Vanchana OTT : ఓటీటీలోకి వచ్చేసిన కొత్త తరం కోర్టు డ్రామా… ఈ తెలుగు మూవీని ఎక్కడ చూడచ్చో తెలుసా

Vanchana OTT : తక్కువ బడ్జెట్ తో నిర్మించిన తెలుగు కోర్ట్ రూమ్ డ్రామా ‘వంచన’. ఇందులో అందరూ కొత్త నటులే ఉండటం, సరైన ప్రమోషన్స్ లేకపోవడంతో బాక్సాఫీస్ వద్ద నిరాశపరిచింది. అసలు ఇది థియేటర్లలో విడుదలైందని కూడా చాలా మందికి తెలియదు. అయితే ఈ సినిమా 2024 నవంబర్ 8న థియేటర్లలోకి వచ్చింది. అరకు వ్యాలీలోని ఒక చర్చి ఫాదర్ హత్య చుట్టూ ఈ కథ తిరుగుతుంది. ఇప్పుడు దాదాపు సంవత్సరం తరువాత ఓటీటీలోకి వస్తోంది ఈ సినిమా. ఎట్టకేలకు దీని డిజిటల్ హక్కులను నామమాత్రపు ధరకే విక్రయించినట్లు తెలుస్తోంది.

ఏ ఓటీటీలో చూడచ్చు అంటే

‘వంచన’ (Vanchana) ఒక తెలుగు క్రైమ్ థ్రిల్లర్ లీగల్ డ్రామా. 2024 నవంబర్ 8న థియేటర్లలో విడుదలైన ఈ సినిమా కు ఉమా మహేష్ మార్పు దర్శకత్వం వహించారు. అతనే ప్రధాన పాత్రలో కూడా నటించారు. సోనీ రెడ్డి, సూర్య కుమార్ భగవందాస్, ఆర్కే నాయుడు ముఖ్య పాత్రల్లో నటించారు.1 గంట 57 నిమిషాలు ఈ చిత్రం డిజిటల్ హక్కులను Sun NXT సొంతం చేసుకుంది. 2026 మార్చి 3 నుండి ఈ సినిమా స్ట్రీమింగ్ అవుతోంది. ఇక ఈ రోజుల్లో బాక్సాఫీస్ వద్ద పరాజయం పాలైన సినిమాలకు ఓటీటీలో మంచి ఆదరణ పొందుతున్నాయి. రీసెంట్ గా వచ్చిన శ్రీ చిదంబరం గారు , రోషన్ కనకాల మోగ్లీ విషయంలో కూడా అదే జరిగింది. ఇవి బాక్సాఫీస్ వద్ద పెద్దగా గుర్తింపు పొందలేదు కానీ ఓటీటీలో మంచి వ్యూస్ వచ్చాయి. ఇప్పుడు ఈ ‘వంచన’ సినిమా విషయంలో ఇలా జరిగినా ఆశ్చర్యపోనవసరం లేదు.

స్టోరీ ఏమిటంటే

అరకు వ్యాలీలోని ఒక చర్చిలో ఫాదర్ ఆండ్రూ జోసెఫ్ దారుణంగా హత్యకు గురవుతాడు. పోలీసులు ఆ ఫాదర్ దగ్గరే డ్రైవర్‌గా పనిచేసే వ్యక్తిని నిందితుడిగా అరెస్ట్ చేసి జైలుకు పంపిస్తారు. కానీ కృష్ణ (ఉమా మహేష్) అనే ఒక కుర్ర లాయర్‌కి మాత్రం ఈ కేసులో ఏదో తేడా ఉందనిపిస్తుంది. ఆ డ్రైవర్ అమాయకుడని నమ్మిన కృష్ణ, అసలు నిజం తెలుసుకోవాలని సొంతంగా ఇన్వెస్టిగేషన్ మొదలుపెడతాడు. ఈ క్రమంలో కృష్ణకు ఊహించని నిజాలు తెలుస్తాయి. పైకి ప్రశాంతంగా కనిపించే ఆ ఫాదర్ జీవితంలో ఎవరికీ తెలియని రహస్యాలు, పర్సనల్ గొడవలు ఉన్నాయని బయటపడతాయి. ఆ మర్డర్ వెనుక ఉన్న అసలు మాస్టర్ మైండ్ ఎవరు? ఆ డ్రైవర్‌ను లాయర్ ఎలా కాపాడాడు? కోర్టులో జరిగిన వాదోపవాదాల్లో గెలిచింది ఎవరు? అనే ఉత్కంఠభరితమైన మలుపులతో ఈ కథ సాగుతుంది.