Suicide Risk: సాధారణంగా ఎవరైనా ఆత్మహత్య చేసుకున్నారంటే.. వారు డిప్రెషన్లో ఉండి ఉంటారని లేదా మానసిక సమస్యలతో ఇబ్బంది పడ్డారేమో అని అనుకుంటాం. “అయ్యో.. వాళ్లు చాలా సరదాగా ఉండేవారు, ఎందుకు ఇలా చేశారో తెలియడం లేదు” అని స్నేహితులు, బంధువులు కూడా ఆశ్చర్యపోతుంటారు. అయితే.. ఆత్మహత్య చేసుకునే వారిలో దాదాపు సగం మందికి ఎలాంటి మానసిక అనారోగ్య లక్షణాలు ఉండవని.. అసలు వారు అంతకు ముందు ఎప్పుడూ ఆత్మహత్య ఆలోచనలను కూడా బయటపెట్టలేదని తాజా పరిశోధనల్లో రుజువైంది.
ఉటా యూనివర్సిటీ నిర్వహించిన ఒక జెనెటిక్ అధ్యయనం ప్రకారం.. ఆత్మహత్య చేసుకునే వారిలో కొంత మంది రిస్క్ ఫ్యాక్టర్స్ పూర్తిగా భిన్నంగా ఉన్నాయి. ఈ అధ్యయనం JAMA Network Open అనే జర్నల్లో ప్రచురితమైంది. ఇప్పటి వరకు మనం ఏమనుకున్నామంటే.. ఆత్మహత్య చేసుకున్న వారు డిప్రెషన్లో ఉన్నారని.. వారు ఆ విషయాన్ని దాచి ఉంచడం వల్ల మనకు తెలియలేదని భావించేవాళ్లం. కానీ.. ప్రొఫెసర్ హిల్లరీ కూన్ నేతృత్వంలోని ఈ పరిశోధన బృందం 2,700 కంటే ఎక్కువ మందికి సంబంధించిన డేటాను విశ్లేషించగా ఆసక్తికరమైన విషయాలు వెలుగులోకి వచ్చాయి. ఈ అధ్యయనంలో తేలిందేంటంటే.. ముందస్తు సంకేతాలు ఇవ్వకుండా ఆత్మహత్య చేసుకునే వారిలో జన్యుపరంగా కూడా డిప్రెషన్ లేదా యాంగ్జైటీ వంటి లక్షణాలు చాలా తక్కువగా ఉన్నాయి.
ఇది డిప్రెషన్ కాకపోవచ్చు!
హిల్లరీ కూన్ మాటల్లో చెప్పాలంటే.. “చాలా మంది ఆత్మహత్య చేసుకునే ప్రమాదం ఉన్నవారిలో డిప్రెషన్ ఉంటుందని మనం అనుకుంటాం. కానీ నిజానికి వారికి డిప్రెషన్ ఉండకపోవచ్చు. అంటే, ఆత్మహత్యకు డిప్రెషన్ ఒక్కటే కారణం కాదు. ఈ పరిశోధన ఆత్మహత్య నివారణ పద్ధతులను మార్చాల్సిన అవసరం ఎంతగానో ఉందని సూచిస్తోంది. కేవలం మానసిక అనారోగ్యం కోసం స్క్రీనింగ్ (పరీక్షలు) చేస్తే సరిపోదు. ఎందుకంటే.. ఈ రెండో రకానికి చెందిన వరిలో మల్టీపుల్ డిజార్డర్స్, అల్జీమర్స్, PTSD (పోస్ట్ ట్రామాటిక్ స్ట్రెస్ డిజార్డర్) వంటి వాటికి సంబంధించిన జన్యు పరమైన సమస్యలు కూడా తక్కువగానే ఉన్నాయి. అందుకే వీరు సాధారణ వ్యక్తుల్లాగానే కనిపిస్తారు.
ఆత్మహత్యకు ఇతర కారణాలు ఏంటి ?
మానసిక సమస్యలు లేకపోయినా ఒక వ్యక్తిని ఆత్మహత్యకు ప్రేరేపించే శారీరక సమస్యలు కూడా ఉంటాయని పరిశోధకులు భావిస్తున్నారు.
దీర్ఘకాలిక నొప్పులు : భరించలేని శారీరక నొప్పి మనిషిని నిరాశలోకి నెట్టే ప్రమాదం ఉంటుంది.
మంట లేదా వాపు : శరీరంలోని అంతర్గత ఇన్ఫ్లమేషన్ మెదడు పని తీరుపై ప్రభావం చూపుతుంది.
శ్వాసకోస సమస్యలు: ఊపిరితిత్తులకు సంబంధించిన ఇబ్బందులు కూడా ఒక వ్యక్తి ఒత్తిడికి గురవడానికి కారణం అవుతాయి.
సామాజిక, పర్యావరణ ప్రభావం: ఆత్మహత్యకు కేవలం జన్యువులే కారణం కాదు. చుట్టూ ఉన్న పరిస్థితులు కలిసి మనిషి నిర్ణయాలను ప్రభావితం చేస్తాయి. ఒక వ్యక్తికి కొన్ని రకాల జన్యుపరమైన బలహీనతలు ఉన్నప్పుడు.. విపరీతమైన ఒత్తిడి లేదా కష్టకాలం ఎదురైతే వారు ఆత్మహత్య వైపు మొగ్గు చూపే అవకాశం ఎక్కువగా ఉంటుంది. కానీ ఇది అందరికీ ఒకేలా ఉండదు.
Also Read: ఆవ నూనె ఇలా వాడితే.. చలికాలంలో మాయిశ్చరైజర్తో పనే లేదు !
మనం ఏం చేయాలి ?
ఈ పరిశోధన మనకు నేర్పుతున్న పాఠం ఏటంటే.. ఎవరైనా బయటికి ప్రశాంతంగా కనిపిస్తున్నారంటే వారు మానసిక ఆరోగ్యంగా ఉన్నారని అర్థ కాదు.
మరింత నిశితంగా గమనించాలి: కేవలం డిప్రెషన్ లక్షణాల కోసమే కాకుండా.. వారి జీవితంలో ఎదురయ్యే ఇతర కష్టాలను, శారీరక ఇబ్బందులను కూడా మనం అర్థం చేసుకోవాలి.
సహాయం: ఆత్మహత్య ముప్పును గుర్తించి వారికి సరైన సహాయం అందేలా చూడాలి.
నివారణ మార్గాలు: డాక్టర్లు రోగుల మానసిక ఆరోగ్యంతో పాటు వారి శారీరక ఇబ్బందులను కూడా పరిగణనలోకి తీసుకుని చికిత్స అందించాల్సి ఉంటుంది.
Share
Manchu Vishnu: న్యూ ఇయర్ బ్లాస్ట్.. కొత్త సినిమా అనౌన్స్ చేసిన మంచు విష్ణు..
Duvvada Srinivas: కింజరాపు అప్పన్న మిస్సింగ్.. ధర్మాన కృష్ణదాస్, ప్రసాదరావులపై దువ్వాడ శ్రీనివాస్ తీవ్ర ఆరోపణలు
