పిల్లలను పెంచడం అతిపెద్ద బాధ్యత. ఈ బాధ్యత.. ఓర్పు, అవగాహన, భావోద్వేగ నియంత్రణ చాలా అవసరం. పిల్లలు.. తల్లిదండ్రుల ప్రవర్తనను ప్రతిరోజూ గమనించి నేర్చుకుంటారు. తరచూ కోపంగా ఉండడం, కఠినంగా ప్రవర్తించడం పిల్లల మానసిక ఆరోగ్యాన్ని దెబ్బతీస్తుంది. నిపుణులు కొన్ని సమయాల్లో ప్రశాంతంగా ఉండాలని సూచిస్తారు. తప్పుడు ప్రతిస్పందనలు.. పిల్లల ఆత్మవిశ్వాసం, సంబంధాలు, మానసిక భద్రతను దెబ్బతీస్తాయి.
పిల్లలు కొత్త విషయాలు నేర్చుకునే క్రమంలో చిన్న తప్పులు చేయడం సహజం. ఇంట్లో ఏదైనా వస్తువులు, బొమ్మలు విరగ్గొట్టడం, పనులు మరచిపోవడం వంటివి సాధారణం. ఇలాంటి సమయాల్లో కోపం చూపడం వల్ల పిల్లలు భయపడతారు. వారు తమ సమస్యల గురించి తల్లిదండ్రులతో చెప్పుకోవడం మానేస్తారు. అందుకే పిల్లలు చేసే చిన్న చిన్న తప్పులు చేస్తే ఓర్పుతో వారికి తప్పు, ఒప్పుల గురించి వివరించి మార్గదర్శకత్వం చేయడం ద్వారా పిల్లలు తప్పుల నుంచి నేర్చుకుంటారు.
స్కూల్ పరీక్షల్లో తక్కువ మార్కులు వచ్చినప్పుడు చాలా మంది తల్లిదండ్రులు కోపం చూపుతారు. ఇప్పటికే పాఠశాలలో ఒత్తిడి వల్ల పిల్లల మానసికంగా ఇబ్బందిపడుతుంటారు. కోపం చూపడం వల్ల ఒత్తిడి పెరిగి ఆత్మవిశ్వాసం తగ్గుతుంది. ప్రశాంతంగా సమస్యలను చర్చించి, ప్రోత్సహించడం ద్వారా పిల్లలు మెరుగుపడతారు.
పిల్లలు కూడా దుఃఖం, కోపం, భయం వంటి భావాలను అనుభవిస్తారు. వారు ఏడ్చినా లేదా కోపపడినా కోపంగా స్పందించకూడదు. భావోద్వేగాలను వ్యక్తం చేయడం ఆరోగ్యకరమైన వికాసానికి అవసరం. ఓపికగా వినడం ద్వారా నమ్మకం పెరుగుతుంది.
నిరంతర విమర్శలు, కోపం పిల్లల ఆత్మగౌరవాన్ని దెబ్బతీస్తాయి. ఈ కారణంగా పిల్లలు తమ సామర్థ్యాల పట్ల సందేహించడం మొదలుపెడతారు. ప్రోత్సాహం, మంచి మాటలు చెప్పడం వల్ల పిల్లల్లో ఆత్మవిశ్వాసం పెరుగుతుంది.
భయంతో పిల్లలు తాత్కాలికంగా వినవచ్చు కానీ తల్లిదండ్రులతో వారు ప్రేమగా ఉండడం మానేస్తారు. పిల్లలు తమ ఆలోచనలను తల్లిదండ్రులతో పంచుకోవడం మానేస్తారు.
బంధువులు లేదా ఇతరుల ముందు పిల్లలను కోపంగా తిట్టడం వల్ల వారు అవమానంగా ఫీలవతారు, వారి మనసు గాయపడుతుంది. అందుకే
సమస్యలను ప్రైవేట్గా చర్చించాలి.
ఇంట్లో ప్రశాంతమైన వాతావరణం ఉంటే పిల్లల మానసిక ఎదుగుదలకు సహాయపడుతుంది. నిరంతర కోపం పిల్లల్లో ఒత్తిడిని పెంచుతుంది. శాంతంగా ఉండటం వల్ల పిల్లలు సురక్షితంగా, విలువైనవారిగా భావిస్తారు.
తల్లిదండ్రులు కూడా ఒత్తిడికి గురవుతారు. కానీ కోపాన్ని అదుపు చేసుకుని ప్రతిస్పందించాలి. కోపం వస్తే శ్వాస బాగా తీసుకోవడం, చిన్న విరామం సహాయపడతాయి.
పిల్లల పట్ల సున్నితమైన సమయాల్లో కోపం చూపడం వల్ల వారి మానసిక, భావోద్వేగ ఆరోగ్యం దెబ్బతింటుంది. ఓపిక, మద్దతు, భావోద్వేగ భద్రత ఉన్న పేరెంటింగ్ ద్వారా పిల్లలు ఆత్మవిశ్వాసంతో, సంతోషంగా ఎదుగుతారు. గౌరవంగా, ప్రేమతో మాట్లాడటం ద్వారా బలమైన తల్లిదండ్రులు, పిల్లల మధ్య బలమైన సంబంధం ఏర్పడుతుంది.
Share
దొరికిన ‘పీఎంజే’ దొంగలు.. దోపిడీ ఒకరు, తరలించేది మరొకరు.. జీతాలు ఇచ్చి చోరీలు
జియో యూజర్లకు భారీ షాక్.. రూ. 249 ప్లాన్ క్లోజ్.. ప్రత్యామ్నాయ బెస్ట్ ప్లాన్లు ఇవే!
