Shubhanshu Shukla: వింగ్ కమాండర్ శుభాంశు శుక్లాకు అత్యున్నత సైనిక గౌరవం!

Shubhanshu Shukla: భారతదేశ ప్రతిష్ఠాత్మక అంతరిక్ష యాత్ర ‘గగన్‌యాన్’ వ్యోమగామి, వింగ్ కమాండర్ శుభాంశు శుక్లాను శాంతికాలంలో ఇచ్చే అత్యున్నత సైనిక పురస్కారం ‘అశోక చక్ర’ వరించనుంది. తన వృత్తి పట్ల అంకితభావం, అసాధారణ సాహసాన్ని గుర్తించిన భారత ప్రభుత్వం ఆయనను ఈ పురస్కారానికి ఎంపిక చేసినట్లు సమాచారం. ఢిల్లీలో జరిగే గణతంత్ర వేడుకల్లో భాగంగా రేపు ఆయన ఈ గౌరవాన్ని అందుకోనున్నారు. ఇప్పటికే 2019లో ఆయన ప్రదర్శించిన ధైర్యసాహసాలకు గానూ ‘శౌర్య చక్ర’ లభించగా, ఇప్పుడు అశోక చక్ర దక్కడం ఆయన ప్రతిభకు నిదర్శనం

ఉత్తరప్రదేశ్‌లోని లక్నోలో జన్మించిన శుభాంశు శుక్లా, నేషనల్ డిఫెన్స్ అకాడమీ (NDA) ద్వారా వాయుసేనలో చేరారు. 2006లో ఫైటర్ పైలట్‌గా తన ప్రస్థానాన్ని ప్రారంభించిన ఆయన, సుఖోయ్-30 MKI వంటి శక్తివంతమైన యుద్ధ విమానాలను నడపడంలో దిట్ట. దాదాపు 2,000 గంటలకు పైగా విమానాలను నడిపిన అపార అనుభవం ఆయనకు ఉంది. గగన్‌యాన్ మిషన్ కోసం ఎంపికైన నలుగురు వ్యోమగాముల్లో ఒకరిగా నిలిచిన ఆయన, ప్రస్తుతం అమెరికాకు చెందిన యాక్సియమ్-4 (Axiom-4) మిషన్ కోసం ప్రైమరీ ఆస్ట్రోనాట్‌గా ఎంపికై అంతర్జాతీయ అంతరిక్ష కేంద్రానికి (ISS) వెళ్లిన తొలి భారతీయ వ్యోమగామిగా రికార్డు సృష్టించారు.

ఐఎస్ఎస్‌లో ఉన్న సమయంలో శుక్లా కీలక శాస్త్రీయ ప్రయోగాలు చేశారు. శూన్య గురుత్వాకర్షణ స్థితిలో మానవ కండరాలు, జీర్ణవ్యవస్థ పనితీరుపై లోతైన అధ్యయనాలు చేయడమే కాకుండా, వ్యోమగాముల మానసిక ఆరోగ్యంపై కూడా పరిశోధనలు నిర్వహించారు. అంతరిక్ష రంగంలో భారతదేశ కీర్తిని విశ్వవ్యాప్తం చేయడంలో ఆయన పోషించిన పాత్ర వెలకట్టలేనిది.

అంతర్జాతీయ అంతరిక్ష కేంద్రానికి చేపట్టే అత్యంత ప్రతిష్ఠాత్మకమైన ప్రైవేట్ వ్యోమగామి మిషన్లలో యాక్సియమ్-4 ఒకటి. ఈ మిషన్ ద్వారా వింగ్ కమాండర్ శుభాంశు శుక్లా అంతర్జాతీయ అంతరిక్ష కేంద్రానికి వెళ్లే ప్రైమరీ వ్యోమగామిగా ఎంపికయ్యారు. భారత్ తరపున ఇద్దరు వ్యోమగాములు శిక్షణ పొందగా, శుక్లా ప్రధాన వ్యోమగామిగా, ప్రశాంత్ బాలకృష్ణన్ నాయర్ బ్యాకప్‌గా ఉన్నారు.