వేసవిలో చెమటకాయల వల్ల మంట, దురదతో ఇబ్బందిపడుతున్నారా? ఈ సహజ పద్ధతులతో ఉపశమనం

వేసవి వేడి వల్ల చాలా మందికి దురద, చెమటకాయల సమస్య వస్తుంది. చర్మపు రంధ్రాల్లో చెమట అడ్డుపడటం వల్ల చిన్న చిన్న ఎర్రని పొక్కులు వస్తాయి. వీటిలో దురద కూడా వస్తుంది. ఇవి మెడ, వీపు, ఛాతీ, చేతులపై ఎక్కువగా కనిపిస్తాయి. సరైన చర్మ సంరక్షణ, సహజ నివారణ పద్ధతులు ఈ సమస్యను తగ్గించడంలో సహాయపడతాయి.

చెమట కాయలు ఎందుకు వస్తాయి?

అధిక చెమట కారణంగా చర్మపు గ్రంథులు బ్లాక్ కావడం వల్ల చెమటకాయలు ఏర్పడుతుంది. వేడి వాతావరణం, బిగుతైన బట్టలు, తేమ ఈ సమస్యను పెంచుతాయి. పిల్లలు, బయట ఎండలో పని చేసేవారికి ఇది ఎక్కువగా వస్తుంది. చర్మాన్ని చల్లగా, పొడిగా ఉంచడం వల్ల ఈ సమస్య తగ్గుతుంది.

త్వరగా ఉపశమనం కోసం కోల్డ్ కంప్రెస్ వాడండి

చెమటకాయల వల్ల వచ్చే చర్మంలో దురద, మంట తగ్గించడానికి కోల్డ్ కంప్రెస్ చాలా ఉపయోగకరం. ఐస్ క్యూబ్స్‌ను మృదువైన గుడ్డలో చుట్టి దురద ఉన్న చోట్ల మెల్లగా పట్టుకోండి. కొన్ని నిమిషాలు పట్టుకుంటే చర్మం ఉపశమనం పొందుతుంది. ఐస్‌ను నేరుగా చర్మంపై పెట్టకండి.

అలోవెరా జెల్ వాడండి

అలోవెరా.. చల్లదనం, ఉపశమనం కలిగించే గుణాలను కలిగి ఉంటుంది. తాజా అలోవెరా జెల్‌ను దురద ఉన్న చోట్ల మెల్లగా పూయండి. కొంతసేపు ఆరనివ్వండి. తర్వాత చల్లని నీటితో కడగండి. ఇది దురదను తగ్గించి చర్మాన్ని హైడ్రేట్ చేస్తుంది.

చందనం పేస్ట్

చందనం పొడిని గులాబీ నీటితో కలిపి పేస్ట్ తయారు చేసి దురద ఉన్న ప్రాంతాలపై పూయండి. ఆరిన తర్వాత చల్లని నీటితో కడగండి. ఇది మంటను తగ్గించి చర్మానికి చల్లదనం ఇస్తుంది. వేసవిలో ఈ నివారణ చాలా ప్రభావవంతంగా ఉంటుంది.

చర్మాన్ని పొడిగా ఉంచి వదులుగా ఉన్న బట్టలు ధరించండి

బిగుతైన బట్టలు, చెమట పట్టే బట్టలు.. చెమటకాయలను పెంచుతాయి. కాటన్ బట్టలు ధరించండి. ఇవి గాలి తిరగడానికి అనువుగా ఉంటాయి. చెమట పట్టిన బట్టలను వెంటనే మార్చండి. చల్లని స్నానం చేయడం వల్ల కూడా ఉపశమనం కలుగుతుంది.

వేప నీటిని ఉపయోగించండి

వేప ఆకులను నీటిలో మరిగించి చల్లార్చి స్నానం చేయడానికి ఉపయోగించండి. ఇది దురదను తగ్గించి చర్మానికి చల్లదనం ఇస్తుంది. వేప సహజంగా చర్మ సమస్యలను తగ్గించే గుణం కలిగి ఉంటుంది.

వేడి వాతావరణంలో ఎక్కువ నీళ్లు తాగండి

వేసవిలో చెమట ఎక్కువగా పట్టడం వల్ల శరీరం నుంచి నీరు ఎక్కువగా తొలగిపోతుంది. తగినంత నీళ్లు తాగడం శరీర ఉష్ణోగ్రతను నియంత్రిస్తుంది. పండ్లు, కొబ్బరి నీళ్లు, ఆరోగ్యకర పానీయాలు తాగండి. మిరపకాయలు, చక్కెర ఎక్కువ ఉన్న ఆహారాలు తినడం తగ్గించండి.

చర్మాన్ని గోకడం చేయకూడదు

దురద ఉన్నప్పుడు గోకడం వల్ల చర్మంలో గాయల వల్ల ఇన్ఫెక్షన్ వచ్చే అవకాశం ఉంటుంది. మెత్తగా చర్మ సంరక్షణ చేయాలి. సమస్య తీవ్రంగా ఉంటే డాక్టర్‌ను సంప్రదించండి.

Also Read: తొలి పరిచయంలోనే అందరి మనుసులను గెలవాలనుకుంటున్నారా? దీని కోసం చాణక్యుడు చెప్పిన మంత్రం ఇదే