Feel good Movie OTT: కొడుకు కోసం మేకను బలి… మొక్కు తీర్చుకునేందుకు పేద రైతు అవస్థ… ఓటీటీలోకి తమిళ డ్రామా

Feel good Movie OTT : ఓటీటీలోకి మరో తమిళ సినిమా స్ట్రీమింగ్ లోకి వచ్చింది. ఈ సినిమా ఒక పేద రైతు చుట్టూ తిరుగుతుంది. అతను దేవుడికి మేకను బలి ఇస్తానని మొక్కుకుంటాడు. ఆ తరువాత స్టోరీ ఆసక్తికర మలుపులు తీసుకుంటుంది. ఈ కథ చాలా సహజ పద్దతిలో తీయడం జరిగింది. పల్లెటూరి జీవన శైలిని, అక్కడి పరిస్థితులను కళ్ళకు కట్టినట్లు చూపించారు ఇందులో. ఈ సినిమా పేరు ఏమిటి ? ఏ ఓటీటీలో స్ట్రీమింగ్ అవుతోంది ? అనే వివరాలను తెలుసుకుందాం పదండి.

ఏ ఓటీటీలో స్ట్రీమింగ్ అవుతుందంటే

‘ఒండిమునియుమ్ నల్లపాడనుమ్’ (Ondimuniyum Nallapadanum) 2025లో విడుదలైన ఒక తమిళ డ్రామా సినిమా. ఈ చిత్రం కొంగు ప్రాంతంలోని గ్రామీణ జీవనశైలి, దైవభక్తి చుట్టూ తిరుగుతుంది. 2025 నవంబర్ 28న థియేటర్లలో రిలీజ్ అయింది ఈ సినిమా. 2026 ఫిబ్రవరి 20 నుండి Sun NXT ప్లాట్‌ఫామ్‌లో అందుబాటులో ఉంది. సుగవనం .ఆర్ దర్శకత్వం వహించిన ఈ సినిమాలో పరోటా మురుగేషన్, విజయన్ దియా, విద్యా శక్తివేల్ ప్రధాన పాత్రలు పోషించారు. దీనికి సంగీతం నటరాజన్ శంకరన్ అందించారు.

స్టోరీ ఏమిటంటే

ఒక మారుమూల గ్రామంలో నల్లపాడన్ అనే ఒక పేద రైతు ఉంటాడు. తన కొడుకు ప్రాణాపాయం నుండి కోలుకున్నందుకు మొక్కుగా, తమ కులదైవం ఒండిమునికి తన మేకను బలి ఇస్తానని మొక్కుకుంటాడు. అయితే అదే సమయంలో ఆ ఊరిలోని ఇద్దరు పెద్దల మధ్య గొడవలు మొదలవుతాయి. దీనివల్ల గ్రామంలోని గుడి మూతపడటమే కాకుండా, అక్కడ ఎటువంటి పండుగలు, పూజలు జరగకుండా ఆగిపోతాయి. తన మొక్కును తీర్చుకోవాలని నల్లపాడన్ ఎంత ప్రయత్నించినా, ఊరి పెద్దల అహంకారం, కుల రాజకీయాలు అతనికి అడ్డుపడతాయి. ఒక మామూలు రైతు తన మొక్కును తీర్చుకోవడానికి, ఆ ఊరిలో ఉన్న గొడవలను దాటుకుని ఎలా వెళ్ళాడు ? తన మొక్కును ఎలా తీర్చుకున్నాడు ? అసలు ఆ ఊరిలో ఉన్న గొడవలు ఏమిటి ? అనే విషయాలను, ఈ తమిళ సినిమాను చూసి తెలుసుకోవాల్సిందే.