Fantasy Drama OTT : గ్రూట్ తో గేమ్సా ? మజా ఇచ్చే సూపర్ హీరో సిరీస్… చిన్న పిల్లలకు పండగే

Fantasy Drama OTT : ‘గార్డియన్స్ ఆఫ్ ది గెలాక్సీ’ సినిమాలోని ‘బేబీ గ్రూట్’ చేసే అల్లరి పనులతో ఒక షార్ట్ సిరీస్ ఓటీటీలో సందడి చేసింది. 2022లో విడుదలైన మొదటి సీజన్‌లో మొత్తం 5 ఎపిసోడ్లు ఉన్నాయి. ఒక్కో ఎపిసోడ్ సుమారు 5 నిమిషాల నిడివి ఉంటుంది. మార్వెల్ స్టూడియోస్ నిర్మించిన ఈ యానిమేటెడ్ అందరినీ ఆకట్టుకుంటుంది. ఇది ఏ ఓటీటీలో ఉంది ? దీని కథ ఏమిటి ? అనే ఇవరాల్లోకి వెళ్తే …

స్ట్రీమింగ్ ఎందులో అంటే

మార్వెల్ స్టూడియోస్ నిర్మించిన ఈ యానిమేటెడ్ షార్ట్ ఫిలిమ్స్ సిరీస్ పేరు ‘ఐ యామ్ గ్రూట్’ (I Am Groot). ఇది 2022 ఆగస్టు 10న Jio Hotstarలో విడుదలైంది. గ్రూట్ పాత్రకు విన్ డీజిల్ వాయిస్ అందించారు. రాకెట్ రాకూన్ పాత్రలో బ్రాడ్లీ కూపర్ కనిపిస్తారు. కిర్‌స్టన్ లెపోర్ ఈ సిరీస్‌ను డైరెక్ట్ చేశారు. ఈ సిరీస్ చాలా సరదాగా, పిల్లల నుండి పెద్దల వరకు అందరినీ ఆకట్టుకునేలా ఉంటుంది. దీనికి కొనసాగింపుగా సెప్టెంబర్ 2023లో సీజన్ 2 కూడా విడుదలైంది.

స్టోరీ ఏమిటంటే

ఈ కథ బేబీ గ్రూట్ తన బాల్యంలో ఎదుర్కొన్న వింత అనుభవాల చుట్టూ తిరుగుతుంది. మొదటి ఎపిసోడ్‌లో కుండలో నుండి బయటపడి గ్రూట్ మొదటిసారి నడక నేర్చుకోగా, ఆ తర్వాత వేరే గ్రహంపై ఉన్న అతి చిన్న జీవులైన ‘గ్రండెల్స్’ ని కలుస్తాడు. స్పేస్ షిప్‌లో ఒంటరిగా ఉన్న సమయంలో తన రూపాన్ని మార్చుకోగలిగే ఒక వింత గ్రహాంతరవాసితో డ్యాన్స్ పోటీ పడటం, బురద స్నానం చేస్తూ తన ఒంటిపై పెరిగే ఆకులతో రకరకాల గెటప్‌లు మార్చుకోవడం వంటి సరదా సన్నివేశాలతో ఈ సిరీస్ సాగుతుంది.

చివరిగా గ్రూట్ తన గార్డియన్స్ బృందం (స్టార్-లార్డ్, గామోరా, డ్రాక్స్, రాకెట్) కోసం ఒక అందమైన చిత్రాన్ని గీయాలని నిర్ణయించుకుంటాడు. దానికోసం షిప్‌లోని వస్తువులన్నీ చిందరవందర చేస్తూ, పేలుళ్లు సృష్టిస్తూ ఒక చిత్రాన్ని సిద్ధం చేస్తాడు. తన అల్లరితో రాకెట్ రాకూన్‌ను ముప్పతిప్పలు పెట్టినప్పటికీ, చివరికి గ్రూట్ గీసిన ఆ బొమ్మను చూసి రాకెట్ మురిసిపోవడంతో ఈ చిన్న కథల సిరీస్ ముగుస్తుంది.