Banana Plant Secrets: మనం తరచూ తినే పండ్లలో అరటి పండు చాలా ముఖ్యమైంది. ఎప్పుడో ఒకప్పుడు మనం అరటి చెట్లను చూసే ఉంటాం. ఇలాంటి సమయంలో మీరు ఎప్పుడైనా గమనించారా? అరటి చెట్టు తన జీవితంలో ఒకే ఒక్కసారి గెల వేస్తుంది. ఆ తర్వాత అది ఎండిపోయి చనిపోతుంది. అసలు ఇది ఎందుకు జరుగుతుంది? దీని వెనక ఉన్న ప్రకృతి రహస్యం ఏంటి? ఒక గెల వేయడానికి ఈ మొక్క ఎంత శక్తిని ఉపయోగిస్తుంది? దీనికి సంబంధించిన పూర్తి ఆసక్తికరమైన వివరాలు ఇప్పుడు తెలుసుకుందాం.
మనం సాధారణంగా అరటిని ‘చెట్టు’ అని పిలుస్తాము. కానీ నిజానికి సైన్స్ పరంగా చూస్తే అది అస్సలు చెట్టే కాదు! అరటి అనేది అతిపెద్ద ‘గడ్డి జాతి మొక్క’. దీనికి సాధారణ చెట్లలాగా గట్టిపడే కాండం లేదా కలప ఉండదు. మనం చూసే అరటి ట్రంక్ (బోదె) అనేది కేవలం ఒకదానికొకటి గట్టిగా అల్లుకుపోయిన ఆకుల పొరల సమూహం మాత్రమే. అందుకే ఇది చాలా మెత్తగా ఉంటుంది. ప్రతి అరటి మొక్క కూడా తన జీవితంలో ఒకే ఒక్క పెద్ద పనిని పూర్తి చేయడానికి పుడుతుంది. అదే.. ఒక పూల కొమ్మను (అరటి పువ్వు) సృష్టించడం.
ఒకే కాపుతో అంతమైపోవడం:
అరటి మొక్కను ‘మోనోకార్పిక్’ అని పిలుస్తారు. అంటే ఒక నిర్దిష్టమైన కాండం తన జీవితకాలంలో ఒకే ఒక్కసారి పూలు పూసి, ఒకేసారి పండ్లను ఇచ్చి ఆ తర్వాత ఆగిపోతుంది. ఒక పెద్ద అరటి గెలను తయారు చేయడానికి ఆ మొక్కకు విపరీతమైన ఎనర్జీ అవసరమవుతుంది. నేల నుంచి పీల్చుకున్న పోషకాలన్నింటినీ ఉపయోగించి పండ్లను పండించిన తర్వాత, ఆ కాండానికి ఇక పెరగడానికి ఎలాంటి అవసరం ఉండదు. పండ్లు కోసేయగానే, ఆ కాండం నెమ్మదిగా ఎండిపోయి చనిపోతుంది.
ప్రతి ఒక్క కాండం ఒకేసారి గెల వేసి చనిపోయినప్పటికీ.. ఆ తర్వాత వచ్చే కొత్త పిలకల వల్ల రైతులకు నిరంతరాయంగా పంట లభిస్తుంది. ఒక్క కాండం చనిపోయినంత మాత్రాన అరటి తోట మొత్తం నాశనమైపోదు. ఇక్కడే ప్రకృతి మనకు ఒక అద్భుతమైన మ్యాజిక్ను చూపిస్తుంది. భూమి అడుగు భాగంలో ‘కార్మ్’ అని పిలిచే ఒక గట్టి దుంప లాంటి వేరు భాగం ఉంటుంది. ఇది భూమి లోపలే జీవించి ఉంటుంది. పైన ఉన్న ప్రధాన కాండం చనిపోతున్న సమయంలోనే..ఈ అండర్గ్రౌండ్ దుంప నుంచి కొత్త పిలకలు వేగంగా పైకి ఎదుగుతాయి.
రైతులు సాధారణంగా ఆ పాత మొక్క చనిపోయాక, దాని పక్కనే ఆరోగ్యంగా పెరుగుతున్న ఒక బలమైన పిలక మొక్కను మాత్రమే ఉంచి, మిగిలిన చిన్న చిన్న వాటిని తీసేస్తారు. ఆ కొత్త పిలక మొక్కే మళ్లీ పెరిగి పెద్దదై, తర్వాతి గెలను ఇస్తుంది. అంటే ఇదొక ‘రిలే రేస్’ లాంటిది అన్నమాట! ఒక రన్నర్ తన పని ముగించి తర్వాతి రన్నర్కు బ్యాటన్ అందించినట్లు, ఒక అరటి కాండం చనిపోతూ తన స్థానాన్ని ఇంకో కొత్త మొక్కకు అందిస్తుంది.
అందుకే.. అరటి తోటలలో, ప్రతి ఒక్క మొక్క ఒకే గెల వేసి చనిపోయినప్పటికీ.. ఆ తోట మాత్రం ఏళ్ల తరబడి పండ్లను ఇస్తూనే ఉంటుంది. ఒకేసారి గెల వేసి చనిపోవడం అనేది ప్రకృతి అరటి మొక్కకు రాసిన ఒక అందమైన జీవన సూత్రం.
Share
Sand Crackdown: అక్రమ ఇసుక రవాణా తనిఖీల్లో దారుణం.. బోలోరతో కానిస్టేబుల్ను తొక్కించే ప్రయత్నం..!
ప్రతి 30 ఏళ్లకు ఒకసారి కాలం ఆగిపోయే ఇల్లు... కట్ చేస్తే స్పైన్ చిల్లింగ్ సీన్స్
