Shiva Rajkumar: కన్నడ ముద్దుగుమ్మల పోరాటానికి శివన్న మద్దతు!

Shiva Rajkumar:సినిమా వేడుకల్లో నటీమణుల ప్రతిభను చూడాల్సింది పోయి, కొందరు కెమెరామెన్లు వారి శరీర భాగాలను అసభ్యకరంగా జూమ్ చేస్తూ వీడియోలు తీయడం ఇప్పుడు ఇండస్ట్రీలో పెను వివాదానికి దారితీసింది. ఈ ‘జూమ్ కల్చర్’పై కన్నడ బ్యూటీ సప్తమి గౌడ తీవ్ర స్థాయిలో నిప్పులు చెరిగారు. ప్రొఫెషనల్ జర్నలిజం పేరుతో జరుగుతున్న ఈ దిగజారుడు పనులపై ఆమె చేసిన పోరాటానికి కన్నడ కంఠీరవ శివ రాజ్‌కుమార్ మద్దతుగా నిలవడంతో ఈ అంశం ఇప్పుడు దేశవ్యాప్తంగా చర్చనీయాంశమైంది. ఆ వివరాల లోకి వెళితే ..

బాడీ ఆబ్జెక్టిఫికేషన్‌పై సప్తమి గౌడ సమరం:

నటీమణులు ఏదైనా ఈవెంట్‌కు వచ్చినప్పుడు వారి డ్రెస్సింగ్‌ను లేదా శరీర భాగాలను అసభ్యంగా చిత్రీకరించి, సోషల్ మీడియాలో వ్యూస్ కోసం వైరల్ చేసే ధోరణి ఇటీవల ఎక్కువైంది. ఇక దీనిపై సప్తమి గౌడ స్పందిస్తూ.. మహిళలను కేవలం ఒక వస్తువుగా చూడటం (Body Objectification) ఆపాలని డిమాండ్ చేశారు. ప్రొఫెషనల్ కెమెరామెన్లు ఇలాంటి పనులకు పాల్పడటం సిగ్గుచేటని ఆమె ఆగ్రహం వ్యక్తం చేశారు. ఇక గతంలో జాన్వీ కపూర్, మృణాల్ ఠాకూర్ వంటి నటీమణులు కూడా ఇలాంటి చేదు అనుభవాలను ఎదుర్కొన్న తరుణంలో సప్తమి గళం విప్పడం ప్రాధాన్యత సంతరించుకుంది.

తోడైన శివన్న గళం:

సప్తమి గౌడకు మద్దతుగా కన్నడ స్టార్ హీరో శివ రాజ్‌కుమార్ ఒక ఘాటైన లేఖను విడుదల చేశారు. “మహిళలను గౌరవించడం అనేది మన సంస్కారం.. నటీమణులను వస్తువులుగా చూడటం ఆపేయండి” అంటూ ఆయన హితవు పలికారు. ఆయన కుమార్తె నివేదిత రాజ్‌కుమార్ కూడా ఈ ధోరణిని తప్పుబట్టారు. శివన్న పిలుపుతో #ActorsNotObjects అనే హ్యాష్‌ట్యాగ్ సోషల్ మీడియాలో ట్రెండింగ్‌లోకి వచ్చింది. రుక్మిణి వసంత్, ఆషిక రంగనాథ్ వంటి ఇతర నటీమణులు కూడా సప్తమికి మద్దతుగా నిలుస్తూ ఈ అసభ్యకర జూమ్ కల్చర్‌కు వ్యతిరేకంగా గళం విప్పుతున్నారు.

also read:Ustaad Bhagat Singh: బుక్ మై షో లో ఫ్యాన్స్ కి నిరాశ.. టెన్షన్ పెడుతున్న ఉస్తాద్!

జర్నలిజం ముసుగులో వికృత చేష్టలు:

కేవలం వ్యూస్ కోసం, లైకుల కోసం నటీమణుల ఆత్మగౌరవాన్ని దెబ్బతీసేలా ప్రవర్తించడం జర్నలిజం అనిపించుకోదని నెటిజన్లు సైతం అభిప్రాయపడుతున్నారు. మీడియా ప్రతినిధులుగా బాధ్యతాయుతంగా వ్యవహరించాల్సింది పోయి, ఇలాంటి వికృత చేష్టలకు పాల్పడటం వల్ల పరిశ్రమకే చెడ్డపేరు వస్తుందని సినీ పెద్దలు ఆందోళన వ్యక్తం చేస్తున్నారు. ఇక సప్తమి గౌడ చేపట్టిన ఈ పోరాటం కేవలం నటీమణుల కోసమే కాదు, సమాజంలో మహిళల పట్ల ఉండే దృక్పథం మారడానికి ఒక అడుగు అని విశ్లేషకులు భావిస్తున్నారు. ఈ మార్పు తక్షణమే రావాలని ఇండస్ట్రీ మొత్తం ముక్తకంఠంతో కోరుతోంది. గ్లామర్ ఫీల్డ్‌లో ఉన్నంత మాత్రాన ఎవరికీ నచ్చినట్లు ప్రవర్తించే హక్కు లేదని సప్తమి గౌడ నిరూపించారు. శివన్న లాంటి పెద్దలు తోడవ్వడం ఈ పోరాటానికి మరింత బలాన్నిచ్చింది.