజీ వేరు. దుస్తుల లోపల అమర్చిన ప్రత్యేకమైన Vine Robots ద్వారా ఇవి పనిచేస్తాయి. ఇవి గాలితో నడిచే మెత్తటి సాఫ్ట్ రోబోలు. మనం బటన్ నొక్కగానే ఇవి యాక్టివేట్ అయ్యి, పాకే తీగల్లాగా మన శరీరానికి అనుగుణంగా విస్తరిస్తూ బట్టలను తొడిగేస్తాయి.

కేవలం 10 సెకన్లలోనే పని పూర్తి:

ఈ బట్టలు వేసుకోవడానికి మనం గంటల తరబడి నిల్చోవాల్సిన అవసరం లేదు. కేవలం 10 సెకన్లలోనే ఈ రోబోటిక్ సూట్ మన ఒంటిని కప్పేస్తుంది. దీనికోసం ఎలాంటి సంక్లిష్టమైన ఆర్టిఫిషియల్ ఇంటెలిజెన్స్ (AI) కంట్రోల్స్ కూడా అవసరం లేదు. మనం నడుస్తున్నా లేదా కదలకుండా నిల్చున్నా.. ఏ పొజిషన్‌లో ఉన్నా సరే, ఈ దుస్తులు చాలా సులువుగా సెట్ అయిపోతాయి.

బద్దకస్తులకే కాదు.. వీరికి పెద్ద వరం:

ఈ టెక్నాలజీ కేవలం బద్దకస్తుల కోసం మాత్రమే కాదు. వృద్ధులు, శారీరక వికలాంగులు ఎవరి సాయం లేకుండా తమ పనులు తాము చేసుకోవడానికి ఇది ఎంతో ఉపయోగపడుతుంది. అలాగే అత్యవసర సమయాల్లో క్షణాల మీద స్పందించాల్సిన ఫైర్ ఫైటర్లు, విపత్తు నిర్వహణ సిబ్బంది, క్లీన్‌రూమ్ కార్మికులు తమ రక్షణ దుస్తులను వేగంగా వేసుకోవడానికి ఇదొక అద్భుతమైన ఆవిష్కరణ.

Also Read: సింగిల్ ఛార్జ్‌తో 38 గంటల బ్యాటరీ.. హువావే నుంచి బెస్ట్ ప్రీమియం ఇయర్‌బడ్స్ విడుదల!

ప్రకృతి నుంచి నేర్చుకున్న పాఠం:

ఈ అద్భుతమైన ఆలోచన పరిశోధకులకు ఎలా వచ్చిందో తెలుసా? గోడలపై, చెట్లపై పాకే ఐవీ (Ivy) అనే తీగ మొక్కలను చూసి దీనిని డిజైన్ చేశారు. ఆ మొక్కలు ఎలాగైతే ఆధారాన్ని వెతుక్కుంటూ ముందుకుసాగుతాయో.. ఈ వైన్ రోబోలు కూడా శరీరాన్ని ఆధారం చేసుకుని బట్టలను ముందుకు నెడతాయి.

ఇలాంటి బట్టలు మీరూ వేసుకుంటారా?

ప్రస్తుతం ఈ టెక్నాలజీ ఇంకా పరిశోధనల దశలోనే ఉన్నప్పటికీ.. భవిష్యత్తులో మన లైఫ్‌స్టైల్‌ను పూర్తిగా మార్చేసే సత్తా దీనికి ఉంది. బట్టలు వేసుకోవడం బోర్ కొట్టేవాళ్లకి ఇదొక ట్రెండీ గ్యాడ్జెట్‌లా మారినా ఆశ్చర్యం లేదు. మరి రేపు మార్కెట్లోకి వస్తే, చేతులు పెట్టకుండానే మిమ్మల్ని రెడీ చేసే ఇలాంటి రోబోటిక్ డ్రెస్ వేసుకోవడానికి మీరు సిద్ధమేనా?

Also Read: ఇక పిల్లల Meta AI చాట్స్‌పై నిఘా.. ఆత్మహత్య ఆలోచనలు వస్తే పేరెంట్స్‌కు అర్జెంట్ నోటిఫికేషన్!

Join WhatsApp Channel

Share

• 
• 
• 
• 
• 
•