Manchu family:మంచు ఫ్యామిలీలో గొడవలు సర్దుమణగలేదా?

Manchu family:టాలీవుడ్ సీనియర్ నటుడు మోహన్ బాబు (Mohan Babu) కుటుంబం అనగానే క్రమశిక్షణ, ఐకమత్యం గుర్తుకు వస్తాయి. కానీ గత కొంతకాలంగా మంచు బ్రదర్స్ మధ్య జరుగుతున్న కోల్డ్ వార్ సోషల్ మీడియాలో హాట్ టాపిక్‌గా మారింది. తాజాగా మంచు లక్ష్మి (Manchu Lakshmi) కూతురు విద్యా నిర్వాణ (Vidhya Nirvana) హాఫ్ శారీ ఫంక్షన్ వేడుకలో మంచు మనోజ్ (Manchu Manoj) సందడి చేయగా, కుటుంబంలోని మిగతా సభ్యులు గైర్హాజరు కావడం ఇప్పుడు పెద్ద చర్చకు దారితీసింది. అసలు మంచు ఫ్యామిలీలో ఏం జరుగుతోంది?..

మేనకోడలు ఫంక్షన్‌లో మనోజ్ సందడి:

మంచు లక్ష్మి తన ముద్దుల కూతురు విద్యా నిర్వాణ హాఫ్ శారీ ఫంక్షన్‌ను అత్యంత సన్నిహితుల మధ్య ఘనంగా నిర్వహించారు. ఈ వేడుకలో మంచు మనోజ్ హైలైట్‌గా నిలిచారు. తన మేనకోడలిని పల్లకిలో ఎక్కించి స్వయంగా వేదికపైకి తీసుకురావడం, అన్ని పనులను దగ్గరుండి చూసుకోవడం అందరినీ ఆకట్టుకుంది. మనోజ్‌కు తన అక్క లక్ష్మి అంటే ఎంత ప్రాణమో ఈ వీడియోలో చూస్తే అర్థమవుతోంది. అయితే ఈ వేడుకలో మనోజ్ ఒక్కడే కనిపించడం అందరినీ ఆశ్చర్యపరిచింది.

గైర్హాజరైన మోహన్ బాబు, మంచు విష్ణు:

సాధారణంగా ఇలాంటి ఫ్యామిలీ ఫంక్షన్లలో అందరూ కలిసి ఫోటోలకు పోజులివ్వడం చూస్తుంటాం. కానీ విద్యా నిర్వాణ వేడుకలో తాతయ్య మోహన్ బాబు గానీ, మేనమామ మంచు విష్ణు గానీ ఎక్కడా కనిపించలేదు. వారి కుటుంబ సభ్యులు కూడా ఈ ఫంక్షన్‌కు రాలేదని ఇన్ సైడ్ టాక్. సొంత మనవరాలి ఫంక్షన్‌కు మోహన్ బాబు ఎందుకు రాలేదు? విష్ణు ఎందుకు దూరంగా ఉన్నారు? అన్న ప్రశ్నలు ఇప్పుడు నెట్టింట వినిపిస్తున్నాయి. మనోజ్ వచ్చాడనే కారణంతోనే వారు రాకుండా ఉన్నారా? అనే అనుమానాలు కూడా వ్యక్తమవుతున్నాయి.

ముదిరిన మనోజ్-విష్ణు వివాదం?:

ఇక గతంలో మనోజ్ ఒక వీడియో పోస్ట్ చేసి తన అన్న విష్ణుతో ఉన్న విభేదాలను బహిరంగం చేసిన సంగతి తెలిసిందే. అప్పటి నుంచి వీరిద్దరి మధ్య మాటలు లేవని, మంచు ఫ్యామిలీ రెండు గ్రూపులుగా విడిపోయిందని వార్తలు వచ్చాయి. ఇక మంచు లక్ష్మి ఎప్పుడూ మనోజ్‌కు సపోర్టుగా ఉంటూ వస్తోంది. తాజాగా జరిగిన ఈ ఫంక్షన్ ద్వారా మంచు ఫ్యామిలీలో చీలికలు నిజమేనని, ఒకవైపు లక్ష్మి-మనోజ్ ఉండగా, మరోవైపు మోహన్ బాబు-విష్ణు ఉన్నారని సోషల్ మీడియా జనం చర్చించుకుంటున్నారు.

ALSO READ:HBD Mohan Babu: సినిమాల నుండి యూనివర్సిటీ వరకు.. మోహన్ బాబు ఆస్తుల చిట్టా!

లక్ష్మి పిలవలేదా? లేక వారే వెళ్లలేదా?:

ఈ విభేదాల నేపథ్యంలో మంచు లక్ష్మి తన తండ్రిని, సోదరుడిని అసలు పిలిచిందా లేదా అనే సందేహాలు కూడా అభిమానులలో కలుగుతున్నాయి. ఒకవేళ పిలిచినా మనోజ్‌తో ఎదురుపడటం ఇష్టం లేక వారు దూరంగా ఉండిపోయారా అనే ప్రచారం నెట్టింట జరుగుతోంది. కుటుంబంలో ఎన్ని గొడవలున్నా పిల్లల ఫంక్షన్లలో అందరూ కలిసి ఉంటే బాగుంటుందని అభిమానులు అభిప్రాయపడుతున్నారు. మొత్తానికి విద్యా నిర్వాణ హాఫ్ శారీ ఫంక్షన్ ఆనందంగా సాగినా, మంచు ఫ్యామిలీ తగాదాలను మాత్రం మళ్ళీ తెరపైకి తెచ్చింది.

మంచు ఫ్యామిలీ అంటే టాలీవుడ్‌లో ఒక పెద్ద ఇమేజ్ ఉంది. ఇక ఇలాంటి చిన్న చిన్న గొడవలు పక్కన పెట్టి అందరూ కలిసి ఉంటే చూడాలని ఫ్యాన్స్ కోరుకుంటున్నారు. ఈ వివాదంపై మంచు ఫ్యామిలీ ఎవరైనా క్లారిటీ ఇస్తారేమో చూడాలి.