Sweating: ఎక్కువగా చెమట పడుతోందా ? అయితే జాగ్రత్త

Sweating: శరీరంలో ఎక్కువగా చెమట పట్టడానికి అనేక కారణాలు ఉంటాయి. ఈ సమస్యను హైపర్‌హిడ్రోసిస్ అని అంటారు. చెమట పట్టడం అనేది శరీర ఉష్ణోగ్రతను నియంత్రించడానికి ఒక సహజ ప్రక్రియ. కానీ అది అవసరం లేనప్పుడు కూడా ఎక్కువగా పడితే.. అది ఒక సమస్యగా పరిగణించాలి. ఇలాంటి లక్షణాన్ని ముందుగానే గుర్తించి చికిత్స తీసుకోవాలి.

అధిక చెమటకు కారణాలేంటి ?
1.ప్రాథమిక హైపర్‌హిడ్రోసిస్:
ఈ రకం హైపర్‌హిడ్రోసిస్‌లో.. ఎక్కువగా చెమట పట్టడానికి నిర్దిష్టమైన కారణం అనేది ఉండదు. ఇది సాధారణంగా అరచేతులు, అరికాళ్ళు, ముఖం వంటి నిర్దిష్ట శరీర భాగాలలో ఎక్కువగా కనిపిస్తుంది. ఇది తరచుగా టీనేజ్‌లో మొదలవుతుంది. ఈ సమస్యకు ప్రధాన కారణం నాడీ వ్యవస్థలోని అధిక క్రియాశీలత. మెదడులోని కొన్ని భాగాలు చెమట గ్రంథులకు ఎక్కువగా సంకేతాలను పంపడం వల్ల ఈ సమస్య వస్తుంది. ఇది తరచుగా వారసత్వంగా కూడా వచ్చే అవకాశం కూడా ఉంటుంది.

2. ద్వితీయ హైపర్‌హిడ్రోసిస్:
ఈ రకం హైపర్‌హిడ్రోసిస్ ఏదైనా అంతర్లీన ఆరోగ్య సమస్య లేదా మందుల వల్ల వచ్చే సైడ్ ఎఫెక్ట్స్ వల్ల కూడా సంభవిస్తుంది. ఈ సమస్య శరీరం మొత్తం మీద చెమట పట్టేలా చేస్తుంది. దీనికి సంబంధించిన కొన్ని ముఖ్య కారణాలు..

థైరాయిడ్ సమస్యలు: హైపర్‌థైరాయిడిజం అనే థైరాయిడ్ గ్రంథి అధిక క్రియాశీలత వల్ల శరీర జీవక్రియ రేటు పెరిగి, అధిక చెమట పట్టవచ్చు.

మధుమేహం: డయాబెటిస్ ఉన్నవారిలో రక్తంలో చక్కెర స్థాయిలు తగ్గినప్పుడు, చెమట పట్టడం ఒక లక్షణంగా ఉంటుంది.

మానసిక ఒత్తిడి, ఆందోళన: ఒత్తిడి, భయం, ఆందోళన వంటి మానసిక సమస్యలు ఉన్నప్పుడు నాడీ వ్యవస్థ ప్రేరేపించబడి, చెమట ఎక్కువగా పడుతుంది.

మెనోపాజ్ : మహిళల్లో పీరియడ్స్ ఆగిపోయే సమయంలో హార్మోన్లలో వచ్చే మార్పుల వల్ల హాట్ ఫ్లాషెస్ (వేడి ఆవిర్లు), రాత్రిపూట అధిక చెమట పట్టడం వంటివి సంభవించవచ్చు.

కొన్ని రకాల మందులు: యాంటీ డిప్రెసెంట్స్, కొన్ని బీపీ మందులు, కొన్ని హార్మోన్ల చికిత్సలు వంటివి చెమట పట్టడాన్ని పెంచుతాయి.

ఇన్ఫెక్షన్‌లు: క్షయ వంటి కొన్ని దీర్ఘకాలిక ఇన్ఫెక్షన్‌లు రాత్రిపూట చెమట పట్టడానికి కారణం కావచ్చు.

గుండె జబ్బులు: కొన్ని గుండె సమస్యలు ఉన్నప్పుడు కూడా అధిక చెమట ఒక లక్షణం కావచ్చు.

ఎప్పుడు డాక్టర్‌ని సంప్రదించాలి ?

అధిక చెమట వల్ల మీ రోజువారీ జీవితం ఇబ్బందిగా మారినా.. లేదా రాత్రిపూట చెమట పట్టి నిద్రకు భంగం కలిగించినా.. లేదా చెమటతో పాటు బరువు తగ్గడం, జ్వరం వంటి లక్షణాలు కనిపించినా వెంటనే డాక్టర్‌ని సంప్రదించాలి.