Korean Web series : చిక్కుల్లో పడే చిన్ననాటి ప్రేమ… క్రేజీగా సాగే ప్రతీ ఎపిసోడ్

Korean Web series : కొరియన్ డ్రామాలంటే చెవి కోసుకుంటున్నారు ఆడియన్స్. ఇప్పుడు మనం చెప్పుకోబోయే సిరీస్ ని చూస్తే నిజమేనని అనిపిస్తుంది. ఈ సిరీస్ కొరియాలోనే కాకుండా, అంతర్జాతీయంగా కూడా సూపర్ హిట్ అయింది. ఇది చిన్నప్పుడు ఎంతో అందంగా ఉండి, పెరిగేకొద్దీ తన లుక్స్ కోల్పోయిన అమ్మాయి, చిన్నప్పుడు లావుగా ఉండి, పెద్దయ్యాక ఎంతో అందంగా మారే ఒక అబ్బాయి మధ్య సాగే కథ ఇది. చూసే కొద్దీ చూడాలనిపించే ఈ సిరీస్ ఏ ఓటీటీలో ఉంది ? దీని పేరు ఏమిటి ? అనే వివరాలను తెలుసుకుందాం పదండి.

ఎక్కడ చూడచ్చు ఈ సిరీస్ ను అంటే

ఈ కొరియన్ రొమాంటిక్ కామెడీ డ్రామా పేరు ‘షీ వాజ్ ప్రిటీ’ (She Was Pretty). ఇందులో హ్వాంగ్ జంగ్-ఇయుమ్, పార్క్ సియో-జూన్, గో జూన్-హీ, చోయి సి-వోన్ నటించారు. ఇది MBCలో 2015 సెప్టెంబర్ 16 నుండి నవంబర్ 11 వరకు ప్రసారం అయింది. ఈ సిరీస్ దేశీయంగా 18.4% హై రేటింగ్‌తో సూపర్ హిట్ కాగా, ముఖ్యంగా చైనాలో ఈ సిరీస్ ని తెగ చూశారు. ఇప్పుడు 16 ఎపిసోడ్స్ ఉన్న ఈ సిరీస్ తెలుగు డబ్బింగ్‌తో MX Player లో ఉచితంగా అందుబాటులో ఉంది.

కథలోకి వెళ్తే

హ్యే-జిన్ చిన్నప్పుడు చాలా అందంగా ఉండేది, కానీ పెరిగేకొద్దీ వాళ్ల నాన్న పోలికలు వచ్చి తన అందాన్ని కోల్పోతుంది. అదే సమయంలో ఆమె చిన్ననాటి స్నేహితుడు సుంగ్-జూన్ చిన్నప్పుడు లావుగా, చూడటానికి అంత బాగోకపోయినా.. పెద్దయ్యాక మాత్రం ఒక మోడల్‌లా అందంగా మారిపోతాడు. అతను ఒక ఫ్యాషన్ మ్యాగజైన్‌కి ఎడిటర్‌గా మారి అమెరికా నుంచి కొరియాకు వస్తాడు. తన చిన్ననాటి క్రష్ అయిన హ్యే-జిన్‌ను కలవాలని అతను ఆమెకు ఫోన్ చేస్తాడు. తన రూపాన్ని చూసి అతను ఎక్కడ రిజెక్ట్ చేస్తాడో అని భయపడి, హ్యే-జిన్ తన అందమైన స్నేహితురాలు హారిని తనలా నటించమని పంపిస్తుంది.

కట్ చేస్తే హ్యే-జిన్ ఒక ఫ్యాషన్ మ్యాగజైన్ ఆఫీసులో ఇంటర్న్‌గా చేరుతుంది. దురదృష్టవశాత్తు అదే ఆఫీసులో సుంగ్-జూన్ బాస్‌గా ఉంటాడు. తను ఎవరన్నది తెలియక సుంగ్-జూన్ ఆఫీసులో ఆమెను చాలా వింతగా చూస్తూ, తిడుతూ ఉంటాడు. మరోవైపు హ్యే-జిన్ మంచితనాన్ని చూసి ఆఫీసులోనే ఉండే షిన్-హ్యుక్ ఆమెతో ప్రేమలో పడతాడు. చివరికి ఈ గందరగోళంలో సుంగ్-జూన్‌కి అసలు విషయం ఎప్పుడు తెలిసింది? తన స్నేహితురాలే తనను మోసం చేసిందని తెలిశాక అతను ఎలా రియాక్ట్ అయ్యాడు? హ్యే-జిన్ ఎవరి ప్రేమను పొందుతుంది ? అనే విషయాలను, కొరియన్ రొమాంటిక్ కామెడీ డ్రామాను చూసి తెలుసుకోండి.