1.5 Ton vs 2 Ton AC: వేసవి కాలం వచ్చిందంటే చాలు.. ఇళ్లలో ఏసీల వాడకం విపరీతంగా పెరిగిపోతుంది. అయితే కొత్తగా ఇల్లు కట్టుకున్న వారైనా, పాత ఏసీని మార్చాలనుకునే వారైనా ఏసీ షాపుకు వెళ్లినప్పుడు ప్రధానంగా వారిని ఓ సమస్య వెంటాడుతుంది. అదే 1.5 టన్ ఏసీ కొనాలా? లేక 2 టన్ ఏసీ కొనాలా?. చాలామంది ఎక్కువ కూలింగ్ ఇస్తుందనే అంచనాతో అవసరానికి మించిన పెద్ద ఏసీని కొనేస్తుంటారు. మరికొందరు డబ్బులు ఆదా అవుతాయని చిన్న ఏసీని తెచ్చుకుంటారు. ఈ రెండూ కూడా పొరపాటే. మీ గది పరిమాణాన్ని బట్టి ఏ ఏసీ పర్ఫెక్ట్గా సరిపోతుందో, పవర్ బిల్లు ఆదా అవుతుందో ఈ కథనంలో తెలుసుకునే ప్రయత్నం చేద్దాం.
సాధారణంగా టన్ అనగానే చాలా మందికి బరువు గుర్తుకు వస్తుంది. కానీ ఏసీల విషయంలో ‘టన్’ (Ton) అంటే ఎయిర్ కండిషనర్ బరువు కాదు. అది ఆ ఏసీ కూలింగ్ సామర్థ్యాన్ని (Cooling Capacity) సూచిస్తుంది. ఒక గదిలో ఒక టన్ను మంచు గడ్డను ఉంచితే అది ఎంత కూలింగ్ ఇస్తుందో 1 టన్ ఏసీ కూడా అంతే కూలింగ్ను ఇస్తుంది. ఈ లెక్కన 1.5 టన్, 2 టన్ ఏసీలు గదిని ఎంత వేగంగా ఎంత ఎక్కువగా చల్లబరుస్తాయనేది అర్థం చేసుకోవచ్చు.
కొత్త ఏసీ ఎంపికలో గది పరిమాణం కీలక పాత్ర పోషిస్తుందని చెప్పవచ్చు. గది వైశాల్యం 150 చదరపు అడుగుల నుండి 200 చదరపు అడుగుల లోపు ఉంటే 1.5 టన్ ఏసీ చాలా పర్ఫెక్ట్గా సరిపోతుంది. సాధారణంగా మన ఇళ్లలోని మాస్టర్ బెడ్రూమ్లు, మీడియం సైజ్ లివింగ్ రూమ్లు ఈ పరిమాణంలోనే ఉంటాయి. అలా కాకుండా గది సైజు 200 చదరపు అడుగుల కంటే ఎక్కువగా ఉంటే (పెద్ద హాల్స్, జాయింట్ రూమ్స్ వంటివి) ఖచ్చితంగా 2 టన్ ఏసీని ఎంచుకోవాలి.
గది పరిమాణంతో పాటు ఇల్లు ఉన్న పరిస్థితులను బట్టి కూడా 1.5 టన్ లేదా 2 టన్ ఏసీని ఎంచుకోవాల్సి ఉంటుంది. ఒకవేళ సూర్యరశ్మి నేరుగా పడే టాప్ ఫ్లోర్లో ఉంటున్నట్లైతే గది త్వరగా వేడెక్కే అవకాశం ఉంటుంది. అటువంటి పరిస్థితిలో 170 చదరపు అడుగుల గది ఉన్నప్పటికీ 2 టన్ ఏసీని ఎంచుకోవడం బెటర్. అదే విధంగా గదికి పడమర వైపు పెద్ద కిటికీలు ఉండి.. మధ్యాహ్నం ఎండ నేరుగా కిటికీ పై పడుతుంటే.. అక్కడ కూలింగ్ కోసం కాస్త ఎక్కువ సామర్థ్యం ఉన్న ఏసీ అవసరమవుతుంది. మరోవైపు గదిలో నిరంతరం నలుగురైదుగురు లేదా అంతకంటే ఎక్కువ మంది ఉంటే వారి శరీరం నుండి వచ్చే వేడి వల్ల కూలింగ్ తగ్గవచ్చు. కాబట్టి ఎక్కువ మంది ఉండే హాల్స్ లాంటి వాటికి 2 టన్ ఏసీనే బెటర్ ఆప్షన్ గా నిలుస్తాయి.
చాలామంది 1.5 టన్ ఏసీ కంటే 2 టన్ ఏసీతోనే అధిక కరెంటు బిల్లు వస్తుందని భయపడతారు. ఇందులో కొంత నిజం ఉన్నా.. టెక్నికల్ గా చూస్తే ఇది సరైన అభిప్రాయం కాదని నిపుణులు అంటున్నారు. ఉదాహరణకు చిన్న గదిలో 2 టన్ ఏసీ పెడితే అది చాలా వేగంగా చల్లబరిచి ట్రిప్ అవుతుంది. అదే పెద్ద గదిలో 1.5 టన్ ఏసీని పెడితే, గదిని చల్లబరచడానికి ఆ ఏసీ కంప్రెషర్ విరామం లేకుండా నిరంతరం తిరుగుతూనే ఉంటుంది. దీనివల్ల 1.5 టన్ ఏసీయే ఎక్కువ కరెంట్ బిల్లును లాగేస్తుంది. కాబట్టి గదికి తగిన ఏసీని పెట్టినప్పుడే కరెంట్ బిల్లు కంట్రోల్ లో ఉంటుందని నిపుణులు చెబుతున్నారు.
Also Read: పక్షులు తమ గూట్లో పాముల కుబుసం ఎందుకు పెట్టుకుంటాయి? అసలు విషయం తెలిస్తే మైండ్ బ్లాకే!
మార్కెట్లో బ్రాండ్ను బట్టి, స్టార్ రేటింగ్ ని బట్టి 1.5 టన్, 2 టన్ ఏసీల ధరలు మారుతుంటాయి. సాధారణంగా ఒకే బ్రాండ్లో 1.5 టన్ ఏసీ ధరతో పోలిస్తే 2 టన్ ఏసీ ధర దాదాపు రూ. 8,000 నుండి రూ. 12,000 వరకు ఎక్కువగా ఉంటుంది. కేవలం కొనేటప్పుడే కాకుండా భవిష్యత్తులో సర్వీసింగ్, రిపేర్ ఖర్చులు కూడా 2 టన్ ఏసీకి కాస్త అదనంగానే ఉంటాయి. కాబట్టి చిన్న గది కోసమైతే 1.5 టన్ ఏసీ సరిపోతుందని చెప్పవచ్చు. డబ్బు కూడా ఆదా అవుతుంది. అలా కాకుండా రూమ్ పెద్దదై ఉన్నా, టాప్ ఫ్లోర్ అయ్యి ఎండ తీవ్రత ఎక్కువగా ఉన్నా బడ్జెట్ కొంచెం పెంచుకుని 2 టన్ ఏసీ వైపు వెళ్లడమే బెస్ట్ అని నిపుణులు స్పష్టం చేస్తున్నారు.
Also Read: మీ పాత ఏసీని అమ్మాలా? ఆన్లైన్ vs ఆఫ్లైన్.. ఎక్కడ ఎక్కువ లాభం?
Share
రాహుల్కు రక్షణ కవచంలా ట్రబుల్ షూటర్స్! దక్షిణాదిన కాంగ్రెస్కు నవశకం..!!
గుడివాడలో తేల్చుకుందాం రా.. కొడాలి వ్యాఖ్యలపై ఎమ్మెల్యే వెనిగండ్ల ఫైర్, బూట్లు తుడిచిన తర్వాతే
