శ్రమ లేకుండా,దుమ్ము పడకుండా.. సీలింగ్ ఫ్యాన్‌ శుభ్రం చేసే స్మార్ట్ ఐడియాస్

Ceiling Fan Cleaning Tips: ఇంటిని ఎంత అందంగా సర్దుకున్నా, సీలింగ్ ఫ్యాన్‌పై పేరుకుపోయే దుమ్ము, జిడ్డు మొత్తం లుక్‌ని పాడుచేస్తాయి. చాలామంది ఫ్యాన్ తుడవాలంటే బద్ధకిస్తారు, ఎందుకంటే ఆ దుమ్ము కాస్తా కింద పడి ఇల్లంతా మురికి అవుతుందని భయం. కానీ, సరైన చిట్కాలు పాటిస్తే కేవలం ఐదు నిమిషాల్లో, ఒక్క ధూళి కణం కూడా కింద పడకుండా సీలింగ్ ఫ్యాన్‌ను కొత్తదానిలా మెరిపించవచ్చు. అందుకోసం ఇంట్లోనే అందుబాటులో ఉండే వస్తువులతో ఫ్యాన్‌ను ఎలా సులభంగా శుభ్రం చేసుకోవాలో ఇప్పుడు చూద్దాం.

సాధారణంగా ఇల్లు తుడవడం, సర్దడం ప్రతిరోజూ చేసే పనే. కానీ సీలింగ్ ఫ్యాన్ క్లీనింగ్ విషయానికి వస్తే మాత్రం చాలా మంది వాయిదా వేస్తుంటారు. ఎత్తులో ఉండటం ఒక కారణమైతే.. దాన్ని తుడిచేటప్పుడు దుమ్ము కళ్ళల్లో, బెడ్‌ పైన లేదా కింద పడి ఇల్లంతా మెస్సీగా మారుతుందని మరికొందరి ఆందోళన. అయితే.. కొన్ని స్మార్ట్ చిట్కాలు పాటిస్తే ఎలాంటి శ్రమ లేకుండా, కేవలం ఐదు నిమిషాల్లో ఫ్యాన్‌ను శుభ్రం చేయవచ్చు.

1. పిల్లో కవర్ ట్రిక్:
ఫ్యాన్ తుడిచేటప్పుడు దుమ్ము కింద పడకుండా ఉండటానికి అత్యంత ప్రజాదరణ పొందిన, సులువైన మార్గం ‘పాత పిల్లో కవర్ (దిండు కవర్)’ ఉపయోగించడం. ఒక పాత పిల్లో కవర్ తీసుకుని,దాన్ని ఫ్యాన్ బ్లేడ్‌ లోపలికి పూర్తిగా చొప్పించాలి. ఇప్పుడు బ్లేడ్‌ను కవర్ లోపల నొక్కి పట్టి,వెనక్కి లాగాలి. దీని వల్ల బ్లేడ్‌పై ఉన్న దుమ్ము మొత్తం పిల్లో కవర్ లోపలే ఉండిపోతుంది కానీ కింద పడదు. ఈ విధంగా మూడు బ్లేడ్లను సులభంగా, ఎలాంటి మురికి లేకుండా శుభ్రం చేయవచ్చు.

2. బేకింగ్ సోడా – నిమ్మరసం:
వంటగదిలో ఉండే ఫ్యాన్లకు దుమ్ముతో పాటు నూనె జిడ్డు కూడా పేరుకుపోతుంది. ఇది కేవలం బట్టతో తుడిస్తే వదలదు.

చిట్కా: ఒక గిన్నెలో కొద్దిగా బేకింగ్ సోడా,నిమ్మరసం, డిష్ వాష్ లిక్విడ్ కలిపి మిశ్రమంగా చేయండి. ఈ మిశ్రమాన్ని స్పాంజ్ లేదా పాత గుడ్డ సహాయంతో ఫ్యాన్ బ్లేడ్లకు రాయండి. ఒక రెండు నిమిషాలు ఆగాక, తడి క్లాత్‌‌తో తుడిచేస్తే జిడ్డు వదిలి ఫ్యాన్ కొత్తదానిలా మెరుస్తుంది.

3. వెనిగర్ , వాటర్ స్ప్రే:
వెనిగర్ అద్భుతమైన క్లీనింగ్ ఏజెంట్‌గా పనిచేస్తుంది. ఒక స్ప్రే బాటిల్‌లో సగం నీరు,సగం వెనిగర్ పోసి బాగా కలపండి. ఈ మిశ్రమాన్ని ఫ్యాన్ బ్లేడ్లపై స్ప్రే చేసి, మైక్రోఫైబర్ క్లాత్‌తో తుడిచేయండి. వెనిగర్ వల్ల బ్లేడ్లపై ఉండే బ్యాక్టీరియా నశించడమే కాకుండా.. ఫ్యాన్‌కు మంచి షైనింగ్ వస్తుంది.

ఫ్యాన్ త్వరగా దుమ్ము పట్టకుండా ఉండాలంటే..
ఫ్యాన్ క్లీన్ చేసిన తర్వాత, ఒక కాటన్ క్లాత్ పై కొద్దిగా ఫ్యాబ్రిక్ సాఫ్టెనర్ లేదా కొబ్బరి నూనె (చాలా తక్కువ పరిమాణంలో) వేసి బ్లేడ్లపై తుడవండి. ఇలా చేయడం వల్ల బ్లేడ్లపై ఒక ప్రొటెక్టివ్ లేయర్ ఏర్పడుతుంది. ఇది స్టాటిక్ ఎలక్ట్రిసిటీని తగ్గించి.. దుమ్ము త్వరగా పేరుకుపోకుండా నిరోధిస్తుంది.

గమనిక/జాగ్రత్త: సీలింగ్ ఫ్యాన్ శుభ్రం చేసేటప్పుడు ముందుగా మెయిన్ స్విచ్ లేదా ఫ్యాన్ స్విచ్ ఆఫ్ చేయడం మర్చిపోవద్దు. అలాగే.. స్టూల్ లేదా నిచ్చెనపై నిలబడేటప్పుడు జాగ్రత్తగా ఉండండి.

ఈ సింపుల్ ఇంటి చిట్కాలను పాటిస్తే.. పండగలప్పుడో లేదా వీకెండ్స్‌లోనో గంటల తరబడి శ్రమించాల్సిన అవసరం లేదు. నెలకు ఒక్కసారి ఈ పిల్లో కవర్ ట్రిక్ వాడితే మీ సీలింగ్ ఫ్యాన్ ఎప్పుడూ కొత్త దానిలా మెరుస్తూనే ఉంటుంది.