ఢిల్లీ, పంజాబ్, హర్యానాలో ఆరెంజ్ అలర్ట్ జారీ.. ఉత్తరాది రాష్ట్రాల్లో భారీ వర్షాలు, వడగండ్ల వానల హెచ్చరిక!

IMD Orange Alert Northwest India: దేశంలో Western Disturbances కారణంగా పలు ఉత్తర, వాయువ్య రాష్ట్రాల్లో భారీ వర్షాలు, పిడుగులు వడగండ్ల వానలు కురిసే అవకాశం ఉందని భారత వాతావరణ శాఖ హెచ్చ‌రించింది. ఈ వాతావరణ మార్పుల వల్ల ఎండల తీవ్రత తగ్గి, ఉష్ణోగ్రతలు సాధారణం కంటే 3-5°C మేర తగ్గే అవకాశం ఉందని వాతావరణ కేంద్రం వెల్లడించింది.

ఈ మార్పులు ఏప్రిల్ 1 నుండి ప్రారంభమై ఏప్రిల్ 7 వరకు కొనసాగుతాయని అంచనా. ప్రధానంగా ఏప్రిల్ 3, 4 తేదీల్లో వాతావరణ తీవ్రత అత్యధికంగా ఉంటుందని ఐఎండీ హెచ్చరించింది. ఏప్రిల్ 3, 4, 7 తేదీల్లో భారీ వర్షాలు లేదా మంచు కురిసే అవకాశం ఉంది. కొన్ని చోట్ల వడగండ్ల వానలు కురిసే ప్రమాదం ఉన్నందున ఆరెంజ్ అలర్ట్ జారీ చేశారు. ఏప్రిల్ 3 నుండి 5 వరకు వర్షాలు, పిడుగులతో కూడిన వాతావరణం ఉంటుంది.

ఏప్రిల్ 3, 4 తేదీల్లో ఉరుములు, మెరుపులతో కూడిన తేలికపాటి నుండి మోస్తరు వర్షాలు కురుస్తాయి. గంటకు 40-50 కి.మీ వేగంతో బలమైన గాలులు వీచే అవకాశం ఉంది. కొన్ని చోట్ల వడగళ్లు పడే అవకాశం ఉంది.ఏప్రిల్ 1 నుండి రాజస్థాన్‌లో వర్ష సూచన ఉంది. పశ్చిమ ఉత్తరప్రదేశ్‌లో ఏప్రిల్ 4, 5 తేదీల్లో వడగండ్ల వానలు కురిసే అవకాశం ఉంది.

ఈ అకాల వర్షాలు, వడగండ్ల వల్ల కోత దశలో ఉన్న గోధుమ, ఆవాలు వంటి రబీ పంటలకు నష్టం వాటిల్లే ప్రమాదం ఉంది. ఇప్పటికే కోసిన పంటను సురక్షిత ప్రాంతాలకు తరలించాలని, తోటలను కాపాడుకోవడానికి వడగండ్ల వలలను వాడాలని వ్యవసాయ నిపుణులు సూచిస్తున్నారు. వర్షాలు, గాలుల వల్ల ఢిల్లీ-ఎన్‌సీఆర్ పరిధిలో ట్రాఫిక్ అంతరాయాలు కలిగే అవకాశం ఉంది. పిడుగులు పడే సమయంలో చెట్ల కింద లేదా విద్యుత్ స్తంభాల వద్ద ఉండవద్దని వాతావరణ శాఖ హెచ్చరించింది.