TVK Chief Vijay: టార్గెట్ విజయ్? ఎన్నికల వేళ సీబీఐ విచారణ.. వెనుక ఉన్నదెవరు?

TVK Chief Vijay: కరూర్ తొక్కిసలాట ఘటనకు సంబంధించి TVK అధినేత, నటుడు విజయ్ నేడు ఢిల్లీలోని సీబీఐ ప్రధాన కార్యాలయంలో విచారణకు హాజరుకానున్నారు. ఈ కేసుకు సంబంధించి ఇప్పటికే రెండుసార్లు (జనవరి 12, 19 తేదీల్లో) విచారణ ఎదుర్కొన్న ఆయనకు, సీబీఐ ఈ నెల 10న మరోసారి నోటీసులు జారీ చేసింది. వాస్తవానికి విజయ్ 15 రోజుల గడువు కోరినప్పటికీ, దర్యాప్తు సంస్థ నేడే హాజరుకావాలని స్పష్టం చేయడంతో ఆయన విచారణకు సిద్ధమయ్యారు.

కరూర్ విషాదం..
గతేడాది సెప్టెంబర్ 27న కరూర్-ఈరోడ్ హైవేపై వెలుస్వామిపురంలో TVK పార్టీ నిర్వహించిన బహిరంగ సభలో తీవ్ర విషాదం చోటుచేసుకుంది. విజయ్ పర్యటనలో భాగంగా జరిగిన ఈ కార్యక్రమంలో ఊహించని రీతిలో జనసందోహం పెరిగిపోవడంతో తొక్కిసలాట జరిగింది. ఈ దుర్ఘటనలో 9 మంది పిల్లలు, 18 మంది మహిళలతో సహా మొత్తం 41 మంది ప్రాణాలు కోల్పోయారు. విజయ్ రాక ఏడు గంటల పాటు ఆలస్యం కావడం, సరైన రక్షణ ఏర్పాట్లు లేకపోవడం వల్లే ఈ ఘోరం జరిగిందని అప్పట్లో ఆరోపణలు వచ్చాయి.

సుప్రీంకోర్టు ఆదేశాలతో రంగంలోకి సీబీఐ
ప్రారంభంలో ఈ కేసును రాష్ట్ర సిట్ (SIT) దర్యాప్తు చేసినప్పటికీ, బాధితులకు న్యాయం జరగాలంటే స్వతంత్ర సంస్థతో విచారణ జరిపించాలని సుప్రీంకోర్టులో పిటిషన్లు దాఖలయ్యాయి. “దేశ మనస్సాక్షిని కలిచివేసిన ఘటన”గా దీనిని అభివర్ణించిన సుప్రీంకోర్టు, గతేడాది అక్టోబర్‌లో ఈ కేసును సీబీఐకి అప్పగించింది. మాజీ న్యాయమూర్తి జస్టిస్ అజయ్ రస్తోగి నేతృత్వంలోని కమిటీ ఈ దర్యాప్తును పర్యవేక్షిస్తోంది.

నేటి విచారణలో కీలక అంశాలు
నేటి విచారణలో సీబీఐ అధికారులు విజయ్‌ను ప్రధానంగా మూడు అంశాలపై ప్రశ్నించే అవకాశం ఉంది:

1. సభ నిర్వహణలో జరిగిన లోపాలు, అనుమతించిన దానికంటే ఎక్కువ మందిని సమీకరించడం.

2. విజయ్ రాక ఆలస్యం కావడం వల్ల పెరిగిన రద్దీని నియంత్రించడంలో పార్టీ వాలంటీర్ల వైఫల్యం.

3. గతంలో ఇచ్చిన స్టేట్‌మెంట్లలో ఉన్న వైరుధ్యాలు, కొత్తగా సేకరించిన వీడియో ఆధారాలపై వివరణ.

రాజకీయ కుట్ర అని టీవీకే ఆరోపణ
తమిళనాడు అసెంబ్లీ ఎన్నికలు సమీపిస్తున్న తరుణంలో, విజయ్ పెరుగుతున్న ప్రజాదరణను చూసి ఓర్వలేకనే కావాలని విచారణల పేరుతో ఇబ్బంది పెడుతున్నారని TVK శ్రేణులు మండిపడుతున్నాయి. ఎన్నికల పనుల్లో బిజీగా ఉన్నామని, గడువు కావాలని కోరినా నిరాకరించడం వెనుక రాజకీయ ప్రేరేపిత కారణాలు ఉన్నాయని వారు ఆరోపిస్తున్నారు. ఇప్పటికే ఈ కేసులో కరూర్ డీఎంకే ఎమ్మెల్యే సెంథిల్ బాలాజీకి కూడా సీబీఐ నోటీసులు ఇవ్వడం గమనార్హం.

Also Read: కుటుంబ రాజకీయాలపై మాజీ ఉప‌రాష్ట్ర‌ప‌తి వెంకయ్య నాయుడు కీల‌క‌ వ్యాఖ్యలు!

దర్యాప్తులో పురోగతి
ప్రస్తుతం ఈ విచారణ అత్యంత కీలక దశకు చేరుకుంది. సీబీఐ సేకరించిన మొబైల్ వీడియోలు, సీసీటీవీ ఫుటేజీలు, ఇతర ఆధారాలను విజయ్ ముందు ఉంచి ప్రశ్నలు సంధించనున్నారు. ఈ విచారణ అనంతరం సీబీఐ తన మధ్యంతర నివేదికను సుప్రీంకోర్టుకు సమర్పించాల్సి ఉంది. బాధితుల కుటుంబాలకు న్యాయం జరగాలని ఒకవైపు, రాజకీయంగా విజయ్‌ను అడ్డుకునే ప్రయత్నం జరుగుతోందని మరోవైపు వాదనలు వినిపిస్తున్నాయి.

నేడు సీబీఐ విచారణకు టీవీకే చీఫ్ విజయ్

కరూర్ తొక్కిసలాట ఘటనపై విచారణకు హాజరుకావాలని ఈ నెల 10న విజయ్ కు నోటీసులు జారీ చేసిన సీబీఐ

2025 సెప్టెంబర్ 27న జరిగిన కరూర్ తొక్కిసలాట ఘటనలో 41 మంది చనిపోవడంతో సుప్రీంకోర్టు ఆదేశాలతో దర్యాప్తు చేస్తున్న సీబీఐ

సుప్రీంకోర్టు ఆదేశాలతో ఇప్పటికే… https://t.co/SaJr9Ok1lp pic.twitter.com/zITm58S6Gb

— BIG TV Breaking News (@bigtvtelugu) March 15, 2026