Mystery Thriller OTT : పోలీసులు మాత్రమే ఉండే కొండపై ప్రత్యక్షమయ్యే డెడ్ బాడీ… ‘ఎకో’ లాంటి మిస్టరీ థ్రిల్లర్

Mystery Thriller OTT : మలయాళ సినిమాలకు దేశంలోని నలుమూలలా అభిమానులు ఉన్నారన్న విషయం ప్రత్యేకంగా చెప్పక్కర్లేదు. తక్కువ బడ్జెట్ తో తెరకెక్కినప్పటికీ మనసును హత్తుకునే విధంగా, సహజంగా ఉండే మాలీవుడ్ సినిమాలు ఎంగేజింగ్ గా సాగుతాయి. అందుకే భాషతో సంబంధం లేకుండా వాళ్ళ సినిమాలను చూస్తూ ఉంటారు. ఈ డిమాండ్ ను దృష్టిలో పెట్టుకునే ఓటీటీ ప్లాట్ ఫామ్ లు అన్నీ భాషల్లోనూ మలయాళం సినిమాలు, సిరీస్ లను రిలీజ్ చేస్తున్నారు. ఇక మలయాళ మిస్టరీ థ్రిల్లర్స్ ను ఇష్టపడే వాళ్ల కోసమే ప్రత్యేకంగా ఈ మూవీ సజెషన్. మరి ఇప్పుడు చెప్పుకోబోయే మూవీ ఏ ఓటీటీలో ఉంది ? మూవీ పేరేంటి ? అన్న విషయాలను తెలుసుకుందాం పదండి.

అమెజాన్ ప్రైమ్ వీడియోలో స్ట్రీమింగ్

2022లో రిలీజ్ అయిన మలయాళ క్రైమ్ థ్రిల్లర్ షాహి కబీర్ డైరెక్ట్ చేసిన మూవీ ‘ఇల వీఝ పూంచిర’ (Ela Veezha Poonchira). జోసెఫ్, నయాట్టు మూవీస్ కి స్క్రిప్ట్స్ రాసిన కబీర్ ఈ సినిమాతో దర్శకుడిగా మారారు. సౌబిన్ షాహిర్, జూడ్ ఆంథనీ జోసెఫ్ ఇందులో మెయిన్ రోల్స్‌ పోషించారు. 1 గంట 44 నిమిషాలు రన్‌టైమ్ ఉన్న ఈ మూవీకి థియేటర్లలో మిక్స్డ్ రివ్యూస్ వచ్చాయి. ప్రస్తుతం ఈ మూవీ అమెజాన్ ప్రైమ్ వీడియోలో స్ట్రీమింగ్ అవుతోంది. కడాస్ అన్‌టోల్డ్ బ్యానర్‌పై విష్ణు వేణు నిర్మించిన ఈ మూవీని కేరళలోని రియల్ లొకేషన్ ఇల వీఝ పూంచిర (3200 అడుగుల ఎత్తులో ఉన్న హిల్ టాప్, లైట్నింగ్ స్ట్రైక్స్ ఎక్కువగా జరిగే ప్రదేశం)లో షూట్ చేశారు.

స్టోరీలోకి వెళ్తే…

కేరళ కొట్టాయం జిల్లాలోని ఇల వీఝ పూంచిర అనే అందమైన, ప్రమాదకరమైన హిల్ టాప్‌ చుట్టూ తిరుగుతుంది కథ. మధు (సౌబిన్ షాహిర్), సుధి (సుధి కొప్ప) మాత్రమే ఆ హిల్ స్టేషన్ లో ఉంటారు. నిజానికి అక్కడ సిగ్నల్, కరెంట్ రెండూ ఉండవు. కానీ ఈ ఇద్దరు పోలీస్ ఆఫీసర్లు అక్కడున్న చిన్న వైర్‌లెస్ పోలీస్ స్టేషన్‌ లో డ్యూటీ చేస్తారు. భారీ వర్షాలు పడుతున్న నేపథ్యంలోనే ఎవ్వరూ ఉండని ఆ కొండపై సడన్ గా ఒక మహిళ శవం కన్పిస్తుంది. ఆమె శరీర భాగాలు ఆ ప్రాంతమంతా చెల్లాచెదురుగా పడి ఉండడం గందరగోళంగా మారుతుంది.

ఇక పోలీసులు అసలు ఆ అమ్మాయి ఎవరు ? ఆమెను ఎవరు చంపారు ? అనే మిస్టరీని సాల్వ్ చేయడానికి ఇన్వెస్టిగేషన్ షురూ చేస్తారు. మరి ఇంతకీ ఈ మర్డర్ మిస్టరీని పోలీసులు ఎలా ఛేదించారు ? ఎవ్వరూ లేని ఆ కొండపై ఇలాంటి సంఘటన ఎలా చోటు చేసుకుంది ? దీనికి ఆ ఇద్దరు పోలీసులకు ఉన్న లింకు ఏంటి ? అనే ప్రశ్నలను మూవీలోనే సమాధానాలు వెతుక్కోవాలి. ఒకవేళ మీకు ‘ఎకో’ మూవీ నచ్చి ఉంటే, ఖచ్చితంగా ఈ మూవీ కూడా మెప్పిస్తుంది.