డైరెక్టర్ పవన్ సాధినేనికి బర్త్‌డే విషెస్.. ‘ఆకాశంలో ఒక తార’ మేకర్స్ క్రేజీ పోస్ట్ వైరల్!

Pawan Sadineni: టాలీవుడ్‌లో విలక్షణమైన కథలతో తనకంటూ ఒక ప్రత్యేక గుర్తింపు తెచ్చుకున్న దర్శకుడు పవన్ సాధినేని ఈరోజు (మే 25) పుట్టినరోజు జరుపుకుంటున్నారు. ఈ సందర్భంగా ఆయనకు సినీ ప్రముఖులతో పాటు అభిమానులు సోషల్ మీడియా వేదికగా శుభాకాంక్షలు తెలుపుతున్నారు. ఈ క్రమంలోనే ఆయన దర్శకత్వంలో రూపుదిద్దుకుంటున్న మోస్ట్ అవేటెడ్ మూవీ ‘ఆకాశంలో ఒక తార’ చిత్ర బృందం ఆయనకు ప్రత్యేకంగా బర్త్‌డే విషెస్ అందించింది. ఈ ప్రాజెక్ట్‌ను ప్రతిష్టాత్మకంగా నిర్మిస్తున్న మేకర్స్, సోషల్ మీడియా ద్వారా పవన్ సాధినేనికి శుభాకాంక్షలు తెలుపుతూ ఒక క్రేజీ క్యాప్షన్‌ను జోడించారు.

“మా ‘స్టార్‌’ను వెండితెరపై అత్యంత అందంగా చూపించబోతున్న మా డైరెక్టర్ పవన్ సాధినేనికి జన్మదిన శుభాకాంక్షలు. ‘ఆకాశంలో ఒక తార’ చిత్రం ఖచ్చితంగా ప్రేక్షకుల హృదయాలకు చాలా దగ్గరగా నిలిచిపోతుంది” అంటూ చిత్ర యూనిట్ ఎమోషనల్ నోట్‌ను షేర్ చేసింది. ప్రస్తుతం ఈ పోస్ట్ నెట్టింట తెగ వైరల్ అవుతోంది. మలయాళ స్టార్ హీరో అయినప్పటికీ ‘మహానటి’, ‘సీతారామం’ చిత్రాలతో తెలుగు వారి గుండెల్లో ‘మన హీరో’గా స్థానం సంపాదించుకున్న దుల్కర్ సల్మాన్ ఈ సినిమాలో కథానాయకుడిగా నటిస్తున్నారు. ఆయన సరసన స్టార్ బ్యూటీ శ్రుతి హాసన్ హీరోయిన్‌గా నటిస్తోంది.

ఈ సినిమాపై అంచనాలు భారీగా ఉండటానికి మరో ముఖ్య కారణం.. టాలీవుడ్ అగ్ర నిర్మాణ సంస్థలు ఈ ప్రాజెక్ట్ కోసం చేతులు కలపడమే. గీతా ఆర్ట్స్ (Geetha Arts), స్వప్న సినిమా (Swapna Cinema), మరియు లైట్‌బాక్స్ మీడియా సంయుక్తంగా ఈ క్రేజీ ప్రాజెక్ట్‌ను నిర్మిస్తున్నాయి. ‘ప్రేమ ఇష్క్ కాదల్’, ‘సావిత్రి’ సినిమాలతో పాటు రీసెంట్‌గా ‘దయా’ వెబ్ సిరీస్‌తో బ్లాక్‌బస్టర్ సక్సెస్ అందుకున్న పవన్ సాధినేని, ఈ చిత్రాన్ని ఒక ప్యూర్ ఎమోషనల్ డ్రామాగా తెరకెక్కిస్తున్నట్లు తెలుస్తోంది. ఈ చిత్రానికి టాలెంటెడ్ కంపోజర్ జి.వి. ప్రకాష్ కుమార్ సంగీతం అందిస్తుండగా, సుజిత్ సారంగ్ సినిమాటోగ్రాఫర్‌గా బాధ్యతలు నిర్వహిస్తున్నారు. టైటిల్ అనౌన్స్‌మెంట్ నుంచే పాజిటివ్ వైబ్స్ క్రియేట్ చేసిన ఈ సినిమా, తాజా బర్త్‌డే అప్‌డేట్‌తో ప్రేక్షకుల్లో మరిన్ని అంచనాలను పెంచేసింది. ప్రస్తుతం ఈ సినిమా షూటింగ్ శరవేగంగా జరుపుకుంటోంది.