Toxic: పోటీ ఉన్నా సరే.. టాక్సిక్ పై డిస్ట్రిబ్యూటర్ల భారీ నమ్మకం.. ఎందుకంటే?

Toxic: కన్నడ స్టార్ హీరో యష్ చాలా గ్యాప్ తర్వాత భారీ సినిమాతో ప్రేక్షకుల ముందుకు రావడానికి సిద్ధమవుతున్నారు. ఆ సినిమా పేరు టాక్సిక్: ఎ ఫెయిరీ టేల్ ఫర్ గ్రోన్-అప్స్. ఇది యాక్షన్ డ్రామా చిత్రంగా తెరకెక్కుతోంది. 2026 ఈద్ సందర్భంగా థియేటర్లలో విడుదల చేయనున్నట్లు ఇప్పటికే ప్రకటించారు. ఈ ప్రకటనతోనే అభిమానుల్లో భారీ అంచనాలు ఏర్పడ్డాయి.

ఈ సినిమాపై ఇప్పుడు ట్రేడ్ వర్గాల్లో పెద్ద చర్చ నడుస్తోంది. కారణం… అదే రోజున మరో భారీ సినిమా ధురంధర్ పార్ట్ 2: రివెంజ్ కూడా విడుదల కానుంది. రెండు పెద్ద సినిమాలు ఒకేసారి రావడం వల్ల బాక్సాఫీస్ వద్ద పోటీ ఎలా ఉంటుందన్న ఆసక్తి పెరిగింది. అయినప్పటికీ, చాలా మంది ఎగ్జిబిటర్లు ‘టాక్సిక్’పై భారీగా ఆశలు పెట్టుకున్నారు

కారణమేమిటంటే..!

‘టాక్సిక్’పై ఈ స్థాయి నమ్మకం రావడానికి ప్రధాన కారణం యష్ పేరు. ఆయన చివరిగా నటించిన కేజీఎఫ్: చాప్టర్ 2 దేశవ్యాప్తంగా సరికొత్త రికార్డులు సృష్టించింది. ముఖ్యంగా హిందీ బెల్ట్‌లో యష్‌కు బలమైన అభిమాన వర్గం ఏర్పడింది. ఆ సినిమా తర్వాత యష్ ఏ సినిమా చేయకపోవడం కూడా ఇప్పుడు ప్లస్‌గా మారిందని ట్రేడ్ వర్గాలు భావిస్తున్నాయి. ఇంత గ్యాప్ తర్వాత వస్తున్న సినిమా కావడంతో ప్రేక్షకుల్లో ఆసక్తి మరింత పెరిగిందని చెబుతున్నారు.

ఇండస్ట్రీలోని పలువురు ఎగ్జిబిటర్లు కూడా ఇదే అభిప్రాయం వ్యక్తం చేస్తున్నారు. పశ్చిమ బెంగాల్‌కు చెందిన ఎగ్జిబిటర్ సతదీప్ సహా మాట్లాడుతూ, హిందీ మార్కెట్‌లో యష్‌కు ఉన్న క్రేజ్ ‘టాక్సిక్’కు పెద్ద బలమని తెలిపారు. అలాగే ట్రేడ్ అనలిస్ట్ అక్షయ్ రాథీ మాట్లాడుతూ, కేజీఎఫ్ 2 సమయంలో వచ్చిన యష్ ఫ్యాన్ ఫాలోయింగ్ ఇప్పటికీ తగ్గలేదని అన్నారు. యష్‌కు దేశవ్యాప్తంగా కల్ట్ ఫాలోయింగ్ ఉందని స్పష్టం చేశారు.

ముంబైకి చెందిన ప్రముఖ ఎగ్జిబిటర్ మనోజ్ దేశాయ్ కూడా ఇదే అభిప్రాయం వ్యక్తం చేశారు. ఉత్తర భారత మార్కెట్లలో యష్ ట్రాక్ రికార్డ్‌ను తక్కువగా అంచనా వేయకూడదని అన్నారు. ఈద్ పండుగ సీజన్ కావడంతో థియేటర్లకు వచ్చే ప్రేక్షకుల సంఖ్య ఎక్కువగా ఉంటుందని అంచనా వేస్తున్నారు.

పోటీ ఉన్నా సరే ‘టాక్సిక్’ బలమైన ఓపెనింగ్ సాధిస్తుందన్న నమ్మకం ట్రేడ్ వర్గాల్లో స్పష్టంగా కనిపిస్తోంది. రాకీ భాయ్ మ్యాజిక్ మళ్లీ రిపీట్ అవుతుందా లేదా అనేది సినిమా విడుదలైన తర్వాతే తెలుస్తుంది. కానీ ప్రస్తుతం మాత్రం యష్ ‘టాక్సిక్’పై అంచనాలు ఆకాశాన్ని తాకుతున్నాయి.

ALSO READ: Rukmini: ‘రుక్మిణి’కి మంచు మనోజ్ సపోర్ట్.. ఏం చేశారంటే?