2-Minute Rule for Exercise: రోజంతా పనిలో బిజీగా ఉండే వాళ్లకు కూడా ఆరోగ్యం, ఫోకస్ రెండూ సమంగా ఉండాలి. పని మధ్య చిన్న బ్రేక్ తీసుకుని కాస్త వ్యాయామం చేస్తే శరీరం, మెదడు రిఫ్రెష్ అవుతుంది. అందుకే.. ఇటీవలి కాలంలో ‘58 నిమిషాల పని – 2 నిమిషాల వ్యాయామం’ అనే సింపుల్ ఫార్ములా చాలా పాపులర్ అవుతోంది. ఈ చిన్న అలవాటు మీ వర్క్లో ఫోకస్ పెంచడమే కాకుండా, మీ శరీరాన్ని కూడా యాక్టివ్గా ఉంచడంలో ఎంతో సహాయపడుతుంది. పని ప్రదేశంలో చేయాల్సిన వర్కౌట్స్ ఏమిటి? ఎలా చేయాలి.. వంటి వివరాలు ఇప్పుడు తెలుసుకుందాం.
గంటల తరబడి కంప్యూటర్ ముందు కూర్చోవడం వలన నడుము, మెడ, తుంటి కండరాలు బలహీనపడి వెన్ను నొప్పి, మెడ సమస్యలు వచ్చే అవకాశాలు ఎక్కువ. ఇలా కుర్చీకే అతుక్కుపోవడం వల్ల శారీరక ఆరోగ్యంపైనే కాకుండా మానసిక ఆరోగ్యంపైనా ప్రభావం చూపుతుంది. అందుకే ఈ సమస్యలకు చెక్ పెట్టేలా 58 నిమిషాల పని – 2 నిమిషాల వ్యాయామం ఫార్ములాను పాటించాలి.
Read Also: నాలుగు పదుల వయసులోనూ ఫిట్నెస్.. ఆ కిటుకు మన చేతుల్లోనే ఉందన్న నిపుణులు!
ఈ వ్యాయామంలో చిన్న కదలికల ద్వారా శరీరాన్ని సున్నితంగా సాగదీయాలి. ముఖ్యంగా తుంటి, మోకాళ్లు, చీలమండల కదలికలపై దృష్టి పెట్టాలి. ఇది కండరాల బలం, మానసిక ప్రశాంతతను పెంచుతుంది. అలాగే ఈ ఎక్సర్సైజ్ ఒత్తిడిని తగ్గించి, మెదడును రిఫ్రెష్ చేస్తుంది. దీని కోసం పైకి లేచి నిటారుగా నిలబడి, కాలి వేళ్లతో పైకి కిందికి కదలాలి. ఇలా చేస్తున్నప్పుడు ఒక చేతిని పైకెత్తి, మరొక చేతిని కిందకు దించాలి. ఇలా 50 సార్లు రిపీట్ చేయాల్సి ఉంటుంది.
పని ప్రదేశంలో ఎప్పటికప్పుడు బలాన్ని పెంచుకోవాలంటే.. ఈ తేలికైన సెమీ పుష్-అప్స్ చేయాల్సిందే. దీని కోసం ఏదైనా బేస్ను ఉపయోగించుకుని 10 నుంచి 15 పుష్-అప్స్ చేస్తే సరిపోతుంది. ఈ సెమీ-పుష్-అప్స్ వలన శరీరం మొత్తానికీ బలం పెరుగుతుంది. ముఖ్యంగా ఛాతి, చేతులు, భుజాలు, కోర్ కండరాలు బలపడతాయి.
మీరు కూర్చున్న కుర్చీ అంచున కూర్చుని, వెన్నెముకను నిటారుగా ఉంచాలి. తర్వాత మీ మోకాళ్లను నెమ్మదిగా ఛాతీ వైపుకు పైకి లేపాలి.. ఆ తర్వాత నెమ్మదిగా కిందకు దించాలి. ఇలానే పదేసి సార్లు చొప్పున 3 సార్లు రిపీట్ చేస్తే సరిపోతుంది. తర్వాత మీ వీపును గోడకు ఆనించి కుర్చీ మాదిరి ముడుచుకుని ఒక నిమిషం పాటు అలానే కూర్చోవాలి.
ఈ వ్యాయామం మీ కండరాల కదలికను మెరుగుపరచడానికి చేసే ఒక డైనమిక్ స్ట్రెచింగ్ వ్యాయామం. దీనిలో ఒక కాలును ముందుకు వెనుకకు లేదా పక్కలకు ఊపుతూ ఉండాలి. ఇది తొడలు, పొత్తికడుపు కింది భాగం, తొడల మధ్య ఉన్న కండరాల సమూహాన్ని సాగదీస్తుంది. అలాగే ఈ స్ట్రెచింగ్ వల్ల చీలమండల పనితీరు చురుగ్గా ఉంటుంది.
Read Also: జిమ్కు వెళ్లకుండానే ఈ మూడు పనులు చేయండి.. బాడీ ఫిట్నెస్ ఎందుకు రాదో చూద్దాం!
Share
Akhanda 2 Day1 Collections : అడ్వాన్స్ బుకింగ్లో బాలయ్య ఊచకోత.. ఫస్ట్ డే ఎన్ని కోట్లు వసూళ్లు అంటే?
CM Revanth Delhi Tour: ఢిల్లీలో సీఎం.. గ్లోబల్ సమ్మీట్ సక్సెస్పై సోనియా, రాహుల్ ప్రశంసలు
